Taehyung ke Jungkook ka Jimin

Ch1- 12vi fail

Taehyung's pov:

Mera naam hai Taehyung. Main apne bhai Jimin, mummy, papa aur behen Kammo ke saath Gupta ji ke ghar ke just baju waale ghar me rehta hu. Suna hai Gupta ji ka ladka Seoul chala gaya, jiski wajahse mohalle ke saare mummy pappaon ko apne baccho ko taane maarne ka pura mauka mil gaya. Kal tak Gupta ji ka ladka mere saath issi mohalle me kanche khela karta tha, aaj woh Seoul me hai aur main yaha stool pe khade hokar jhaadu se living room ke fan ki dhul saaf kar raha hu.

Mai pure concentration ke saath kaam kar hi raha tha, utne me hi ek udti hui chappal mere muh par padi.

"Nalayak ladke...... Guptaji ke bete se kuch seekh"

Ye dialogue sunte hi mai samajh chuka tha. Jimin firse 12vi me fail ho gaya.  Chappal toh papa ne feki par ghussa mujhe Jimin pe aa raha tha.

Itne paise de kar Akash me Jimin ki admission karwai thi aur yeh waha jaake gulcharre udaya karta tha. Bunk maarke kabhi Pinky ke saath golgappe khaate khada dikhta toh kabhi Meena ko cycle pe ride deta. Jetha ki girlfriend Babita ko bhi bhaga le jaane ke plan bana raha tha. Maine kaha tha yeh sabh badme kar liyo par yeh playboy kaha sunne waala tha.

Ghussa control kar maine fan pe dhyan lagaya toh fir ek udta hua belan meri gardan par aa pada. Iss baar paani saar ke upar chala gaya tha maine jhaadu zameen par patka aur stool se utar kar mummy pappa ke room ki taraf kadam badhaya toh Jimin bhaagta hua mere peeche aakar khada ho gaya.

Mummy mujhe bolne lagi, "Beta Taehyung, tu hi ise kuch samjha. Kitni baar bolu iss nalayak ko  padhai kar, padhai kar par meri kaha sunta hai."

Papa ghuraate hue bole, "Jimin, tujhe bola tha na maine agar iss baar fail hua toh humari kirane ki dukaan par baithna padhega. Ab koi chara nahi bacha, teri padhai likhai bandh chal ab mere saath kirane ki dukaan pe. "

Jimin rone ki kagar pe tha. Maine ek accha bhai hone ke naate beech me bolne ki jurrat kar di.
"Papa aisa toh mat bolo, vidya har insaan ka adhikaar hai, woh toh isse mat cheeno"

Papa bole, "Beta, tu beech me mat padh, Vidya par sirf uske pati Sidharth Roy Kapoor ka adhikaar hai par yeh nalayak uske ghar ke bahar bhi chakkar lagata hai"

"Papa mai, uss Vidya ki nahi, vidya yani Education ki baat kar raha tha"

"Tu beech me mat padh Tae, apna kaam kar, ab toh wohi hoga jo mai chahunga" bolte hue papa ne Jimin ki kalai ko mere peeche se pakda aur jaane lage tabhi maine unko rokha aur bola "Papa, mai leta hu Jimin ke padhai ki zimeedari" yeh sunte hi papa ne uska haath release kiya aur mere paas aake bole "Thik hai, padhai ki zimeedari teri aur kirane ki dukaan pe kaam karwane ki zimeedari meri. Jimin jo kaam me safal hoga uska future usi me banega"

Mere andar kaha se daring aayi, yeh mujhe bhi nahi pata chala. Maine challenge accept kiya aur Jimin ko pakad ke waha se khisak liya.

Yeh pehli baar nahi tha jabh maine isko bachaya. Mera toh jaise kaam hi bann gaya tha iske hisse ke laat aur jute khaana.

Jimin aur mai humare shared room me chale gaye.

Jimin's POV:

Taehyung aur mai jaise hi humare kamre me pohoche, usne mere upar laath-mukkon ki barsaat kar di. Main puchna chahta tha, bhai itna hi maarna tha toh bachaya hi kyu?

Jab mai bachte hue aur woh maarte hue thak gaya toh hum dono bed pe late gaye. Usne mere upar takiya feka aur hasne laga. Kaisa ajeeb ladka hai, tabiyat se maarta hai fir hass padta hai. Screw dheela toh nahi ho gaya iska.

Woh ghusse se nahi thakaan ke saath bola, "Ab kya karunga mai, papa ka challenge accept kar aaya hu, sabh teri wajahse"
Maine cute sa pout banaya, aur kaha, "Sorry Tae, meri wajahse tujhe yeh sabh karna padh raha hai, main next time pakka pass ho jaunga, teri kasam. "

Woh chidha hua tha, fir dheere se apni boxy smile di aur tab mujhe kuch rahat mili. Maine uske gaal pyaar se kheeche aur right gaal pe ek pappi leke uske ghussa hone se pehle, "thank you bro" kehke bhaag gaya.

Agle din, subah uthna zaruri tha, mujhe kirane ki dukaan pe jo jaana tha. Mann toh bilkul nahi tha par Tae ki wajahse kar raha tha.

Papa aur mai fresh hokar dukaan pe pohoch gaye. Unhone shutter khola aur hum andar gaye. Chotu ne mujhe kaam samjhaya aur mai customers ke aane ki wait karta khada ho gaya.

1/2 ghante se mai khade hokar pakk gaya tha aur jab kuch der ke liye baitha tabhi Vimla aunty dahi lene aa pohochi.

"Jimin beta, tumhara result aaya haina, mere bete Monty ka bhi aaya hai, 93℅ mile hai usko, tumhe kitne mile?

Mera mann toh kar raha tha dahi ka packet lekar unke muh pe de maaru par mummy papa ne acche sanskar diye the isliye daat dikhate hue unko dahi di aur phone bajj raha hai aisa bahana banakar unko indirectly waha se bhaga diya.

Ghusse se mera khoon khaul raha tha.  Tabhi sookhe registaan me paani ki boondon jaisa ek ladka aaya. Jab usne maari entriyaan toh mere dil me bajne lagi ghantiyaan (tang tang tang).  Uski zulfe lehera rahi thi. Maine apne dhadakte dil pe haath rakha, tabhi papa ne sar pe tapli maari aur kaam pe dhyan dene ke liye kaha. Usne dekh liya aur apni hasi control karne ki koshish kar raha tha. Ho gayi fir beizzati, maine socha.

Sharmate hue maine usse pucha, "Kkya chahiye aapko?"

"Mujhe sirf ek bread ka packet chahiye"

Ek bread ka packet dene me 10 sec bhi nahi lagte par main yaha usko nihaarne ke chakkar me minutes laga raha tha.

Maine finally usko bread diya, woh kuch badbada raha tha, "ajeeb ladka hai" aisa kuch bola aur papa ko bye bolke chala gaya.

Papa ne uske jaate samay kaha "Jungkook bete, Jeon sahab ko mera namaste bolna"

Uska naam Jungkook tha. Jungkook aur Jimin yeh dono naam saath kitne acche lagte hai, mai sochta hua wahi khada reh gaya.