سانتظرك حتى وان ذبلت اوراقي

خلي نسولف شوية

#خلي_نسولف_شوي 💚

#السلام_عليكم ، مشكلتي اني كلما اتوب ارجع اذنب ، كلما اوعد رب العالمين ارجع اخلف الوعد تعبت من نفسي شسوي ومنين ابدي وشلون اتصرف وي هالنفس الأمارة بالسوء؟

وعليكم السلام والرحمة
قبل كلشي خلي ببالك أنك بمجرد تفكيرك بهالامور هي تقرب لله .. يعني بهالظروف الصعبة الدنعيشها وهالاغراءات والفساد الخُلقي اللي دنشوفه كدامنه وانت دتفكر شلون توصل لله وشلون تتقرب هذا شي عظيم ! رب العالمين حتى على هاي يثيبك ..تخيل!

مادام عندك تأنيب ضمير تجاه الذنب ف أنت بخير
مادام تضوج من تروح لمكان بي معصية ف أنت بخير
مادام تندم ع الذنب اللي سويته ورا فترة قصيرة ف انت بخير

بس ....!
صحيح انت بخير .. بس خيرك اللي انت بي ضعيف !
صحيح انت مؤمن ... بس إيمانك اللي انت بي ضعيف ..

احنه نحتاج:  ذنب + اصرار على تركه
اكثر مانحتاج:  ذنب + بكاء على فعله

اكو واحد من يسوي ذنب يبجي ..بس يبجي حتى يريح ضميره
بس اكو لا ..كل دمعه تنزل منه تهد جبل من الذنوب اللي على ظهره ..هاي الدموع هي اللي راح تغسل حديقة قلبه وراح ترجع تزهر من جديد ..

كل انسان بينه معرض للذنوب من الصبح لليل ..اصلا احنه حياتنا عبارة عن جبهة ،
ابليس يرفع واحنه نكبس ..والبطل مو اللي سوه الذنب وبعدين ندم وكام يبجي ... لا ... البطل هو اللي وكف كدام الذنب وكال لا ، الله اهم

مو بس المجاهد بالجبهة ،انت هم بالجبهة ،وآني هم بالجبهة !
عندك عتاد لتكلي ماعندي شي .. تدري شنو عندك؟
عندك صلاة اذا التزمت بوقتها راح تكدر تنتصر حتى على اسرائيلك ( شيطانك الأكبر) ..

(قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِينَ (39) إِلَّا عِبَادَكَ مِنْهُمُ الْمُخْلَصِينَ (40) )

وهم عندك عتاد الصدقة .. تصدق ...وموشرط بفلوس !
ديننا مجاني مو بفلوس !
ابتسم بوجه امك ..هاي صدقة
خفف جرح واحد بكلامك .. هاي صدقة
علّم طفل سورة الفاتحة .. هاي صدقة
إهدي تسبيحة الزهراء نيابة عن شخص عندة حاجة ... هاي صدقة💙

خليك دائما قريب من الناس اللي تشوف بيهم الله💙
حمّل بموبايلك صوتيات يأثرن بيك مثلا قصائد او قصص او اي شي من هالقبيل واسمعهن دائما ..

خلي فد شي كدام عينك مثلا اكو سوارات مكتوب عليهن يازهراء او ياصاحب الزمان .. خليهن بيدك حتى من يصير كدامك ذنب تباوع عليه وتكول لاجل هالاسم ماراح ارتكب هالذنب💔 او مثلا خلفية جهازك خليها فد شي يأثر بيك

والاهم ثم الاهم هو القران .. تدري ان الانسان كلما يباوع اكثر لايات القران كلما يزيد توفيقه لغض البصر؟

خليك آية تمشي ع الكاع 💙
خلي القرآن قريب من قلبك ومنك💙

ودائمًا حافظ على ذِكر يلهج بي لسانك ..( ولساني بذكرك لَهِجا)

وطبعا بدون منكول انو كل ذنب تسوي هو سهم ترمي بقلب الامام💔
من تسوي ذنب تخيل اكو رأس مقطوع ديباوعلك من كربلاء ...ينتظر منك اكثر من هذا💔
وبكيفك بعد💙

والله يوفقنا ويوفقكم لكل خير✨✨

منقول ..