البارت 1...
قصة(أخطاء مراهقة)...
للكاتبة خادمة الامام علي ع....
هلو شلونكم يا متابعيني الطيبين اتمنى لكل ام و بنت و حتى زوجة يقرن هاي القصة حتى يتعلمن و ياخذن عبرة منها
تحياتي للجميع 🤗
ها نسيت من هسه ردت انطيكم علم انو هاي القصة ابد ما بيها احداث يعني احداثها كولش قليلة و لكن صاحبة القصة حبت تنشرها للفائدة و لأخذ العبرة منها لذلك راح تتكلم القصة عن سبب الاخطاء و الاخطاء نفسها و عن حل الاخطاء
و بعد هذي مو قصة و حب و ما اعرف شنو يعني احداثها اكثرها فضفضة يعني تفضفض الكم ووووو
استمتعوا في القراءة🤗
تحياتي للجميع 😊
..................._________________......…………
گعدت جريت التليفون من الميز اللي بصفي و تباوعت و انا فاتحة عين و نص و بعدني نعسانة شفت الساعة بالستة و نص صباحا و فتحت عيوني على كبرهن و هيه گمزة و هيه طفرة من الجرباية اوووف راح اتأخر على الدوام ركضت غسلت وجهي و بدلت ملابسي و بديت احضر الريوك لاهلي خاف يگعدون و خطية امي تعبانة على طاري امي گعدت و شافتني جاي احضر الريوك و اركض اركاض
اسماء (ماما)... ها دميّعه گاعدة اليوم من غبشه شصاير و نشيطة فوگاها
دموع (اني)... صباح الخير ماما جا نسيتي اليوم اول يوم اللي بالدوام
ماما ... ها نسيت يلا راح اصيح لأبوج و اخوانج يجون يتريگون
دموع... اوكي صيحيلهم لمن اصب
و صبيت الريوك و گعدوا اهلي و كعدت اتريك بسرعة بسرعة كلش متحمسة للدوام و فرحانة كملت ريوك صاحلي بابا
محمد (بابا)… تعاي بابا
دموع… اجيت بابا أمرني
بابا… بابا اليوم غير اول يوم الج بالدوام ؟
دموع… اي بابا هسه راح تجي عليه اسيل و نروح سوه
بابا ... بابا اريد اوصيج ديري بالج على نفسج و شدي حيلج السنة انتي سادس و السادس يرادله دراسة و تعب و سهر و اريدج ترفعين راسي و يگولون بنت شيخ محمد مترباية و دارسة و مثقفة
اريد ارفع راسي بيج
دموع… بابا راسك دوم مرفوع و ان شاء الله اكون عند حسن ظنك
بابا... يلا بابا روحي تجهزي لا تتأخرين
ترخصت منه و رحت ابدل ملابسي السنة انا سادس ادبي و وزاري لازم اشد حيلي و اطلع معدل زين حتى ادخل جامعة بيها خير كملت تبديل طبعاً هاي السنة اشتريت بدلة جديدة ويه بدلة العام صارن عندي اثنين و خصرتها عليه لأن انا كلش ضعيفة و قصيرة ما جنه عمري 19 تگول عمري 12 و كلها تگلي انتي نفس شكلج من انتي صغيرة ما تتغيرين المهم خليت البدلة طويله تسح بالگاع شوية لان ما احب البدلات يصيرن قصار عليه واشتريت حذاء وجنطة جديدة يعني كلشي جديد و شوي و صاحتلي امي تگول اجت اسيل و طلعت بسرعة و شفت اسوله خيتي تحاضنا انا وياها حيل و ودعت امي و مشينه
أنت تقرأ
أخطاء مراهقة (اعلان) قريبا
ChickLitوحيده بشكل يليق بي ، كالسماء اللتي تحضن الجميع ، ولا احد يحتضنها قصة حقيقية ل فتاة بسن المراهقة تعاني احساس الوحده و تمر بأوقات كئيبة لتقع بمشاكل و تعمل خطا و ذنب لكن هل سيغتفر هذه الذنب و الخطأ خلينه نشوف احبت هذي المراهقة ان تروي قصتها لتكون عبرة...
