പ്രണയം

മഞ്ഞക്കിളിയും സ്വപ്നങ്ങളും..

രോഗം പടര്‍ന്ന ശയ്യക്കരികില്‍

തുറന്നിട്ട നീല ജാലകത്തിലൂടെ

മിഴികള്‍ പായിക്കവേ

അന്നാദ്യമായ്‌ ഞാന്‍ കണ്ടു,

പല സ്വപ്നങ്ങളിലൊന്നെന്ന പോല്‍

ആ മഞ്ഞക്കുരുവിയെ..

നഗ്നമാം മരച്ചില്ലയില്‍ നഖമമര്‍ത്തി

അതെന്നെ നോക്കി ചിരിച്ചു..

പറന്നു ചാരത്തേക്കടുത്ത് ആ

തിരശ്ശീലക്കിപ്പുറം ഒരു മഞ്ഞപ്പൊട്ടായി

നിമിഷങ്ങള്‍ കൊഴിയവെ,

അതെന്‍റെ മാറത്ത് ചേക്കേറി..

ഞാന്‍ ഉറ്റു നോക്കുമ്പോള്‍

സ്വപ്‌നങ്ങള്‍ രൂപാന്തരം പ്രാപിച്ചു..

അപ്പോള്‍ ...

എന്‍റെ ജീവനും കൊത്തിയെടുത്ത്

ആ മഞ്ഞത്തിര

ചിറകുകള്‍ വീശി ദൂരെക്കകന്നു പോയി...

കൊടുങ്കാറ്റടങ്ങിയപ്പോള്‍

സ്വപ്നങ്ങളുടെ മുറിവില്‍ മുഖമമര്‍ത്തി

ഇന്നലത്തെപ്പോലെ

ഞാന്‍ ഉറങ്ങാന്‍ ശ്രമിച്ചു...

(പ്രണയം കൈവിട്ടു പോയവര്‍ക്കായി..)