...Toh ab tak ki kahaani yeh hai ki humare Aarav sahab kuch jayada hi jaldi school aa pohunche lekin unke sath Mehak Aggarwal bhi aa pohunchi. Ab scene yeh hai ki dono ek hi time pe ek hi sath ek hi class me the magar dikkat yeh thi ki Aarav Mehak se baat kaise kare. Dil toh bahut kar raha tha Aarav ka ki bas kisi tarah Mehak se baat ho jaye magar apne Aarav ki kismat utni bhi saral (easy) kaha. Itni jaldi kaha kaam banne wala tha tabhi 15 minute baad St. Peter Higher Secondary ke NCC Commander aur humare Aarav ke dost Pankaj Sabarwal bhi waha aa pohunche aur andar ka mahool dekh kar hairaan reh gaye ...sabse pehli hairaani toh yeh thi ki Aarav itni jaldi yaha kar kya raha hai aur dusri hairaani yeh ki Aarav aur Mehak dono ek sath class room mein the. Ab iska jawab toh sirf Aarav hi de skta tha. Toh Pankaj ne Aarav ki taraf ishaara kiya toh pucha ki kya baat hai toh Aarav ne bhi sar hila kar keh diya ki koi baat nahi.
Phir Aarav aur Pankaj dono class ke bahar gaye aur Pankaj ne Aarav se pucha ki aaj itna jaldi school kaise aa gaya toh Aarav ne kaha...
Pankaj: kya baat hai aaj badi jaldi school aa gaya tu?
Aarav: Koi baat nahi hai yaar bas aaj jaldi uth gaya toh jaldi taiyaar hoke aa gaya
Pankaj: Han woh sab toh theek hai par yeh Mehak bhi jaldi aa gayi...sach bata tum dono kya kuch chal toh nahi raha na...waise bhi tu kal uski bahut baat kar raha tha....
Aarav: arrey yaar kuch nahi aisa aur meri usse abhi tak baat bhi nahi hui toh kya chalega.
Pankaj: Toh phir woh itni jaldi kaise aa gyi aaj.
Aarav: Arrey toh kya pata roz jaldi aati ho aur tujhe kaise pata ki woh roz jaldi nahi aati aur uska shod tu apna bata, Tu kaise aaj itna jaldi aa gaya?
Pankaj: Bhai mein roz hi jaldi aata hu, NCC commander hu aana padta hai aur usko bhi mein aaj hi jaldi aate dekh raha hu aur tujhe bhi.
Aarav: hmmm!!
Pankaj: aur uska toh mujhe samaj aata hai ki woh toh ladki hai isiliye jaldi aa gayi par tu toh ladka hai aur iss school me NCC walo ko shod kar koi ladka jaldi school nahi aata ...tu pehla hai
Aarav: kya yaar kuch bhi bol raha hai... Acha ek baat bata yeh Mehak ki koi dost nahi bani kya ab tak yaha pe?
Pankaj: Ab yeh mujhe kaise pata hoga...Mujhe thodi bataya hai usne ki uski dosti hui yan nahi
Aarav: Han toh jaa na puch ke aa na please!
Pankaj: Pagal ho gaya hai kya...kya kuch bhi behki behki baatein kar raha hai.
Aarav: Arrey jaa na yar please...tu toh NCC commander hai
Pankaj: Han toh...NCC commander hu toh kya hua aur waise bhi bhai iss school me NCC me sirf ladke hi hain mereko ladkiyon se baat karne ke liye koi special training nahi mili.
Aarav(in tension): Toh ab kaise pata chalega...
Pankaj: Ek minute bhai... Tujhe pata karke kya karna hai.
Aarav aur Pankaj ki baaton ka silsila jaari hi tha ki tabhi Mehak class se bahar aati hai aur kehti hai
Mehak: Hey! Apke pass biology ki last classes ke notes hain
Pankaj: Han mere pass hai kyunki mein isi school se hu. Toh jab pre-medical classes hui thi toh maine woh attend ki thi... Kal mein notes le aaunga
Mehak: Thank you so much
Pankaj: welcome
Aur itna keh kar Mehak wapis class mein chali jaati hai. Ab yaha dusri aur Aarav ki aankhein badi ho chuki thi ... Aur ho bhi kyun na aakhirkaar Mehak aur Aarav ke beech me bas kuch feet ka hi faasla (distance) tha lekin Aarav ke liye yeh bhi badi baat thi. Inn sab ke baad Aarav Pankaj se kehta hai...
Aarav: Bhai please kal notes yaad se le aana
Pankaj: Kyun tujhe bhi chahiye kya?
Aarav: Nahi mere liye nahi mein Mehak ki baat kar raha hu.
Pankaj: Han bhai usne jab kaha na ki notes le aana tab sunn liya tha maine.
Aarav: Han bas bhool mat jaana
Yaha tak toh theek hai...Aarav ko lag rha tha ki ab uske pass kum se kum ek wajah toh hai Mehak se baat aage badhane ki. Par abb Aarav iss soch mein tha ki aage kya kiya jaaye tabhie Ronit aake Pankaj aur Aarav ko batata hai ki kuch hi dino baad school ki camping shuru hone wali hai. Ab medical walo ki camping junglo ke siwa aur kaha ho sakti hai bas toh phir Aarav bhi man-hi-man mein sochne laga tha ki bas ab kisi tarah school camping me Mehak aur woh ek hi team me nominate ho jayein. Khair yeh toh baad ki baat hai abhi toh sidha rukh karte hain hum Aarav ke rent wale apartment me jaha woh iss soch mein duba hua hai ki aakhir Mehak se baat ki shuruwat kare toh kare kaise!
Tabhie Aarav Pankaj ko phone lagaata hai aur kehta hai...
Aarav: Hello Pankaj! mujhe tujhse ek kaam tha
Pankaj: Itni raat ko kya kaam aa pada tujhe?
Aarav: Jayada kuch nahi bas tu please kal class attend mat karna
Pankaj: Kya!!! Tu neend mein toh nahi hai na kya keh raha hai yeh!
Aarav: Arrey sunn toh...
Pankaj: Han bol
Aarav: dekh kal tu school aana aur jo notes terese Mehak ne mangwaye hain woh mujhe handover kar dena aur tu NCC classes chale jaana bas class attend mat karna
Pankaj: ohhh! toh yeh sab planning Mehak ke liye ho rahi hai
Aarav: Tu bas yeh bata ki tu karega yan nahi?
Pankaj: Han woh sab toh theek hai par isse hoga kya?
Aarav: Hoga yeh ki kal jab tu class me Mehak ko nahi dikhega toh woh mujhse aake puchegi tere baare mein ki tu school aaya hai yan nahi toh mein usse keh dunga ki tu nahi aaya par tune notes mujhe de diye hain usko dene ke liye bas phir isse meri aur Mehak ki baat cheet shuru o jayegi.
Pankaj: Toh yeh sab tu usse baat karne ke liye kar raha hai...Par isse acha tu sidhe-sidhe (direct) usse baat kar le
Aarav: Arrey yar direct usse kaise baat shuru karu agar karne jaunga toh kahin woh mujhe cheap character ka banda na samaj le.
Pankaj: Tu bhi na... Acha theek hai kal mein tujhe notes de dunga ab mujhe neend aa rahi hain sone de mujhe jaldi school jaana hota hai.
Aarav: Aur han ek baat aur bhai
Pankaj: Ab aur kya bacha hai?
Aarav: Dekh yeh baat sirf mere aur tere bich mein hi rehni chahiye...kisi ko batana mat please
Pankaj: nahi bataunga tu tension mat le....chal bye
Aarav: byeee!
Pankaj ne Aarav se keh toh diya tha ki tension mat le par yaha Aarav iss khaayal mein dubaa hua tha ki ab kal kya hog aur kaise hoga aur anjaam kaisa hoga.
Yehi hota hai jab koi aapko dil se pasand aane lagta hai...Raat ki neend aur Din ka chain sab gaayab ho jaata hai. Aapke sath bhi kabhie na kabhie aisa hua hi hoga.
Khair yaha Aarav to so gaya iss intezaar mein ki kal uski baat Mehak se shuru ho jayegi ab bas subha ka intezaar tha...Aage kya hoga Aarav ke sath hum aur aap milke sunenge agle part yaani Part:4 mein. Tab tak ke liye sochiye kya hota hai aage. //
(To Be Continued...)
आप पढ़ रहे हैं
FIRST TRAGEDY
Short Story'FIRST TRAGEDY' is a story of a High School Guy who fell in love with a girl of his class. He was always a bit confused if he's in love or it's just his attraction towards her. Find out in the story for more.
