#الصياد_والفريسة
بقلم زهور جمال الدين ⚘
🌸الحلقة الثانية🌸
الاسلكى بدى يعطى فى اشارة ..
-رد شاهين/ ايووووه تحدث
-الرائد/ ثلاث اشخاص هاربين تسللو عندكم .. خشو للحياش فى الجهه اليمين
-شاهين/ تمام ...فهمت
-الرائد/ من غير شوشرة..
-شاهين/ علم ... وينفد
وصكر اللاسلكى
-شاهين يشبح لى سامى / انا وانت وعبدالحميد بس ..مانبو حد يسمع ..نتسللو للحياش بالواحد ولا كأننا سامعين شى
-سامى/ تم نجيب كلاشنى وننخص حميد ونجى
-شاهين/ تم ..كل واحد يجيب لاسلكى فى يده
( شاهين شاب مواليد سنه 78 .. عمره 33 سنه من سكان طرابلس ... يحب يصلح السيارت .. فاتح ورشه فى حوشه
..ولما بدت الحرب كانت منطقته اللى اصله منها مع فبراير.. ولما صارت الحرب والناتو لحق صغار عمه .. وكان بطل فى المعارك مايخافش.. فى الصفوف الاولى .. ولدلك اصبح قائد ميدانى )
_______________________________________
-
شهر 10 لما خاضت الدنيا ثانى .... فاطمه مرت عبدالسلام وبنتها يارا وعزوزتها مشو لى حوش فتحيه اختها ...
لان حوش فاطمه وسلافها ع الرئسى..وفتحيه وراهم
...فقعدو عندها ..لان الجيران كلهم قاعدين ماطلع حد
مراد اجر حوش وسط البلاد .. وخالد مشى عند نساباته ..
والحوش خلوه فى رقبه قيس وجعفر صغار عبدالسلام ..
فالنهار قاعدين فيه .. وفالليل يمشو لى صغار خالتهم يقصرو الليل عندهم
-فاطمه/ يارا ... سقدى روحك ... قيس فم الباب يراجى فيك ...
-عزيزة/ انا والله مانى راضيه تبعتيها للحوش
-فاطمه/ خوها معاها ياعمتى .. وبعدين باهى اللى ادكرت اليوم المفتاح متع الدولاب وين حاطاته ...كنهدا راهم خنبو دهبي كله
-عزيز مؤيدة/ حاشاهم وليداتنا من الخنبه .. ربي ينصرهم
-فتحيه رافعه حاجب ومنزلة حاجب/تو يجى يوم وتقولو الله يرحمه
-عزيزة/ مسمعتكش يافتحيه .. شن قلتى
-فتحيه/ قتلك الدنيا ليل ياحاجه نجيبلك طاسه حليب
يارا طالعه من الممر بسرعه خايفه من قيس
-ناهد/ كلمى امى تخلينى نمشى معاك مدامه قيس هوا اللى رافعك
-يارا/ ياوخيتى بتعطلينى ... قيس مايحبش من يعطل
-ناهد/ تى هوا حوشكم هنايا بينا وبينكم صور.. امشى على رجليك وخشى من الباب الخلفى ...علاش راكبين فى السيارة وجو
-يارا/ قيس وتعرفيه ... كانا نقوله نمشو على رجلينا لما يقصى لسانى 😁
نزلت يارا تجرى .. ركبت مع قيس ومشو لى حوشهم .. فتح باب القراج دخل السيارة .. وعطى لى يارا مفتاح الحوش... فتحت وخشت تجرى جهه دار بوها مشت للدولاب طلعت المفتاح اللى عطتهولها امها وفتحت الباب وطلعت الدهب وطلعت تجرى لى قيس ... ركبو السيارة ولفو رجعو لى حوش خالتهم ...
مفتاح الحوش والدولاب قعدو عند يارا نست ماعطتهمش لة قيس ...
فاطمه/ وين خراصى القلادة
-يارا/ معاهم ولا ...
-فاطمه / فى باكو بروحهم ... ربي يهديك يابنيتى ...
