من تخطيط الحياة

part 3 [ العمة جميلة ]

....................................تكملة يوم السبت.................................

كما تجري العادة .. لما يكون أي حد معنداش دوام في أي شي ، يمشي يسأل على جده ، جدته ...

لهذا اليوم ، كان رواد مقعمز يهدرز عليهم ، بينما سرور وسماح يجهزو في صفرة شاهي وقهوة وحلويات في الكوجينة ...

•~~وبما أن سماح كانت نايضة من الصبح بكري فا لما كانت تهدرز هي والبست فريند دارو عناد من لكساد بحكم الزوز نايضين بكري بلا فايدة 😂😂💔~~•

العناد أن من يدير كعك حلقوم اسرع من التاني 😻 هما من قبل يموتو فيه ويديرو فيه ديما ..، والي تخسر تعطي للتانية 50 جني هههه والزوز تحمسو والي خسرت للأصف هي سموحتنا سماح ..
سماح : موتي تو لما نخلص نعطيهملك 💦
منار : لا نبيهم توا دخليش فيكك 😌 شن الفايدة حني بنخلصوا مع بعض! 😒
سماح : احلمي
منار : به سامحتك في 25 و 25 نبيهم توا سماح : ووهه عليا منك باااه نعطيهولك غدوا
منار : لا كان بنراجي لغدوا راه مسامحتكش في 25 أبعتيهم توا رصيد 
سماح : كيف بناخدلك رصيد الساعة 9 صبح هبلتي!؟
منار : أمورك 😐 متخلينيش نعد جميلي عليك توا 😂
سماح : توا خطيبك هو الي مفروض يتصل بيك شن تبي فيهم 25 رصيد
منار : يا أختي نردهولك في عرسك خيرك هكي 😂
سماح : باه 😒 تو ندبرلك وما نبي منك شي ؛-؛ وبري شوفي الكوشة ترااهو الكعك نحرق 😂 ....،

وبينما حطت سماح الكعك في الحفاظة وتفكر كيف بتجيب الرصيد فا قالت ممكن نلقا حد في حوش جدي..، والي صار إن تلاقت مع رواد وعطاته الفلوس وقالتله يمشي بعد ما يشرب شاهي مع الكعك -مش ح تكون حقيرة وتقوله برا هكي من صبح ربي على خاطر صحبتها😂-

  ** ** ** ** ** ** ** ** ** ** ** ** ** ** **

الحاضر :

سرور وسماح يوتو في الشاهي والقهوة والسفرة واتية ..~
وحطوها وكانوا الموجودين اليوم الصبح في حوش الجد ميلاد هما "صالحة، ميلاد، أم عدنان، أم سماح وسرور، رواد" مع سماح وسرور ...،

صالحة : يسلموا يديكم يا بنياتي 💕
سرور، سماح : سلمك اميمة
أم سماح*ماجدة* : صحتين 💕
أم عدنان*منال* : سلمهم♡
ميلاد : من بنية جدها الي دارتلنا الكعك؟ "جدهم جوه يهبل لكن في الغلط مفيش بصارة"

  ** ** ** ** ** ** ** ** ** ** ** ** ** ** ** **

02:30 بعد الظهر

رضوان : ويييييننن بروحك واني تشبحي فيا حيط هني؟
هويدا : لا مش هكي لكن مبيتش انوضك وأنت مع منير..
رضوان : معقولة هويدا؟؟ عيب عليك! أطلعي قدامي تو نجي..،
شوية وروحوا..،
خشو ع العويلة في حوش جدهم ولقوا الغدي واتي وملتمين نفس جماعة الصبح غير زايد عليهم عدي ورهف، وهديل وسمر الي ناضت إمخر 😂😂
سماح : أووو وييداا وأني نقول خيرا الحوش تنور فجأة !
رضوان : من قال مش أني الي نورته!
سماح : لا ما تنورش إلا لما خشت ويدا ! 😻😹
هويدا : سلملي هالسان يا ودي إميمة ساد تضوي الحوش كله الباقي كلكم زايدين 😌
صالحة : ههههه ربي يحفظك ويرعاك بنيتي 💗
وخشو بعدهم بشوية عدنان وهدى.. وإكتملت الدائرة اليوم..وتغدوا وهدرزو وجو عادي متع العائلات الي مع بعض 💕

-قبل الغدي ب شوية-

رواد : سماااح
سماح : نعمم جيت
*عطاها الكروت وفلوسها*
سماح : رواد خودهم بلا كرم زايد
رواد : انتي الي بلا جو زايد خوديهم وخشي
سماح : رواد خودهم راه معش نبعتك!!
رواد : بالله جو العزايز هوا فكيني منه كان نعطيهم لأختي رهف تموت من الفرحة
سماح : أني مش أختك رهف...،
وخشت وهي متعصبة! وهو مستغرب كيف تعصبت هكي؟؟

وجت العشية والي هادا بدي يروح يستريح ..،

-مع الليل-
رواد حكي ل رضوان الي صارله مع سماح ..
رضوان : حمار أنت متعرفش تتصرف
رواد : علاش شن درت أني؟ الي يدير الخير هك يصيرله؟؟
رضوان : أنت بروحك فهمت أن هي تحسابك أنك تحسابها محتاجةة!
رواد : عارف لكن علاش بنحسابها هكي تي مش هدا الموضوع توا تشبحلي أبصر كيف حسيت روحي أشبح شن درت كيف نصالحها؟؟
رضوان : أنت تعرف سماح كل شي اديرله في حدود ! الحق مشعارف معنديش ليك حل، جرب تأسف منها في الأخير أنت ولد عمها مش ح تحقد عليك ولا حاجة زي هكي..،

ورقد رواد وهو يفكر شن المصيبة لي جابها ل روحه 😂
ورقد رضوان وهو يضحك على شخصية سماح وتصرفها 😂
وعلى العملة الي داروها بوه وعمه بو سماح زمان *ح نحكو عليها الصبر*

  ** ** ** ** ** ** ** ** ** ** ** ** ** ** **

-فاتوا الأيام.. ولأن عمتهم جميلة كانت حامل! .. قرروا العائلة السعيدة إنهم ح يمشوا يباركولها..،
••إي عاد باركولها بلا حسد هههه😂😂 والي ماتحبش الصغار معناها إنتي في صفي..•• واليوم هو اليوم الي بيمشوا فيه..

-كانت رهف توتي في روحها مع سماح و سرور وسمر عندهم ..، إتصلوا ب هديل يسألوا :
سرور : شن واتين ولا مزال؟
هديل : إي معش مزال هلبا..
سرور : باه هيا تعالوا!
هديل : بااهي خيرك على نار؟!
سرور : انتي واتية؟؟
هديل : إي من بكري أني هيهي
سرور : خلاص تعالي انتي ضروري خير ما نجبدك من التليفون !

-كلمت هديل خواتها يلحقوها ولبست هديكا العباية فوق لبستها ومشت...

طقطقت ع الباب جت تجري فتحتلها رهف..
هديل : إنتي شني اديري هني؟!
رهف : وين الإحم والدستور وين تحية الاسلام 🌚💔
هديل : هيا بلا جو!
رهف : تي سرور بهدلتني......................، يتبع

----------------------------------
شكراً على "عدم التشجيع" الي خلاني نتحمس جداً ل كتابة فصل جديد..
ماعلينا مش مهم .. ربي يحفظكم غالياتي صحباتي ♡ استعجلت على خاطركم ♡
قراية موفقة للكل 💜