درس السيارة ونزل للكوشة بياخد خبزة و للمرة الخامسة ما حصلش!...
علي : تعرف يا راجل انت خامس واحد توا يا إما نص ساعة واطيب يا معش فيه خبزه اليوم! والعيلة يراجو على نار! نقولك ... عرفت شن ندير، هي سلام عمي سامحني منور ...
ركب السيارة ...
علي : تي تعرف، أهو نوقف ع قهوة الشارع وناخدلهم 10 دجاجات بوجبتهم وخبزتهم ونريح راسي خير ما نروحلهم فاضي
رضوان : وخيرك ما درتهاش من بكري هادي وريحتنا وريحت روحك! خير من التشحويرة هادي...
علي : إي صح والله أني الي ما فكرتش، وخير حضرتك ما فكرتلناش أنت؟ ولا فاضي غر لتلفونك؟ هي سلم ولد عمي إنزل خود دورك توا!!
نزل تكرم وخدي ووصلو للحوش، نادا ع أمه...
علي : رآه لدت على خمسة كوش وما حصلتش جبتلكم وجبات بالخبرة متاعهم ولا فاصوليا ولا هم يحزنون...
وخش للكوجينة، وقال قدام نساوين عمامه والبنات،
علي : والي تبي فاصوليا تشمر دراعها واديرلها خبزة. وشرب مية وطلع المربوعة مع الولاد،،،
عدي : حق قالوا لدت طرابلس كلها ع خاطر خبزة؟ لالا ماتوقعتهاش منك عليوة!
علي : بالله خليني، قلت منبيش صداع النساوين، درت ف روحي مقلب.
عدي : إي قول هكي، غر قالولي علي باله واسع قلتلهم مستحيل خوي ونعرفه ما يدير حاجة إلا عنده فيها مصلحة..
عدنان : أكيد مالا كيف هههه..
لؤي"عمره 4": قاانونكم النثااوين تعانو تعثوو " قالولكم النساوين تعالوا تعشوا" وطلع يجري، مراد " طلع وراه" : غر تعانا نبيك في موضوع بس وين هارب!؟
°
الولاد°: هههههه ، وطلعو للصالة الكبيرة داخل يتعشوا فيها وفي الأخير عدي شد مازن وقاله : قالوا محمود متع كلية التقنية ناويك في منها الدوة؟
عدي : إي جاي يتشعبط يبي يحبكها معاي ومتردد عارف روحه ميقدرنيش! هههه
عدي : إي المفرخ الي زيه يخافوا، أصلا إستغربت، المهم صارت حاجة ديرلي تليفون وماادور شي كله ساهل...
مازن : عارف برو منور، هي نخشوا..
°عند علي لما خش للصالة°
لقيي البنات يحطوا مع الدجاج فاصوليا وخبزة! وقف مصدوم، بعدين دار روحه عادي وتسهوك عليهم :
علي : من الفالحة الي دارت الخبزة؟ .. ردت عليه بنت عمته :
مودة : أني وبنات عمك خالد سماح وسرور وسمر ..
رضوان ضحك وغمز ل علي ، علي دارله الحولة وقال ..
علي : باه يسلم يديكم مش كان درتوها من البداية أرحم!!
مودة : هادا الي صار.
سمر : عادي كله بأجره يا...علي!
وطبعا في من كاسر ودنه ع الخط وشاد ضحكته.
وتعشو ومشت الليلة ع خير..
*هي نشرحو شن صاير شوية :-
أول شي أكيدة إستنتجتوا إن العيلة ملتمة؟ وإستنتاجكم صح!؟
كانت ليلة جمعة وكلهم ملتمين في حوش العيلة، مش قصة تقليد ولا شي! مش كل جمعة يلتموا هما..واليوم قرروا يلتمو باقتراح العمة أحلام أم مودة وغيرها من خوت، طبعا حوش العيلة يعتبر نوعا ما كبير لكن مش أوفر ، يعني فيه 3 ديار نوم ، دار جلوس ومعيشة مررة مرة، مطبخ واسع وعادي يسد أكثر من نفر يطيب فيه وفي المناسبات أحيانا يستعملوا في الي فوق، صالتين كبار مقابلين بعض ومربوعة، وتلاتة حمامات زوز داخل وواحد برا للمربوعة، .. وفوق منه في شقتين للعمام المش متجوزين، والشقتين الي فوق شبه نفس التصميم وكل شقة دور... أما المتجوزين الكبار حياشهم جنب حوش العيلة 3 يفصلهم سور شبه مدايرين شارع بروحهم ههههه...*
وتم البارت الأول ع خير...
وإن شاء الله يعجبكم ♥ رأيكم؟
تعريف الشخصيات في البارت الجاي..
في أمان الله ♡
أنت تقرأ
من تخطيط الحياة
Romanceلما تصير حاجة في حياتنا، سواء إن كانت شينة ولا حلوة.. كلها بسبب ولسبب، كلها عبارة عن خطة للقدر متعنا.. وفي النهاية نقولوا كان ما صارش هكي راهو هدا كله مش صاير توا!.. باللهجة الليبية.. بخط قلمي.. MMAA
