Taehyung ke Jungkook ka Jimin

Ch 14 - Patch-up

Tae's POV:

Jaise mohalle mein gully cricket khelte waqt ball Shukla ji ke gharke kaanch ke tukde tukde kar diya karti thi bilkul waise hi mere dil ke bhi tukde tukde ho gaye the. Main apne hosh gawa baitha tha. Aksar khayalo mein kho jaana meri aadat si bann gayi thi. Mere aage peeche kya ho raha hai iss baat pe mera dhyaan hi na padhta. Iska galat faida uthate hue ma mujhe karele, tinde, shimla mirch khila deti, papa mujhse unki gaadi saaf karwaate, Jimin bhi mujhse baat karne aata par main royal ignore maarke wahase chala jaata.

Jimin se main khafa tha, iss hisaabse toh mera sabse zyada naraaz hone ka haq banta tha. Jimin ke chehre par bhi ek udaasi dikhai diya karti jo  chupane mein woh aksar kamyaab ho jata par apne bhai se woh kaise chupa sakta tha. Jimin kabhi "ek baar bola na dur reh" ki dhamki se darne waalo mein se nahi tha. Jitna dur jaane bolo woh usse double paas aakar meri fikr hone ka ehsaas dilata. 

TV pe "Swaragini" ke current track mein Swara aur Lakshya ke beech darar dekhkar mujhe mere aur Jungkook ke beech ki dooriyaan yaad aati. Ha bhai ha, main gham mein serials dekhne par utar aaya tha. Serial ke "dhum tana nana" ke saath meri heartbeats bhi tezz ho jaati thi. Socha karta tha ki mere life ke ongoing drama se toh better hi hai.

Jungkook mujhe roz call karta tha. Messages ki toh jaise barsaat ho rahi thi. Woh baat alag thi ki main na uske call uthata aur na hi messages ka reply karta. Maine boht dino tak uske messages na padhne ka kada sankalp liya par ek din sabar ka baan toot gaya aur maine saare messages padhne shuru kiye.

Monday, 11 a.m.
Ignore maar (Jungkook) :
Tae...., please mujhe meri baat rakhne ka ek mauka do

11:02 a.m.
Ignore maar (Jungkook) :
Tumhe mere pyaar pe vishwaas karna hoga

Tuesday, 3:00 a.m.
Ignore maar (Jungkook) :
T-Tumhe humariiiii pppehli mulaqaattt yad hai, main pehli dafa mein hi tumseee pyaar kar baitha tha-

5 p.m.
Ignore maar (Jungkook) :
I love you💜💜💜

5:30 p.m.
Ignore maar (Jungkook) :
Maine apne haatho se tumhare liye Maggi🍝 banai hai, tum aaoge?

Wednesday, 9 a.m.
Ignore maar (Jungkook) :
Aaj main tumhare liye vrat rakhne jaa raha hu. Yeh vrat kuwari ladkiyaan apne hone waale pati ke liye rakhti hai. Main rakh raha hu coz main maanta hu ki vrat rakhne ke liye koi gender criteria zaruri nahi hota😊

4 p.m.
Ignore maar (Jungkook) :
Agar tumhe lagta hai ki main itni jaldi tumhara peecha karna bandh kar dunga toh galatfaimi mein ji rahe ho mister. Get out of your imagination, it's not safe in there😜.

Thursday, 11 a.m.
Ignore maar (Jungkook) :
Aaj gharpe koi nahi hai, tumhare liye mere gharka dwaar khula hai😏. Kundi mat khadkao raja, seedha andar aao raja💋💧.

2 p.m.
Ignore maar (Jungkook) :
Ab bas bhi karo, mujhe kitna tang karoge😔. Tumhari yaad satati hai, jiya mein aag lagati hai.

11:30 p.m.
Ignore maar (Jungkook) :
Good Night Tae bear, kabhi alvida na kehna😔💜

Friday, 8 a.m.
Ignore maar (Jungkook) : 
Aaj main 20 dino ke liye Suga bro ke saath nani ke ghar Nagpur ja raha hu. Main aasha karta hu tum mujhse milne Bighit bus adde pe zarur aaoge. bus 4:30 p.m. ki hai.

3 p.m.
Ignore maar (Jungkook) :
Tae, bhale hi tum mujhe bhool jao, main tumhe kabhi nahi bhulunga. Humara first confession, first kiss,  first date sabh kuch mere life mein bohot maiine rakhte hai. Tumse dur hona aur bardasht nahi hota par agar tum yehi chahte ho toh main iss decision ko respect karta hu.

3:15 p.m
Ignore maar (Jungkook) :
Goodbye Tae, I purple you💜 and will always do. Take care😀

Saare messages padhne ke baad maine ghadi check ki. Ghadi mein dophar ke 3:30 baj rahe the. Maine jaldi se meri cycle ki chabi li aur pedal maarta hua full speed mein bus adde ke liye nikal gaya. Waise toh lagbhag 45 minutes lag jaate par maine 30 minutes mein pohochne ka mann banaya. Bhale hi main cycle pe jaa raha tha par maine apna aap ko Dhoom ke John Abraham se kam nahi samjha. Main apni cycle ke saath jis tapri se paas hua waha par Dhoom ka hi gaana baj raha tha jiske chalte mujhme aur josh aaya. Mere dimaag mein sirf ek naam goonj raha tha, "Jungkook". Do ladti hui auntiyon ke beech mein se, sabji waale bhaiyya ke bagalse cut marke aur mere Math sir se nazarein churata hua main apni cycle bhaga le gaya.

Jabh main Bighit bus adde pe pohocha toh waha already bohot bheed thi. Main har ek insaan ki shakal ko ghoorte hue Jungkook ko dhundh raha tha. 15 minute aise hi chale gaye par woh mila hi nahi. Maine fir ek baar ghadi check ki toh 4:15 p.m. ho rahe the. Main panic mode mein chala gaya jiski wajahse mere dimaag mein bure khayal aane lage.

4:30 bajte hi buses aa gayi. Maine saari buses mein jhaakke dekha toh bhi woh nahi mila. Ek ek karke saari buses apne destinations ke liye nikalne lagi, utne mein mera dhyaan ek bus ki window pe padha, Suga headphones laga ke gaane sunn raha tha. Isse mujhe yeh yakeen ho chuka tha ki Jungkook bhi ussi ke baju baitha hai. Maine kayi baar awaaz lagai, chillate chillate mere aasu tak nikal aaye par bus na rukhi aur na hi Suga ne mudke meri taraf dekha. Maine isko apni haar samjhi aur niraash hoke muda toh mujhe kisike rone ki awaaz aayi. Maine apni cycle ka stand lagaya aur aankh uthakar dekha toh pata chala ki Junkook bench pe baithkar futfutkar ro raha tha.

"J-Jungkook"

"T-Taehy-Taehyung" * hichki* "tum? "

Hum dono daudkar ek dusre ke paas gaye aur kaske gale laga liya. Jungkook ke aasu rukhne ka naam hi nahi le rahe the. Woh meri gardan mein apne chehre ko chupakar ro raha tha. Maine bhi apni bheegi hui aankhon ko bandh kiya aur uske baalon ki mannmohak khushboo mein kho gaya. Uska haath mere dil pe tha. Hum dono ko ek dusre ke dil ki dhadkanein mehsoos ho rahi thi.

Usne apne aasuon ko apne T-shirt ki  sleeve se pocha.

"J-Jungkook mujhe laga tum chale gaye."

"T-Tae, tumhe ch-chodhke jaane ki meri himmat nahi hui."

"J-Jungkook, I Love You and I'm sorry ki maine tumko ek baar bhi apni baat rakhne ka mauka nahi diya. Mujhe maaf kardo, please"

"Ssshhh, I love you and will always do. Rona nahi, mujhe rone waale log bilkul nahi pasand"

"Dekho toh kaun bol raha hai. Tum khud kuch der pehle futfutkar ro rahe the"

Jungkook ne mujhe light punch maara aur smile deke fir gale laga liya.

"Jungkook, ab ghar chalte hai aur aaram se  baithke hum iss baat ko discuss karenge. Tum bologe aur main sununga."

"Ok, Tae bear💜, aapka hukum sir aankhon par."