كرهتُ امي .. والسبب لعبة💔

الحلقة التالتة ( والاخيرة )

قالي: اهدا .. قعمز وانشاءالله مافي شيء كان كل خير

قعمزت وبدا يتكلم قالي :

امك قبل ساعتين او تلاته ساعات صار معاها حادت مع احد التاكاسي ، الحادت كان خطير وقوي هلبا ، وقعدنا ف العنايه المركزه انديرولها ف عمليه لاكتر من ساعه ، الضربه جت ع وجهها و درنا كل اللي نقدرو عليه

بعدين سكت قتله خيرك كمل

قالي: اسماعيل .. مش عارف كيف بنقولك الخبر بس قدر الله ماشاء فعل ، عضم الله أجرك امك توفت

اني بهاداكا الوقت ماتكلمتش ومابكيتش وماحزنتش وله طلعت مني اي ردت فعل ، كل اللي درته سحبت روحي و روحت للحوش ، وغادي... انفجرت نبكي، أدركتها لما كانت تبكي بسببي ، ادكرت معاملتي ليها و كل لحضة سيئه صارت بسببي و أدركتها قبل ساعات لما كانت تترجاني انوصلها و ارفضت ، كنت بنموت من القهر كان صوتي مالي كل الحوش ، صح كنت نكرهها لانها قتلت بوي بس مهما كان هاده امي ، امي اللي تعبت عشاني، امي اللي كانت تحاول تسعدني قد ماتقدر واللي دارت المستحيل عشان ماتخلينيش زعلان ف يوم وله عمرها ضرتني باي شيء ، المهم..

ف نفس الوقت الي كنت نبكي فيه كان رقم المستشفى يتصل بيا عشان يبوني نستلم الجتة و ندفنها، بس اني بهداك الوقت كنت وحيد و مش حانقدر اندير هدا كله بروحي فاتصلت بخوي الكبير عمر وكلمته واني نبكي وقتله كل القصه ، عمر بعد ماعرف انه امي ماتت حجز بنفس الوقت و ف اليوم التاني القيته قدامي ، دفنه امي ودرنا العزي و انتهينا منه ، انتهينا منه بس اني قعدت مقهور والقهر بيقتلني ، ومش هكي بس لاا، بعدها صار شيء خلاني انفكر بالانتحار من كتر القهر اللي كنت انحس بيه

تخايلو معاي، تخايلو معاي انه بعد مرور اسبوع من لما جيء خوي عمر بدا يحكيلي ع بوي و كيف مات لان كان موجود لما بوي مات

قالي .. انه بوي مات بحادث مروري و الحادت هدا كان بسبب السرعة الزايده، يعني نفس الكلام اللي قالاته امي بالزبط، يعني امي ماقتلتش بوي ، امي كانت صادقه ، جداي و عماتي هما اللي كدبن عليا، كنت نظلم ف امي طول الوقت ..

اااه و ربي مش قادر نوصفلكم شعوري ومش قادر نشرحلكم كمية القهر اللي حسيت فيه و فكرت بالانتحار لاكتر من مره، كنت انقول بيني وبين نفسي اني حرام انعيش اني ضروري انموت

خوي عمر ف هداكا الوقت و لما عرف اني حاولت ننتحر اكتر من مره رفعني معاه لأمريكا و كملت دراستي معاه وتوضفت ، وتو ليا عايش ف أمريكا اكتر من 5 سنوات، لاكن بالرغم من انه حالتي النفسيه تعدلت و بالرغم اني حياتي تحسنت بعد كل هالسنين بس... والله العضيم و حق ربي نادم ع اللي درته مع امي ومش حانسامح روحي لأخر يوم ف عمري .

قبل ما نكتب كلمة النهايه حابب انقوللكم نصيحه بسيطه..

امك و بوك هما نعمه عليك من رب العالمين فمهما كانت معاملتهم ليك تأكدت انهم مش حايضروك بشيء حتى لو كنت تحسابه العكس..💔

النهاية .

#F.R.M✨