نصيبي (حقيقة) منقولة عن الكاتبة ميرو الشريف

حلقة 5

يوم حفلة عبدو
ماما تشبحلي:وعلاش ماتمشيش!  هم عطو كلمة وبس !وبعدين عمتك حلفت نجيبك والناس في حالتين بيتكلمو!
انس:بري وفكينا من وجع الرأس
اني نضت وقفت قدام المراية وشديت تلفوني وشبحت لس5:00 المفروض في الوقت أهو مقعمزة اني ونعدل في روحي بدالها! هي خدت قلبي وحياتي ونصيبي!
خالتي فتحت الباب عليا:هي شن توتي في روحك.
اني:أي اصلا من الاول نبيه ينزف قدامي وفي الحالتين الأيام الجاية بيبدا وجهي في وجهه.
خالتي:باهي غير قولي شن بتلبسي
اني:مانعلمش غير خليني نتم شعري قبل
استشورت شعري وقمته فوق ونزلت قداش خصلة منه_وجبدت قفطاني سكري مايل لذهبي قصير وايديه كاملات _ومكيجت على الخفيف.
قعمزت على السرير نلبس في كندرتي
خشت ماما مبتسمة:ماشاء الله زينة
خالتي تلبس في عبايتها وتضحك:هي زينة والزين خداته.
اني شبحتلها بطرف عيني ونضت نلبس في عبايتي ووشاحي وقمت شنطي وطلعت
طول الطريق نرفع في رأسي وقابضة أيدي من القهر _قلبي يحرق فيا ونار والعه فيا مش طايقة حد غمضت عيوني وبديت نتخايل هيا بتبدا معاه من اليوم 24س  !بتشبحه وقت ينوض ويرقد_بترقد في حضنه! وبيلعبلها بي شعرها! بيبدا راجل غيري وبنبدا مرت خوه! وصلنا للقاعه نزلنا ونشبح في الدنيا كلها زوز
سندس جت تغمرتني :اقليبي
اني تغمرتها وبديت نبكي مش عارفه شن درت اني!كيف بكيت يمكن لاني بجد كنت محتاجه حد يحضني!
سندس تضحك عليا:سلمها الفرحانه بي سلفها
مشيت سلمت على عمتي(ملاحظة الي بيقولو كيف خاطبها وجت للعرس هو مخطبهاش مجرد جي لبوها هو وبوه وعيلته وقالو رايدينها وكان في نصيب بعد فرح خوه نعطو فيها كلمه وبس)
قعمزنا في أول طاولة وبدت الصالة تزحم وإني وقتها عقلي وقلبي مش معاي نشبح لديكور هذا الديكور الي كان خاطري نديره ونتكلم عليه لعبدو نفسه بالزبط لدرجة اهيا رخيصة عليك!
خالتي تشبحلي وساكته! وسندس اتلود اتلود وتجي بدو الزمزامات يضربو بي ينشطو الجو شوية _نضت لقيت روحي نرقص فيا حرارة وسخونه ونار بنطفيها بي اي شي.
بعدين نزلت وكيف بنقعمز بدت الإضاءة الخفيفة! الصالة كلها اضواءها على باب وخشت ميسم كانت تمشي بثقة والابتسامة مافارقتش وجهه!
صدمتي كبيرة هاذي ميسم بنت خالته الي يقولي عليها_ تلتصق عليا هلبه! قعمزت على الكرسي وإني مرتخية مالياش جهد لي شي.
ماما شبحتلي ومدتلي كلينكس :الطف عليك خيرهم ولو عيونك حمر هكي ؟بري اغسليهم
اني قمت المنديل وقمت تلفوني وفتحت الكاميرا وبديت نسقم في مكياجي نسمح من هني ونوازي من هني حطيت رجل على رجل وبديت نشبحلها ثاني زعما دارية انك كاسرة قلب بنت !أول مرة نحسد بنت وكنتي انتي!ياحظك الليلة ليلتك مع عبدو !كيف بترقدو وانتو مشعلين نيران وراكم!
وبدون مانحس بالوقت بدا _باب الصالة صكروه والي تجري تلبس ومش لاهين بالعروسة
سندس جتني تجري :بالله عليك حنونه بنطلع انشوف عبدو بري نزليلها الطرحه بس!
اني نصدمت واتبكشت لاتجمدت! شيرت على روحي وبصوت غصة اني!
سندس مشت وتلفتت عليا :أي أي
نضت والوطي مش شايلتني نركب والدنيا قدامي زوز_ ركبت وقفت قدامها وبديت نشبحلها وساكته
ميسم:سلمها ياربي بالله ساعديني هههههه نسوني