Taehyung ke Jungkook ka Jimin

Ch 15 - Bhaichaara

Jimin's POV :

Tae ek ruthi hui Hindi film ki heroine jaise behave kar raha tha. Jab humare rishte bigde tabh mujhe laga ki galti sirf aur sirf meri thi, par dheere dheere akal aayi ki isme Tae, main aur Jungkook, hum teeno hi zimmedar the. Maana ki meri bhi galti thi par mujhe kya pata tha ki Taehyung aur Jungkook relationship mein hai. Pata hota toh main apni feelings ko badhne hi nahi deta. Dukh toh iss baat ka tha ki Taehyung ne mujhe, apne eklaute bhai ko batana zaruri nahi samjha.

Mere har lafde ka account, pados ke ladke Guddan se haatha pai, English teacher pe crush, Jaggu se li gayi udhaari, Chaggan ko di gayi gaali etc. ke baare mein maine Tae se kabhi kuch na chupaya. Meri zindagi ko khuli kitaab ki tarah Tae ke saamne display pe rakh diya. Fir bhi use mujhpe vishwaas nahi kiya ki yeh baat main hum dono ke alawa kisiko pata nahi chalne dunga?

Kya kuch nahi kiya maine Tae ke liye, uske birthday par uske liye ek party se extra beer chura ke layi. Khudke liye kharidi hui BTS (Brijesh Trousers and Shirts) ki T-shirt uske naam kardi. Vishlesh ki shaadi mein jaane ke liye badhiya sa makeup aur hairdye karke diya. Mehta saab ke aangan ka gamla toot jaane ki bhi galti apne sir le li. Badle mein mujhe kya mila? uska mujhse rooth jaana aur gubbare jaisa muh fula kar gharme ghoomna? Mujhe woh dramebaaz ka title deta firta hai toh ab khud kya karra tha?

Aaj main as usual jab shaam ko kamre mein aaya, tab Tae bed pe baitha hua zone out ho raha tha. Main koi naya jhagda shuru karne ke mood mein nahi tha isliye chup chap almari ke paas gaya aur apni neeli baniyan ki khoj mein lag gaya. Dhundh baniyan raha tha par last time 2 saal pehle pehna hua kaccha mil gaya. Uske baad jo khushi hui ki pucho mat. Uspe Mickey Mouse ka print tha aur kisi zamane mein woh mera favourite kaccha hua karta tha. Aur zyada utsaah ke saath main firse apni baniyan pe concentrate karne laga. Utne mein mujhe awaaz aayi.

"J-Jimin, sunn...."
Yeh awaaz Tae ki thi.

Maine peeche mudke dekha toh Tae ab khada ho chuka tha aur meri ore kadam badha raha tha. Uske har kadam ke saath mere dimaag mein worst case scenarios aa rahe the. Kahi maarega toh nahi. Iski maar bohot zor se lagti hai. Maarega toh main block kar lunga. Nahi kar paya toh mere chehre pe nishaan aa jayega. Nishaan ke saath main duniya ko kaise muh dikhaunga? Yeh baatein mere dimaag mein chalne lagi.

Maine finally darr ke maare aankhein bandh ki toh mujhe uska haath mere kandhe pe feel hua.
"Dekh bhai, baith ke aaram se Mango Rasna peete hue baat kar sakte hai, haatha-pai ki kya zarurat hai?" maine suggest kiya.
Usne dusra haath bhi mere kandhe pe rakha.
"Tae, meri Chennai Super Kings waali jersey tujhe chahiye thi na, main woh tujhe de dunga" mera darr ab apne antim charan pe pohoch chuka tha.
Usne dheere se apne haath meri gardan pe rakhe.
"Tae, yeh kya...... "
Meri line khatm hone se pehle hi usne mujhe kaske gale se laga liya. Main chaunk sa gaya aur meri bandh aakhein khul gayi. Kuch seconds tak maine usko waapis hug nahi kiya par jab main apne khayalo se bahar nikla tabh maine usko bhi kaske hug kiya.

"I missed you, Jimin" usne softly kaha.

"Ha, jaise toh mujhe tere saath damsharaz khelke bada maza aa raha tha na" maine haske reply kiya.

Usne hug karte hue hi mujhe Jungkook se ki gayi baat, uss raat ke turn of events aur mere baare mein Jungkook ke views ke bataye. Maine bhi use apne dil ki baatein batayi, yeh bataya ki mujhe unn dono ke baare mein pehle hi malum hota toh main kaise unn dono ke liye duniya se lad guzar jaata. Usne yeh sunte hi ek smile di aur gaal pe ek pappi bhi. Main jab woh pappi pochne gaya toh usne mera haath hi jhatka diya.

"Ek baat batau, Kammo ko mat batana" Tae ne low volume mein kaha.

"Accha, bol" main bhi janne ke liye utsukh tha.

"Tu mera favourite sibling hai" usne mere kaan mein bataya.

Yeh sunke mere chehre pe itni badi smile aayi jo shayad pehle kabhi kisiki bhi baat sunke na aayi hogi.

"Ab zyada udd mat. Kya keh raha tha tu? CSK ki jersey😏...... " Tae ne aasmaan pe chadha kar zameen pe fek diya.

"Hehehe, nahi woh toh main bas mazak kar raha tha. Jald hi April fools aane waala haina uski tayyari kar raha hu😅" maine apne aapko defend kiya.

"Rasna bhi pilane waala tha tu toh😏" Tae ko mujhe pareshan karne pe maza aa raha tha.

"Ek kaam kar, kitchen mein ja, fridge khol, paani nikaal, rasna mix nikaal, glass le, sabh mix kar aur khud bana ke pee le" maine seedha bol diya.

Yeh sunte hi mujhe samajh gaya meri toh ab khair nahi. Main turant room ke dusre kone mein bhaaga aur woh bhi mujhe maarne ke liye mere peeche dauda. Maine apna ek takiya uthaya aur defend karne laga toh uske khuraafaati dimaag ke chalte usne room ke kisi kone se ek badbudaar moja uthaya aur meri taraf Ravan waali hasi ke saath badhne laga. Maine usko takiye se de mara toh woh bed pe aur moja zameen pe gir gaya. Uska plan usi par bhaari padh gaya aur main bhi bed pe uske baaju hi late gaya. Iske baad maine usko itni gudgudi ki, ki uski hasi rukhne ka naam hi nahi le rahi thi. Jabh main thak gaya toh usne badla lene ka socha aur mujhe bhi gudgudi karne laga. Finally hum dono thak gaye. Usne meri taraf dekhke smile di aur mere upar haath pair daalke mujhe cuddle karne laga. Maine bhi uske baalo ko pyaar se sehlaya aur hum dono ko waise hi dekhte hi dekhte neend aa gayi.

Author's Note :

I had a constant smile while writing this chapter. Really enjoyed it😊. I would like to know how you felt.