الحلقة ٩٣
من بعد الزعل الصار ايام و تصالحنا، كنا مشتاقين لبعض هوايه و صادف صراع جان عندو سفر للأردن بشغل هناك، فقرر نسافر سوا اني وياه لحتى نقضي اكثر وقت مع بعض ومنها يكمل شغلو هناك...
فاخذنا غراضنا و سافرنا، اول يومين قضاهم ويايه بس البقيه خلصها يطلع الصبح يرجع بليل بسبب الشغل، بدايه كلت عادي بس من مرة ايام و اني بالشقه وحدي لا اطلع ولا امشي تضايقت، اخابرو اريد اطلع ميقبل و الاكل يخلي احد يبعثهم للباب، فختنكت عاد كام من يجي اذب كل صوجتي بيه و هو تعبان و ما بيه حيل يسمع فنتعارك و بقت اعصابنا مشدودة و مطنكرين لحد ما رجعنا.
عمتي تكول هذة عين عليكم ما خلتكم تتهنون، و واضحه عيون منو ما حاج احجي و اكول منو حاسدني
من بعد ما رجعنا رجع وضعنا طبيعي طبعا ما تخلى من مضايقات اخليصان فاطكطك شغل شوي ع اللي اكدر عليه و اصعد و نرات ما انزل ابقى نايمه حتى اغث خلوص و من تشكي مني و توصل الصراع يكوم يصيح و يكول :- يرحم والديكم عوفوها و فكوني من المشاكل حسبوها ما موجوده
بيوم نزلت العصر، هيام تبجي يم الحجيه و تشكيلها اللي فهمتو علي رايد يتزوج و ميريد يكمل دراسه الا تزوجو حنين و هيام ادك و تلطم من وراه لان يريد يبطل سعد ميقبل ينطي بنتو فمتكاون علي و امه و هو طالع لبغداد زعلان و عايفها، و هيام كاعده تندب حظها شتسوي وياه عجزت تجيب هالولد للطريق عنيد و اللي براسو يسوي و ما يتنازل.
دخل صراع لغرفة الحجيه و هي تشكي ، ع السريع سكتت و غيرت السالفه
صراع:- ها الله يساعدهم
-هلا بيك ييمه
- خير ام علي شبيج خويه
-لا والله يخويه ما بيه شيء شويه راسي يوجعني و اجيت يم الحجيه
-صاير شي ؟ اذا محتاجه كولي !
-عساك سالم يا خويه لا يحرمني منك ، ما بيه شي يبعد اختك فدوه العينك
-اذا هيج خير ان شاءالله
التفت عليه :- ليليان ماي ع السريع-اي
كمت اروح للمطبخ شو هذا اجا ورايا، جانت اخلاص واكفه تعيب على كاستر بالجلي اني مسويته و تاكل بالكاسه و تسمعني من شافتو سكتت ، خزرها و اشرلها تطلع من وجهو ..
طلعت بسرعه و هو حجه :- شبيها هاي ؟
-مريضه طلع بعقلي اسوي حلو و خليتو بالثلاجه يبرد هاي جايه تاكل و تعيب
جر كرسي من الميز مال الطعام كعد و كال :- طلعيلي كاسه اضوكها دشوف و سولفيلي شبيها ام علي حسيت بيها شيء-مو هي ما قبلت تحجيلك شلون اني احجي
واكفه يم الثلاجه اطلع و احجي، جنت لابسه دشداشه كشمير وردي فاتح ومسرحه شعري ذيل احصان:-ملج علاقه احجيلي وبعدين تعاي جاي شو صايره حلوه يولي شرايده مني
و غمز ضحكت:- اني بكل وكت حلوه بس انت ما تشوف وكت اللي يطكن بعقلك
-ول يابه انا شعندي غيرج و اشوفها بس غير الشغل و المشاكل الا اعشگچ و ربج، هسه عوفي الحجي انطيني هالتعلوص هذا المسويته خل اتجرعو و اصبغ بيج وامرنا لله و احجيلي عن هيام شبيها
أنت تقرأ
المراهقة و الأربعيني
Romanceرواية حقيقية لفتاة عراقية لأخ أرهابي (داعشي) يقوم ببيعها لمن ظلموها فتبدأ رحلتها مع رجل اربعيني يكبرها بثلاث عقود. يا ترى هل الحب سيتعدى فارق العمر الذي بينهما ام يبقى الفارق.. مفارق.. ❤ بقلم زينب ماجد