بعد شهر
بمنزل لميس
شهد : خير يا طنط حضرتك ناديتيني و طلبتي تقابليني
الام : و الله يا بنتى ما عارفة ابدأ الكلام معاكي ازاى انا و الله مش عارفة اودي وشي منك فين
شهد بدهشة : فى ايه يا طنط قلقتيني
الام : بصي يا بنتي انتى عارفة ان الجواز قسمة و نصيب و كله مكتوب ..... يعنى اصل آآ......
شهد بتوجس : كملى يا طنط ... خير ؟؟؟
الام : بصراحة بقى من غير لف و لا دوران .. شهاب اتقدم للميس
شهد : اييه ؟؟
الام : انا عارفة ان الموضوع صعب عليكي بس انا حبيت انك اول واحدة تعرفي ... حتى قبل ما ابلغ لميس
شهد : و هى لميس لسة معرفتش ؟؟
الام : لسة يا بنتي ... انا قولت ان لازم اقولك ... انتى اقرب واحدة للميس و يهمنى زعلك
صمتت شهد للحظات اضطربت فيها الام قبل ان تهتف
شهد بخبث : الجواز قسمة و نصيب يا ماما و اكيد انا مكرهش للميس الخير ... اتكلى على الله و بلغيها و خلينا نفرح
تحركت الام تحتوي شهد بين ذراعيها قبل ان تردف
الام : ربنا يخليكي يا بنتي و يفرح قلبك زي ما فرحتيني ... عن اذنك بقى اكلم لميس
شهد : اتفضلي يا طنط
تحركت الام نحو غرفة ابنته بينما ظلت شهد بمكانها تنتظر اى اشارة تعلم منها رد فعل الاخرى على هذا الخبر
بغرفة لميس
لميس : حضرتك بتقولي ايه يا ماما ...... شهاب متقدملي
الام : ايوة هو .... ايه اتطرشتي ... ولو على زعل شهد فأنا كلمتها و اطمنت انها مش زعلانة
لميس : شهد ؟؟؟ هى شهد كمان عرفت
الام : انا قولت عشان ميبقاش فى حساسية
لميس : حساسية ايه و بتاع ايه ومين قالك يا ماما انى موافقة اصلاً
الام بغضب : نعم نعم ... يعنى ايه ... وانتى كمان عايزة ترفضي
لميس : ليه ياماما هو انا مش من حقي اقبل او ارفض ..... امال حضرتك بتقوليلي ليه دلوقتي
الام : لا يا حبيبتي انا امك و اعرف مصلحتك اكتر منك و مفيش حد هيبقى مناسب ليكي اكتر من شهاب .... راجل ابن راجل و بيحبك
لميس : بيحبني .... وانتى تعرفي منين انه بيحبني و بعدين انا .... مش مهم انا اكون بحبه
الام : حبك برص ... بت انتى اتلمى و حاسبي على كلامك .. ايه عايزة تتمعشقي فيه قبل الجواز .. اتجننتي ولا ايه ... مش هنقعد نحكي .. بعد بكرة الناس جايين و اديني بلغتك عشان تجهزى ... سلام
أنت تقرأ
و سُلِبت براءتها ( مكتملة )
Randomضغوط ... اهمال ... مقارنات مستمرة ....... بُعد الاهل نتيجة عدم الوعي الكافي ينتج عنه اخطاء إن اصلحها الزمن فلن يمحي آثارها التى ستظل و ان حاولنا طوال سنين العمر اخفائها .... و بالنهاية الضحية تكون "هى" او "هو" غالباً ما نرى الفتاة هى الجانية الوحيد...
