هلا:> اكيد عرفتو كلكم الشخصيات وإن شاء الله حفظتوهم...
-------------------------------------
اليوم صبح السبت ، منهم الي راقد... ومنهم الي يوتي في روحه بيطلع ووقت عليه!!
علي -يصيح- : هووييداا ياا بقررةة مش قلتلك أمس حدديلي السورية!!!
هويدا وهي ناعسة: ما فضيتلكش ورقدت امشي كلم هديل هي نايضة نايضة...
علي : إي يعبى عليك! هديل سيبي الي اديري فيه وتعالي حددي وقت بالله عليك.. -هديل عندها محاضرة اليوم وتوتي في روحها-
عدي : هديل كلميلي رهف شوفيها بتمشي اليوم ولا لا؟
هديل : وووه خيركم عليا اليوم قداش مني أني!! برا كلمها بروحك!
عدي : خيرك انتي ؟
هديل : شي شي باهي تو نكلمها...
عدي : باهي الصبر ربي يصبرني وخلاص..
-بعد ما كملت التحديد-
هديل : صباح الخير رهوفة، عندك اليوم محاضرات؟
رهف : صباح الورد، يا عيني اكيد محاضرة السبت أسوأ محاضرة لازم تكون عندي كيف يولي السبوع فيه سبعة أيام من غيرها!
هديل : هههههه كلنا عندنا مادة حقيرة منحبوش محاضراتها متخافيش 😂😂 اوكي معناها ماشية مع عدي وهدى صح وله؟
رهف : إي أن شاء الله
هديل : تمام سلام ...
هديل : ايه هي سيبني في حالي..
عدي طلع وكالعادة كانت هدى في السيارة، قدم شوية وكانت السيارة قدام حوش عمهم ، شوية وطلعتلهم رهف وركبت:
رهف : صباح النور
عدي : صباح الخير
هدى : من وين بيجي النور والخير صبح يوم السبت؟
رهف : هههههه ، سامحوني عطلتكم..
هدى : لالا اصلا كيف طلعنا..
عدي :رهف بالله كان بتمشي معانا كل سبت وأحد السمستر هدا ابعتيلي فيهم رسالة بش نعرف بتمشي ولا لا..
رهف : تمام أوكي، أي هو التلاث عطلة وباقي الأيام بابا يقدر يوصلني..
عدي : مليحة لما العطلة تجي التلاث، زيك يا هدى
هدى : إي نعرف زي رهف
رهف : ايه ماه نتلاقوا في حوش جدي
حطو هدى في الجامعة وكليتهم هما مش في الجامعة -زي ما تعرفو الزوز طب اسنان *راجعو تعريف الشخصيات * وكلية طب الاسنان الي تبع جامعة طرابلس في صلاح الدين- وكانت طريق الجامعة قريب تولي زحمة ..
عدي : كان طلعنا امخر أكثر من هكي معش نلحقو ع محاضراتنا..
رهف : إي مصعبها زحمة الجامعة تبي بكري ..
وكملو الطريق ساكتين...
-علي طلع هو وهديل بعد عدي للجامعة ...
-عدنان وهويدا مشو ل خدمتهم وتلاقوا مع رضوان ومنير ومهند يهدرزوا فم الباب..
-سرور رفعها سالم، وسمر السبت يوم العطلة متاعها.. قاعدة مع سماح مع هدا ناضوا من الصبح ع دوشة العيلة..
** ** ** ** ** ** ** ** ** **
°عند عدي ورهف لما تلاقوا في الكافيتيريا°
عدي : خديتوا المحاضرة كاملة؟؟
رهف : لا، طلعنا في النصف ساعة الأخيرة ..
عدي : اه ، مزال عندك؟
رهف : لا.
عدي : وين قروبك؟
رهف : وحدة غايبة والتانية تسأل في دكتور..علاش تسأل؟
عدي : مزال عندي محاضرة ومنبيكش تقعدي بروحك
رهف : اه لا متخافش تو نقعد مع البنات لعند ما تكمل..
عدي : تماام مدابيك تقري..لحظة بس
عدي : ايوا، وين انت توا،
عدنان : وين بنكون يعني ؟ إيطاليا؟
عدي : دمك ؟
عدنان : حليب بقرة
عدي : نحسابه زبادي النسيم
عدنان : شن تبي مني
عدي : راك تنسى روح ب أختك هدى علي مش فاضي..
عدنان : عارف
عدي : تم
رهف : هههههه عجبتني متع زبادي النسيم بناخدها..
عدي : نعجبك مالا شني
رهف : لا يا واثق اني قلت عجبتني الكلمة مش انت هههه قداش تبي
عدي : والكلمة طالعة مني ماعندك وين تهربي هههه الي تعطيه باهي
رهف : برا لمحاضرتك من غير تضييع وقت..
عدي : بنمشي بش ميلزنيش الدكتور مش لأنك لزيتيني ع فكرة..
-------------------------
رهف : خيرا هدا وين جيتي
مرام : مبيتش نفسد عليك اللحظة الرومنسية
رهف : بلا برادة هدا عدي يا غبية
مرام : نعرف هدا عدي يا ذكية. شرتع يا زيتونها عدي نور عيونها 💜
رهف : مرام اسكتي بلا برادة ..
مرام : يا عدي راك تزعلها رهوفة دلوعة هلها 👏👏
رهف : مرام ساد اسكتي .....
-ومش وقتهم هكي .. مرام تتسهوك ورهف مرة تضحك ومرة تتعفلق-
** ** ** ** ** ** ** ** ** **
°عند عدنان وهويدا°
عدنان : اسمعي اني ماشي مروح ب هدى وجاي مرات نعطل..
هويدا : تمام متعطلش تعرف اليوم سبت ومدابيا نروح مع الظهر...
عدنان : عارف شوفي خدمة ولا أي حاجة تمشي بيها وقت..
وقعدت هويدا مرة تضيع في وقت ع الكمبيوتر ومرة تخدم عليه..، كسدت ع النت..، وعدنان قاعد ما جاش..، خش عليها رضوان وشاد زوز طواسي قهوة.
هويدا : شكراً ^^
رضوان : عفواً، شديري..
هويدا : مكسدة نراجي في عدنان ونبي نروح..
رضوان : اهاا تو نروحوا كنهادا لحظة حسيتك زي الي طولتي في اسم عدنان هدا كله تضييع وقت هههههه 😂😂 متحسيش في اسمه زاد طول..
هويدا : شوفوا من يتكلم ههههه لا والله حاسة من زمان، لكن الله غالب هو ميبيش من يقوله دندن قدام الناس، يقول تحشموا فيا هههه زعميتا كبر وحركات تو نشوفوا مرته شن ادلعه ..
منير : اوووووووووو اكتشفنا سر عظيم على عدنان صار اسمه دندن
رضوان : سلام قول من رب رحيم..
هويدا : يبي يدير ظهور كوميدي..، لازم منه في يوميات منير..
-قعمزت هويدا شوية مجاملة بعدين ناضت تتكلم في التليفون-
هويدا : ها وينك
عدنان : حاصل في الطريق زحمة كان ما وصلتكش بعد ساعة كلمي رضوان ولا روحي كعابي هي سلام!
هويدا : ووووه ساعة شني هادي الي بنراجيها -اتصلت ب بوها ردت أمها-
هويدا : وين بابا؟
امها*منال*: في الجامع ومخلي تليفونه شن تبي؟
هويدا : لالا شي خلاص..
-رجعت خدت شنطتها-
رضوان : ويين؟
هويدا : وين يعني بنروح!
رضوان : خيرك تردي هكي ومن بيروح بيك!
هويدا : بروحي
رضوان : .................يتبع
** ** ** ** ** ** ** ** ** **
كنت نبي أنزل بعد الامتحانات لكن خطرلي إنزل توا وبدات ع خاطر صاحبتي 💜 متقصريش في الدعم بس 😂 نبصر اصلا ب كيفكم..
كان في أخطاء في الإملاء قولولي لأني منراجعش هلبا وأساسا مش من عادتي نغلط لكن الكيبورد ديما ب عمايله 😂
-رايكم؟
-تحبو البارت قصير ولا طويل؟
-اليوم هدا الي في الرواية مكملش ره 😂
أنت تقرأ
من تخطيط الحياة
Romanceلما تصير حاجة في حياتنا، سواء إن كانت شينة ولا حلوة.. كلها بسبب ولسبب، كلها عبارة عن خطة للقدر متعنا.. وفي النهاية نقولوا كان ما صارش هكي راهو هدا كله مش صاير توا!.. باللهجة الليبية.. بخط قلمي.. MMAA
