#أشم_عطرك
#الكاتبة_ام_نور
البارت ٤
ضليت اخاف احجي
اي اخاف
صارت بيه خوفة من ذبني بالشارع
ادري بي بوقتها يريد بس يخوفني
بس صدك خفت
صبح طلعت ارش الحديقة
مثل كل الايام
هم حسيت بخطوات رجلين قريبه مني
مرات اسمعها من احاول اتقرب منها تختفي
سمعت طكة قوية
ضليت اصيح منو هنا
صح اني عميه بس ده احس اكو احد موجود
اسمع صوت واحد يكلي لاتخافين ماأذيج
ضليت اصرخ من خوفتي وشردت بداخل البيت
دخلت للبيت وقفلت البيبان
اسمع صوته من بره لاتخافين لاتخافين
دخلت غرفتي وقفلت الباب
دخلت جوه الجربايه وارجف
ابد ماطلعت من مكاني
اجه ليل ورجع بابا
اسمعه يصيح ندى
طلعت بابا بابا وارجف
شبكته حيل بابا
دفعني قبل لااكمل واحجي
جوعان وين الاكل
كتله ماسويت خايفه
الله ياخذج وعافني وطلع
بابا مااعرف شنو مشكلته وياي
معقوله كل هذا لان جان يحب امي
او احتمال حاله من حال هواي ناس
مايتقبلون اعاقة اطفالهم
مرات اصبر روحي واكول بابا احسن من غيره
هواي سمعت قصص بالراديو يذبون اطفالهم
لان معاقين ومايتحملون وجودهم بالحياة
اي بابا احسن صح يعصب عليه بس موفرلي كلشي
وره ماعافني وطلع
حسيت بطكة قويه قريبه على شباك المطبخ
ضليت ارجف بمكاني
احس نفسي نكطع
ضليت كاعده تقريب ساعه بمكاني مااتحرك
احس جسمي ثلج صار صخره
راسي اخاف ادوره
صار نص ليل وبابا ماكو والاصوات هم اختفوا
عرفت ابوي ماراح يحميني من شي
ولاراح يصدك بيه
مثل مااني متأكده اكو واحد ويانه بالبيت
اني لمااشوف ده احس وابوي لمفتح مايشوف
قررت اواجهه
كلت اكيد امي تجي تشوفني ومتخلي بابا يشوفها
بس صوت لسمعته مو صوت مره
يجوز ليموت صوته يتغير
انطيت لروحي القوه وطلعت للحديقة
ضليت اصيح منو هنا منو
انتي ماما تعاي حاجيني
تعاي والله مااخاف منج
تعالي كولي لبابا مو اني لموتج
عفيه لاتأذيني مو اني لموتج
لاتموتيني من الخوف اني بنتج واحبج
بابا يأذيني هواي
تعاي وخلصيني عفيه
اسمع صوت مشي قريب مني
وسد حلكي
ختنكت مااكدر اجر نفس
حسيت بحظنه قويه واحد باسني بكل حنيه
دفعته وشردت للبيت
بس هنا حسيته رجال يعني مو امي
دخلت لغرفتي وصوت النفس مالتي
كلش قوي صار
واحس جسمي يرجف وخايفة
فجئة وبوسط هذا الازدحام بمشاعري
بين مشاعر الخوف والرجفة
حسيت بدفو وبدون سيطره على نفسي ابتسمت
وذكرت الحنان والعطف وبوسة الخد
خليت ايدي على خدي واتلمسه
