ابي والغزلان

المقدمة

ها انا اسير بسرعه بطرقات الظلام كغزال شارد من قطيع مفترس حاملة معي جراح من ضبع غادر حاول نهش لحمي
اسرع ودقات قلبي تشير لمن تركتهم خلفي
أسمع من بعيد صراخ وأنين

استدير لأرى غزلان ابي بخطر وهن يحاولن الفرار مثلي توقفت لأرى بترقب ماذا سيحصل واذا بأبي يقف بوجه القطيع ليحتضن غزلانه ويقول لن اترك احد يأذيكم
ويتلقى الهجوم بدل عنهن لأرجع بسرعه لجواره لكي احميه
ولكن هل جراحي ستسمح لي بلوصول ؟

سندس :كله من وراج يمه زوجتيني واحد فكر ابن فكر وفوكاها حامل بهاي الصخمانه
ام سندس :ليش يمه شو الرجال ورده وحباب واخلاقه المنطقه كلها تحلف بيها

سندس : وشسوي بأخلاقه توكلني تشربني مكافي متحمله الفكر والضيم واني اشوف حمويني ونسوانهم يلعبون بلفلوس لعب اني ادري هيج راح انضرب بوري واتزوجه الكحف عبالي مثل اخوته بس اااخ لو بس يرجع الوكت لا اتفل بوجهه واطرده

ليش ولج من طيح الله حظج هيج رجال ينحط على الراس وهو ممقصر شو يجيب ويحط بحضنج
سندس : بله متسكتين يمه لا وروح ابويه احرك روحي تره كوه متحملة كاعده بخرابه وعيالي بصفي بيتهم شكبره ويخبل ولا واحد كال خلي نساعد اخونا خلي ننطي بس يعرفون يترسون نسوانهم ذهب وفلوس واني باقيه اتحصر وشيجيب من عربانه اللبلبي متسكتين بله بس ماابقى هيج لازم اغير حياتي

ام سندس : انتي تخبلتي من الحباله اعرف سوالفج والشيطان يلعب براسج ومكعد تحمدين ربج
سندس : جم مره ردت اسقطها ومسقطت حظي الاسود ادري بيها لزكت جلبت

وشمدريج بنيه
سندس : اعرف مثل خواتها نفس العلامات اني كلت بلكت اخلف اخ لحسام مكافي سطرت تلاثه وهاج الرابعه بلطريق كون تموت واخلص
ام سندس : لا اله الا الله انتي فد وحده متخافين الله وممقدره النعمه البيدج
سندس : اهوو اروح اولي للمهجوم قبل متبدين سوالفج ودوخيني

كعد امشي وعمي لازم ايدي وين راح يوديني عمري ١٠ سنوات طفله كل همي شون العب وما اقرا امتحان باجر واكل كاكاو بدون متضربني ماما وتعاقبني لان وصخت ملابسي اباوع للدنيا بعين الطفوله والبرائه والحياه الورديه لازمه ايده واني كلي ثقه هذا مثل بابا غير اخوه يباوع عليه ويبتسم وبأيدي الثانيه نستله هو انطانياها وكال تعالي ويايه طبينا لبيتهم الجنت دوم اباوع عليه وابقى صافنه من جماله واكول هم يجي يوم ويصير عدنا بيت مثله

شنو الصار اني وين

بابا تعالي اني غزالتك سليل بنتك حبيبتك اول فرحتك تعالي بابا

ابوي ـــــــــــ
ابوي اشكد حنون ايفيض وجدان وابوي اصحابه تتباها ابصفاتــــه
كريم ايجود حتى ابلگمة اعشاه وقف للناس ناذر كل حياتــــــــــه
اذا يسمع طفل فد يوم جوعان توگف لگمته ابطارف لهاتـــــــه
من يوگف يصلي اتفيضه الدموع اوتصير ادموعه سجادة صلاتـه
يشماغه بخت وعگاله شارات صر اهموم ربعه ابسد عباتــــــه
شريعه تشع امل وشراع بالريح لجل الناس ناكر دوم ذاتـــــــــه
وابوي الغيره عنده اجروف نهران منها اصحابه تغرف والشماتـــــه
سمح يلگه العذر لليخطي وياه عفه اوحلمه چرچوبة سماتــــه
ماسد باب جوده ابشحة الجود عنوان الكرم كل ذكرياتــــــه
وابوي الخير بيده
اشيكرم ايزود مثل حري العراق اومي فراته

مساء الـ🥀ـورد والهنا لأحلى المتابعين ورجعت وياكم بقصه جديده بعنوان (ابي والغزلان ) قصه ذات طابع اجتماعي رومانسي ويناقش الكثير من القضايا قد يكون اغلبها جرئ ولكن جداً مهم تسليط الضوء على هكذا قضايا واكيد راح تعيشون معي اجواء منوعه ومشاعر مختلفه ولتنسون القفلات الحلوه 😁 قريباً ...
انتظروني 🌹🌹

تحياتي لًلًـّــ💎ــجٌٓمٍَُٓيِّعَْٓ