نصيبي (حقيقة) منقولة عن الكاتبة ميرو الشريف

حلقة3

رديت بعيوني لأول الرسالة نقرأ فيها حرف حرف لعلئ وعسى اني أخطأت في حرف أو كلمة ومن دون مانحس فاتو نص ساعه وإني نقرأ ودموعي غازيات الشاشة !
صكرت شاشة تلفون وضميت الغطا عليا وبديت كالعاده نبكي بلا صوت أو بالأصح صوتي مش قادرة نطلعه
ماما طقت خشت شبحتني امغمضه عيوني بس دموعي ينزلو قعمزت على طرف سرير بدت تمسحلي على شعري وتقرالي في قرأن وقت حسيت بقربها عليا قمت راسي وحطيته في غمرها .
ماما:من كسرلك قلبك يابنيتي والله ناكله بسنوني!
رفعت راسي شبحتلها وماقدرتش نحكي
ماما ضمتني لغمرها وتبكي معاي :بوك الشهرين ماقدر يرقدهم !اني وبوك متاكدين سبب أهيا الحالة أذكر لأن الراجل مايديرش العمله أهيا _بوك كل ليلة يقولي بنتي الي برموشي امغمض عليها وخايفه في يوم  تلتقط في شي يطيحها ديما وراها_بس الكاينه الكبيرة قلبها ايقولي قلب بنتي بنتي كسرت ثقتي حنتلي رجولتي
اني نسمعلها ونخنقت وبديت نبكي تاني وصوتي شويا شويا يعلى وماما كل مايعلى صوت بكاي تزيد تعلى صوتها في القرآن لين اني دهشت ورقدت من البكي غطتني وناضت خدت تلفوني يمكن تلقى شي أو رأس خيط!
شبحت رسالة واتس من صاحبتي دخلت عليها وكانت عبارة عن حبيبي كيف حالك اليوم
طلعت منها وكيف بتحط التلفون شبحت رسالة مهيب قرتها وطلعت.
انس:معرفتوش خيرها !البنت بدت ريشة هاذي مش حالة.
ماما تسخن في السحور أختك مضايقة
انس:مضايقة أي ضيق يوصلها للدرجه أهيا والله والله لو يطلع الي بالي بالك لما نقتلها
ماما عيطت :شن تقتل! اني نفصعلك رقبتك ونقص لسانك الي تلعلعلي بيه !أختك لو تمسها نهارك
انس:لو من قبل سادة الحبل رآه مش هذا حالنا!
خلوها هكي باهي العيلة بدت تعزق في الكلام اهني وغادي  واتقطف في الكلام وإني نصفق

بابا خش :الله الله سيد انس صوتك طالع.
انس:يابوي
بابا بصوت حازم:وقت تدفني بي ايديك صوتك طلعه في حوشي وايدك تمدها على خواتك نقصهالك من منبتها!
انس:ماكان جبتو ولاد رآهو اشرفنا
بابا:أهو جبت ولد ترا شن عطاني ترا اشبحلي وقول _ربي عطاني زوز بنات الوحدة فيهم بي مية راجل !والكلام الي تقطف فيه وقلت عليه لي أمك بالي بالك!مستحيل فيه من ربعه_حنين لو نحطه وسط الف راجل مامنلها
انس تلفت لي ماما:عاجبك الكلام اهوا
بابا:برا من هني وقت تعقل تعال تكلم
انس خدي مفتاح سيارته وطلع متعلق!
ماما:ياعلي
بابا شيرلها بي أيده تسكت:سامحينى ياغالية بس مش قادر نسمع حتى حرف.
ماما طفت على السحور وطلعت وراه
بابا فتح باب الدار عليا ولقاني راقدة ومشي يصلي

____________________
عبدو طق على دار مهيب:واعي
مهيب شبحله وحط تلفون من ايده:أي خير شن فيه؟
عبدو قعمز:خيرك فرحان
مهيب ضحك:شكلها شدت في بنية
عبدو تمدد وحط ظهرا على مسند السرير:باهي على بركة الله _أهم شي انت رأيدها
مهيب:أي رأيدها اكيد زابطها حتى انت
عبدو خدي تلفون ورد يتصل بيا بس مزال فالحظر شبح لمهيب بي طرف عينه:من هي!من العيلة وله كيف؟
مهيب:حنين بنت أخت خالد
عبدو شبحله وملامح وجه اتغيرو360د:من هي؟
مهيب:حنين_خيرك بنت مشا
عبدو قاطعا وناض:تعرف لو تفتح الموضوع اهوا مايصيرش طيب
مهيب:تكلم معاي باهي خير
عبدو:لانتكلم باهي لاهم_نسمع حاكي عليها نص كلمة والله ماتاكلها غير في روحك
طلع من الدار جي عبدو قدام بوه
عمي فرج:شن لدخلك الحوش انت!
عبدو:جاي بناخدبضاعتي وطالع

عمي فرج:الدفع بعد غدوة_بعد مايتم الدفع تعال
عبدو شبحله وسكت
عمي فرج:ماتشبحليش هكي درتها بي ايديك حلها بي سنونك.
عبدو خش لدار لم دبشه ومشي لصاحبه
شري شفره وبدي يتصل بيا ومافيش رد
بعد مايقارب 30مكالمه
فتحت تلفوني شبحت ضي تلفون والع_مديت أيدي وجبدته
ألقيت رساله 5دقائق ماترديش نجي لبوك
وقفت على ركبيه وحطيت على الرقم وايديا الزوز يرعشو وطلبت الرقم لاني عارفه ومتاكدة انه عبدو💔

عبدو نازل من العمارة ابتاع صاحبه بيجي لحوشنا شرين النقال وكنت اني _فتح السيارة متاعه وركب
عبدو بتعفليق:معاش تعاودي أمهم الحركات اهما
أسبوعين نجري وراك وانتي مش فاهمتيني مش حاسه بيا
اني غمضت عيوني وشديت في الغطي متاعي وقبضت ايدي_مستاحشه صوته وحنيته وعصبيته عليا
عبدو:نحكي معااااااك حنين اني
اني بصوت مبحوح الله لايسامحك!الله يلوعك الله يكسرك في الغالي عليك
صكرت عليه فتحت كفر تلفوني برعشه مزال متواصله في ايدي_نحيت الشفرة وكسرتها _كيف وقفت على رجليا حاسه بصعوبه لاني مانتحركش هلبه _طحت رجليا مش قايمني_بديت نزحف تخيلو! أي حب يوصل الناس لدرجه أهيا!
سمعت ماما صوت في داري جت وشهقت وقت شبحتني بالحالة اهيا !نادت بابا وسندوني عليهم الزوز
اني حطيت راسي على كتف ماما:بندوش ماما دوشيني!
ماما تبوس فيا على راسي:حاضر ياقلب أمك إنتي !ارجعيلي كيف قبل وتاخدي عويناتي.
ابتسمت بصعوبة وخشيت يكرم القارئ قعمزت على الكرسي وماما دوشتلي وكل قطرة أمية نتمنى تنحي ولو ذرة من حبي لعبدو 💔
كملتلي ماما ساعدتني في اللبس وقعمزت على الوطا لامه رجليا وبابا يمسحلي في شعري ويجففلي فيه!
حبيته عبدو لاني شفت حنية بابا شفت خوف خوي معاه حنين ماما عليا💘

بعد مرور ثلاث اسابيع
يوم عيد الفطر ماطلعتش من الحوش ولامشيت لعيلت جدي ولا حكيت مع حد وتلفوني ناسيته
مرو زوز يومين تانيات مشيت لحوش جدي إجباري من ماما
خالتي:مبروك عليك حنونة
اني قمت راسي:شني
خالتي :أمك قالت تقدملك مهيب
اني رفعت راسي لماما طول:لامفيش منه الكلام هذا
ماما:أي ماهو نسيت نخبرك!
اني:شن في!خيره وجك تغير
ماما شدت ايديها في بعضهم:بصراحه ليلة العيد جي مهيب وقف على بوك!
اني جسمي رعش:اااءءاي !
ماما:وبوك قال سواء وافقتي أو رفضتي بيعطيك.
عشان تنسي الي كنتي رايدتيه
اني جتني هسترية وبديت نضحك !وبيني وبين روحي!ناخد هو عبدو !عبدو حبيبي يولي سلفي وعم صغاري الراجل الي غزا قلبي بي وأنوثه متاعي برجولته يبدأ حرام لو نفكر فيه أو نشبحله.
خالتي جبدتني من وسطهم:تبدي هبله لو تعارضي كأنك بتنسي انسي قدامه احرقيله قلبه زي ماحرقلك قلبك
اني بي ضحكة :اني مش رخيصة عشان نفكر يخش لقلبي حد غير عبدو يابال خوه !لو هانت عليه أيامنا وسنينا اني لا_اني لي هالحظة شريته !اني رايدته اني ياخالتي نبيه!
خالتي حطت أيدها على فمي:اسكتي الناس يسمعو فيك
اني دفيت ايد خالتي:اني مش هامني الناس _اني نشبح في العالم كله عبدو مش الناس.
فجأة خش علينا خالي
خالتي انصدمت:اا
خالي يشبحلي وسكت!
خالتي تبتسم:شن لابس العربي وين كنت!
خالي:كنت في فاتحة عبدو ولد فرج!

فاتحة عبدو ولد فرج_فاتحة عبدو ولد فرج!

يتبع