KALKALPAS TI MIDTERM EXAMS. Nalukay ti aangsan dagiti estudiante. Nawayadan nga agpallailang kalpasan ti no mano a lawas a repaso ken no mano aldaw a panagibuddak kadagiti memoriado a sungbat kadagiti saulado a saludsod iti test paper.
Paborito a pagpallailangan dagiti estudiante ti nalawa a parke iti Capitol compound ti Nueva Vizcaya. Ayuyang pay dagiti agiinnarem, dagiti agaayan-ayat, aglalo no kastoy a mumalem ken sumipnget.
Adu a paris ti nakalupisak iti nalamuyot a karuotan iti sirok dagiti aruo iti asideg dagiti pussuak iti dayta nga apagsipnget. Nairaman da Joyce ken Roland kadagita a paris.
“Kayatko la a makapaglinnawagta, Joyce,” kinuna ni Roland. “Tapno dimo met, a, ibagbaga a sadistaak. Ta maas-asianak met ket kenka. Dika rumbeng nga agkastakasta gapu la kaniak. Nadagsen met ket a guilt para kaniak dayta nga ar-aramidem, tapno ammo la’ng.”
“Ngamin ket dinak awaten...” Makalulua manen ni Joyce. Kasla manglunlunag-rikna ti perreng dagiti matana. “Dinak kayat nga awaten. Iti dayta a siribmo, nagsimple ken naglaka la koma maawatannak, Roland...”
Nagulimek ni Roland. Kitkitaenna dagiti asmang iti aglawlawda. Nakalalailo dagiti asmang nga agbuybuya kadagiti agdudumat’ silnag-marisna a pussuak.
“Dimo la ngamin awaten nga ay-ayatenka, Roland. Nga ay-ayatenka la ngamin unay isu a kastoyak. Ket isu a kastoyak, isu a napingetak, ta ammok nga ay-ayatennak met.”
Immanges iti nauneg ni Roland sa nagsao: “Maawatanka met ket, Joyce. Wen, mamatiak nga ay-ayatennak. Ket patiem met nga ay-ayatenka. Ania pay la ngarud ti kayatmo a maaramid?”
“Sawem, ipakitam, ipaneknekmo nga ay-ayatennak met, Roland. Dinak a liklikan. Dinak bay-an nga agkastoy.”
Immanges manen iti nauneg ni Roland. “Dimo ngamin mautob no apay a likliklikanka. Kayatko koma a maamirismo. Tapno awan koman ti kastoy a mapaspasamak.”
Di nagtagari ni Joyce. Matmatmatanna ni Roland a nakabaw-ing ti rupana iti ayan dagiti pussuak.
“Awan maaramidak no di liklikanka, Joyce. Ngamin ket dinak met inggaan a sursuroten. Maragsakanak koma ketdi ta kamkamatennak ti babai, ar-armennak ti maysa a babai. Ngem aniat’ ganasko? Saanak met a mananggundaway. Agingga a mabalin, nataknengak koma latta a lalaki.”
“Roland...”
“Respetarek ti karbengam nga agayat ken ti kalintegam kas babai, Joyce. Ngem respetarem met koma ngamin ti karbengak nga agayat. Respetarem met koma ngamin ti kalintegak kas lalaki.”
Nakaul-ulimek ni Joyce. Nakadumog.
“Dika ngamin makatuttutor, Joyce. Binay-am latta koma ti panawen ken gundaway. Uray ta ammom metten. Nakasiguradokan no bilang ania. Ken ammom met a nasamsam-it ti natutor ti luomna a bunga. Ammom met a napimpintas ti ukradna ti rosas ken naay-ayamuom daytoy no di nakettel a busel.”
Intangwa ni Joyce ti rupana. Inisemanna ni Roland. Natutor, nakasamsam-it nga isem a lallalo a bimmannelan ti singin a kallidna.
“Maawatamon, Joyce?”
“Agaluadka, Roland, a. Sige, sika ngarud ti agarem ta parigatenka man met. Liklikanka man met!”
“Uray man. Kaykayatko met no kua.” Iniseman ni Roland. Nakasusuabe nga isem. “Uray ta ammok metten.”
“Saur!” Simpeg ti kuddot ni Joyce iti bakrang ni Roland. Tiniliw ni Roland ti ima ni Joyce ket dinan pinalusposan daytoy.
<3<3<3 END <3<3<3
BINABASA MO ANG
Ta Ay-ayatenka La Ngamin (A Campus Love Story in the 1990s)
Romansa"Dinak ngamin maawatan.... Awan kaniak ti kinataraki wenno kinaguapo. Ti babai koma ket saan nga agdepende wenno paadipen iti kinaguapo wenno kina-macho ti lalaki."
