#عوضني_بيك
الحلقة 4
رهف: اول مانضت كملت حوستي وتيت روحي ومشيت للمزينة بروووحي😢😢
خدتني الذاكرة لي ايام وفات جدي كانت مرت عمي اتخاف منه بعد توفى بهدلتني بالضرب..
بدور: ماااما 😭😭😭
ع احلام: خيرك ياماما من كلمك ليش تبكي
بدور: هذي رهف دفتني طحت 😭😭😭😭
ع احلام: رههههف رررهف تعااالي
رهف: نعم عميمة
ع احلام: تعالي جاي تو انوريك عليها تطييحت بدور
رهف: والله ماطيحتها😭😭طاحت بروحها ماصدقتني رفعتني للمطبخ خدت كاشيك وسخناته ع النار وحرقتني بيه في ساقي وفخدتي اني انعيط وهيا شادتني وتحرق فيا لي درجة الاثر قاعد لعند توا حسيت بالمزينة اتحرك فيا...
رهف: نعم
المزينة: وين عقلك ياعروس يلي واخد عقلك ايتهنى😂😂😂
رهف: ابتسمتلها ولفيت وجهي ع الجيه التانية واني انفكر كيف بيحنوني واني جسمي من تحت فيه امارات الحرق انراجي في حد ايجي ايقولي ماصارش منه العرس والا اي شي ايطفي النار يلي فيا لكن للاسف😔😔😔
المزينة: هيا نبدو
رهف: ابدي..
~~~~
خالد:طلعت كلمت نوري قالي تعال دايرين جو الشباب في الاستراحة يلي انتلاقو فيها ديما مشيتلهم
نوري: هلا هلا بالسلطان😁😁
الشباب: اوووووووو السلطان جي قعدو ايصفقو ودايرين جو وايدخلو فيا يبوني نرقص واني كان نلقى الموت نطلقها عليهم نوري حس بيا تعقدت وفااااصل لنم جي كرني من بينهم
نوري: هيا شباب خلونا ناكلو ورانا حلاق وسريب هيا تفضلو جي قعمز حداي
خالد: تلفتت لي نوري وقتله اني شن جاب دين اصلي بس كان اندمرت في مكاني مش خير انكلم فيه وضاغط ع سنوني
نوري: شاد ضحكته بسيف ياراجل فرحانين بيك😂😂😂
خالد: بتنوض والا انوض بروحي عليك خلطة امعفنة😠😠
نوري: هيا نوض ياعريس😁😁
خالد: سلمنا عليهم ونضنا ركبنا في السيارة واني فاااصل عليه وهو ميت بالضحك لين خلاني نضحك بسيف😂😂😂😂
مشينا للحلاق برمت ع روحي وروحنا للحوش الشباب كلهم غادي
~~~~
رهف: كملتلي المزينة ولبست عيت المزينة وهيا تشكر في جمالي واني في عقلي شن ينفع الجمال😢😢😢 جتني بدرية واحمد روحو بيا لقينا الخيمة مليااااااانه دخلوني وقعمزوني قعدت انشوف لناس جوهم سمح واني يلي عروس جوي متنكد قعدت اندور بعيوني بالك انشوف امي والا خالتي والا اي حد ايحس بيا بس للاسف الكل هايم في حاله بعدها سمعنا تبييب ودوشة قالو اهل العريس وصلو نااااار ولعت فيا خشو وصفقو وغنو وفات الوقت والناس الاغلبية روحو واني خايفه انقول اكيد بيدخلوني للحنه💔💔💔
لاحظت اهل العريس يلبسو بيروحوا بعدها انشوف في وحدة جايتني متوسطة في العمر..
بسمة: اهلين ياعروس كيف حالك اني حماتك بسمة 😊😊😊
رهف: اني متوترة الح حمد لله بجودة وانتي كيف حالك
بسمة: تمام.. قتلك شنو بتحني توا
رهف: 😔والله عليكم انتم
بسمة: شن بنقولك بس العريس امنبه علينا الحنه مايبيكش اتحني سامحيني ياوخيتي هو هذا شرطة
رهف: لالاعادي حتي اني مش صحبه معاها واني فرحانه من داخل جت منك ياجامع
بسمة: ماشي سامحينا مرة تانية سلام
رهف: لالاعادي سلام نشبح في رانيا جايا تجري عرفتها بتقصقص مايفوتها شي هالبنت😂😂
رانيا: من هذي خيرها شن تبي فيك
رهف: غير بشوي عليا هذي حماتي وقاتلي العريس الغفلة مايحبش الحنه مايبيني انحني تريحتي توا اصلا فرحت كنت خايفة كيف بندير وقت بيحنوني ورجليه فيهن امارات الحرق
رانيا: هنا كلهن ثلاث اربع حرقات خيرك انتي امركبه ع روحك
رهف: خلاص الزحمه خفت هيا خليني انخش انغير بعد ماصار من الحنه خشيت وحممت وغيرت وعدييييت في نومة لصبح...
~~~~
خالد: تعشينا ودارو جو الشباب يسحابوني فرحااان ااااه كلهم روحو الا نوري نفخلي راسي ع اساس يقنع فيا بيش مانديرش مشكلة توا يلي صار صار جميع السبل درتهن بيش ايردو في كلامهم وماردوش اني عجزت خلاص بنرضى بالواقع هذرزت اني نوري شوي بعدها مانندرو ع شي لصبح...
~~~~
جي يوم الخميس💔💔
رهف: باتي وين ماشي تعال
باتي: ماتخافي يابنتي الخوف انسيه الحياة ضحكتلك
رهف: ونبي ياباتي ماتخليني وين ضحكتلي من اول مامشيت انت واني نبكي😭😭😭
باتي: انتي اليوم انولدتي اليوم جيتي لدنيا
رهف: ياباتي تعال لا لا.... حسيت بحد ايحرك فيا نطيت هاااا
ع احلام: نوضي واني من الصبح انوض فيك اتقول ميته موت ان شاءالله احمد ايراجي فيك برا
رهف: حاضر نضت غسلت وصليت ومشيت للمزينة جي اليوم يلي كنت خايفة منه زعما كيف معاملته بتكون باهي ليش ماطلبش ايشوفني بكل افففف اف راسي خلاااص من التفكير..
اتذكرت الحلم باتي شن كان يقصد لما قالي انتي انولدتي اليوم
😢😢😢😢
~~~~
ع سالمة: رويده شن صار في الطباخات جبتوهاً
رويده: عدا منير ايجيب فيهن قريب يوصل اكيد رندة علي المنظومة شوي
رندة: باااهي
ع سالمة: راك تلهاً في الرقيص واتخلنها هالحوسة وراكاً
بسمة: ياامي غير ريحي روحك كل شي تمام ان شاءالله اني بنمشي بنظم دار خالد انوازيله دبشه يلي بيرفعه لي شقته تعالي يارندا معاي
رندة: هيا جايا
خالد: نوضني نوري كيف المخلوع مش عارف امتي بتتعلم اتنوض كيف الناس😠😠
نوري: هههههههههه من بكرا تو تلقى من اينوضك بالحنااان يابيييبي نوووض ايرقق في صوته 😂😂😂
خالد: خديت المخدة وضربته بيها يلعن جدك صكر فمك خش للحمام وايكلم فيا
نوري: هيا صحصح ورانا مية حاجة شقتك تبي برمة وبدلتك بنجيبوها شن هالعريس المرخي يلي وحلني فيه ربي
خالد: غطيت راسي بالبطانية قعدت انفكر كيف يطلع شكلها زعمك مغصوبه كيفي والا راضية قعدت غارق في افكاري لين خش عليا نوري
نوري: هيا ياراجل وقت علينا
خالد: تي باهي عليك حصلة غير من طايحة السعد يلي بتاخدها خشيت للحمام واني انفخ طلعت لقيت شناطي دبش
خالد: شنو هذا لي من الدبش
نوري: امك جاباته قالت وازينه دبش خالد ارفعوه معاكم لشقة
خالد: يلللعن اصلهم مننن قااللهم ايخشوها الخربة دبببشي انطلعععه برووحي وقفت ع الباب وانادي امييي ااامي
ع سالمة: نعم خيرك
خالد: من طلع الدبش اني شن قايللكم عليها داري اه شن قايل ع امها😡😡
ع سالمة: بسمة ورندا ضمنها ولماً دبشك
خالد: من رندة الشياطين هذي طلعيهاً توا قوليلهاً يطلعاً والا انخش انطلعهاً بروحي انتكلم واني خلاص واصل حدي وطلعت
ع سالمة: خشت لدار خلاص يابنات اطلعاً كان كملتاً
رندة: اي خلاص كملنا في يدها شيشة عطر خدتها وطلعت وناويه الشر😌😌
****
يتبع
