هذا زمااااان كان في راجل واعر واعر متزوج مرا مازيها مرا في كل شي !!! الزين والبهاوة ووسعة البال والحكمة والكرم ... مرا سميت غالية امسكينة اتخاف من راجلها ومن واعارته !!! اماليها يسكونوا في البر وهيا في شارع من شوارع لمدينة في زنيقة مش طويلة جيرانها ايحبوها ما يرضوا فيها حاجة وساخفين عليها من اواعارت راجلها ... عندها منه زوز ابنيات على روس بعضهم اوحيدة عمرها اربعة والتانية تلاتة ... تسكن في الاول الزنقة مرا اسمها مسعودة عندها صبية اتعطل عليها النصيب ومعاد حد شافلها رغم زينها وكبر عينها !!! هالمرا كانت ديمة الصبح اتخش على غالية اتهدرز عندها مشوار وتعاونها في قضية الحوش كلها وتروح .... غالية كانت محبوبة من جاراتها اتخش وحدة تطلع وحدة واللي اتخش اتعاونها في قضيتها ... الحوش عربي كبير ويبي الجهد !!!! كانت في مرا كبيرة في العمر تسكن في الزنقة التالتة اتجي لغالية وتهدرز وهديكا غالية تبدا تاخذ وتعطي فيها من خبيزة لبشكطي للدقيق وكل مرة اتودها بحويجة ... وهديكا لمرا تبدا اتلعب في بنيات غالية وتبصر عليهم اتقولهم بوكم بياخذ مرا بوكم بياخذ مرا .... توا قلنا مسعودة جارة غالية ديمة اتخش على غالية الصبح اتهدرز وتعاون وتروح ... في مرة من المرات اخداها الوقت في حوش غالية لين خش عليهم صالح راجل غالية جايب معاه خيرات الله شافت مسعودة الخيرات كلها من خضرة ولحم !!! اعطتها غالية ماكتب ربي منه وروحت ... ابدت هديكا مسعودة معاش اتجي الصبح لغالية !!!؟؟ ابدت اتجيها مع قرب مرواحت صالح !!! القاته كل يوم ايجيب معاه في الخيرات !!! اهني ابدت مسعودة تلعب في لعبتها !!! اول ما تشوف صالح خاش لزنقة على رجليه وايديه امعبيات بكواغط السبيزا تطلع تجري ... مرة اتسلم عليه ومرة تنشده على حال شغله ومرة اتقوله هالخيرات تبيلها عمار يتلقها !!!! ومن كترت ما اتوقف فيه في راس الزنقة وتهدرز معاه لين خشلته في الموضوع طول وفي مرة قالته شورها مرتك اتجيب بنات بس وشورهم ازويز بس !!!؟؟ اهو قداش ليها معاش جابت !!! ومرة اتلقاته بصونية رشته كسكاس قالتله طيبتها ابنيتي سالمة ووديناك بيها !!! ومرة طلعتله بنتها شافها وقالتله نعطيهالك ابلاش !!!! هذا كله وغالية ما تندري على شي !!! والجيران في الاول عادي جارة كبيرة في العمر وسلمت على جارها ونشداتها على حاله شن فيها !!! لكن لما كترت واقفات صالح ومسعودة مع بعضهم عرفوا الجارات ان في خدمة تخدم فيها مسعودة !!! خشوا الجارات لغالية وقالوله البسي فراشيتك واتعالي معانا ...قالتلهم وين معاكم !!؟؟ قالولها بنمشوا لمرا تشبح في البخت ... بنمشوا انشوفوا بختنا امشي شوفي بختك حتى انتي !!؟؟ قالتلهم اللطف اللطف اللطف تبوني نمشي لشباحه !!؟؟ في الاول ياحليلي حرام وفي التالي صالح يقتلني قتل نطلع ومانقولاش ... قالولها وصالح منو بيقوله !!؟ قالتلهم وكان هذا والله مانقدر !! المهم خذوا منها تستمالها بالسيف عليها رفعوه معاهم وامشوا ... خشوا على الشباحه وابدت اتشوفلهم في البخت وبعدين اعطوها تستمال غالية و من لما حطاته قدامها قالت الشباحه ( يا غالية انتي باهية والسيل يجري تحتك *** لكن عمارك جاي ياخذ حقك ) اتغششوا الجارات من بخت غالية وروحوا قالولها شن قالت الشباحه على بختها !!!! قالتلهم اني نيتي تخدمني والله ماخايفة ولا امعدلة على حاجة .... غالية ابدت اتلاحظ ان صالح متغير مش زي قبل .... وفي يوم من لايام في وقت مرواح صالح ..... انفتح الباب وخش صالح وخشت وراه اخته وخوه ومرا ملفوفة في فراشية .... جت غالية تجري استقبلتهم وسلمت عليهم وقالت لحماتها منو هالمرا الملفوفة في الفراشية !!! قالتلها هادي ضرتك مرت صالح الجديدة !!! وانتي تعرفيه مش برانية عليك ... سالمة بنت جارتك مسعودة !!! انضربت غالية امسيكينة ... وخشت للكوجينه بتسقي لغدي .... غدتهم وطيبت الشاهي ..وسقدت حماتها وسلفها وخشت هيا وبنياتها لدارها وقعمزت .... وبنياتها ينشدوا فيها منو لمرا اللي قاعدة مع بوي !!! قالتلهم هادي عروسته ... غالية ماتقدرش اتقول آه قدام راجلها وبعدين عقلها وحكمتها وطيبتها لعبوا دورهم وخلوها تسكت .... تاني يوم طلع صالح لخدمته ... وغالية اضم وتحوس ... شوية وطلعت سالمة من الدار وابدت اضم وتحوس مع غالية وتلعب في البنات ... خشوا عليها جاراتها بعد ماسمعوا ... قالولها الله غالب ياغالية كوني في روحك خاناتك جارتك خونه قوية الله ان شاءالله اتولي عليها بضربة باهية ... قالتلهم غالية اني نيتي تخدمني ... قالولها شن درتي لما خشت عليك ... قالتلهم شن قدري بندير !!!! حدني سقيتلهم غداهم اتغدوا وخلاص ... قالولها يعطيها سم فيه ... والله ياغالية مارينا في وسعة بالك وطيبتك ... طلعوا منها الجارات وهما يسحنوا واجعتهم غالية .... وشوية وخشت جارتها مسعودة !!! قالتلها ياغالية هذا نصيب لاهو بيدي ولاهو بيدك ... قالتلها غالية نيتي تخدمني ..... وتاني يوم جتها جارتها اللي ديمة تبصر على بنيات غالية وتقولهم بوكم بيجيب مرا ... ولما خشت القت سالمة قالتلها منو هادي يا غالية ... قالتلها غالية هادي ضرتي ... انضربت لمرا وقالتلها ووك عليا يا بنيتي سامحيني جابتها عل فمي والله ماكنت نقصد بيها حاجة غير انبصر على بنياتك ووك عليا ياحشمتي ... قالتلها غالية لا حشمتك ولا شي مكتوب وقدره ربي ...... فاتت ايام وغالية وضرتها متعاشرات ومتفاهمات ومرة مرة اتجي مسعودة باش تظفر شعر بنتها سالمة اللي يضرب للوطا ويكر مع رجليها .... ومن لما تخش مسعودة وتلقى بنتها مرتاحة اتقول في نفسها والله العبتيها صح يامسعودة وحطيتي بنتك وين اتهنت وارتاحت !!! والجارات الباقيات غيظهم ما تمش من خونه مسعودة ل غالية !!! وكل ما يخشوا ل غالية يقعدوا يتجدوا فيها تخنبلهم تستمال سالمة ويرفعوه معاهم للشباحه !!! لكن غالية مابتش ... وماشادة الا ربي جابها ربي يرفعها ونيتي تخدمني .... فاتوا ستة شهور من لما اخذي صالح سالمة!!! ... حملت غالية واهني ابدت مسعودة وبنتها سالمة في سحنهم وغيظهم وعلى كل ماداروا باش غالية ترمي حملها لكن ارادة ربي فوق كل شي .... جابت غالية اوليد زي لقمر وفرح صالح وفرحوا الجيران ل غالية وهديكا مسعودة وبنتها اقريب ايطيروا من الغيظ .... اتغير صالح من جيهة سالمة وابدي كل ليلة في دار غالية وصغارها ... سالمة ماعجبهاش الحال امشت هيا وامها لشباحه ودورة ايام وهداكا صالح اللي جاه جاه على غالية وصغارها ... ومايبات الا عند سالمة بس !!!! الحاجة الباهية الا كانت في سالمة انها ايد بايد مع غالية في قضية الحوش والتطييب وقداش اتحب صغار غالية خاصة لوليد من لما اتنوض تاخذه وتغيرلها وتلعبه وتغنيله .... والجارات قاعدات ايزنوا على غالية في قولت غير كان تخنبينا تستمال سالمة !!! اتقولهم والله مانكذب عليكم لمرا امونستني ومعاونتني في الحوش والصغار !!! وزي ما جابها ربي يرفعها ربي اني ماندير شي !!! وفي يوم من لايام خشت مسعودة وفي ايدها الزيت لمخلط بالقرنفل باش بتسلت شعر بنتها سالمة !!! سالمة اقنينه وشعرها زي ماقلنا طويل !!! وكيف امها ابدت تسلتلها فيه سمعوا زازا قوية في الشارع !!! عركة رجالة وضرب ولهيد ... طلعت مسعودة القت العركة بين ولدها وولد خو صالح اللي جاي من البر لعمه صالح !!! وابدت مسعودة اتصيح وتعيط وهداكا ولد خو صالح طايح فشخ في ولد مسعودة ... طلعت سالمة تجري لما سمعت امها اتعيط واتصيح شافت خوها وجه كله ادموما ابدت حتى هيا تنقز وتعيط وتصيح في الزنقة !!! وهديكا الزنقة كلها رجاله !!! هدوكا الرجالة سيبو العركة ووقفوا يتفرجوا على سالمة اللي طلعت مكشوفة وشعرها ايكر معاها !!! على خشت صالح لزنقة وشاف هالشوفة ... جي يجري حز ولد خوه واتلفت ل سالمة وقالها انتي طالق طالق طالق ... مازال غير تقعد على ذمتي مرا تكشف روحها قدام رجالة !!! روحت مسعودة وولدها وبنتها لحوشها وخش صالح وولد خوه للحوش ... وولى صالح لمرته غالية اللي زي ما قالت نيتي تخدمني
الحصيلوا ياناس الخونه واعرة !!! واعرة واعرة وربك جابها وربك ارفعها وغالية نيتها خدمتها .... عمره اللي يخون مايربح ولو بعد وقت واللي نيته صافية على طول الزمان الخير امحاديه
اموله محمد
