رجل ولكن

الحلقة الثانية

الحلقة الثانية

جزء من حلقة سابقة :
يارا : توء طب اسمع بقى
عمرو : كلى آذان صاغية
يارا : ..................................
*_____________________________________________**___________________________*
يارا : انا عندى ٢١ سنة يعنى مش صغيرة وواخدة مساحة كبيرة من الحرية يمكن مش عند اى بنت ، فى وجهة نظر بعض الناس انى بنت free ، وعندى اصحاب كتير ولاد ، ورغم كل ده انا عمرى ما ارتبطت
عمرو : ليه ؟
يارا : عشان حاجات كتير ، منهم انى مش عايزة استغل الحرية اللى اهلى ادوهالى فى الحب والغراميات وكمان كنت خايفة ارتبطت بواحد يسلب منى الحرية دى بتحكماته واوامره او يغير من اسلوب حياتى وانا مش عايزة كل ده
عمرو : يعنى انتِ مش عايزة ترتبطى بيا عشان خاطر تعيشى حياتك بمزاجك
يارا : ممكن تسبنى اكمل
عمرو : اتفضلى
يارا : انا فعلاً لما شوفتك فى السيكشن اعجبت بيك زى كل البنات بس انا مبحبش ادى اهتمام لحد يعنى بحب اظهر انى غير مُهتمة بس مع الوقت لقيتك انت كمان بتهتم بيا اى نعم انت بتشاغل كل البنات اللى حواليك بس نظراتك ليا كانت بتقول حاجات كتير بس ............. (وسكتت)
عمرو : بس ايه ؟
يارا : بس لو ارتبطنا اوعدنى انك لا هتسلب منى الحرية دى ولا هتقولى غيري من اسلوب حياتك
عمرو : افندم !!
يارا : ايه ؟
عمرو : ايه اللى انتِ بتقوليه ده ، يعنى موافقة على الارتباط بس مش عايزة تغيري اسلوب حياتك يعنى اكلمك اقولك انتِ فين تقوليلى مع واحد صاحبى وستايل لبسك الضيق ده واللى غالباً بيبقى مكشوف عيزانى اسكت عليه ازاى
يارا : ايوة لانى مبعملش حاجه غلط
عمرو : الغلط من وجهة نظرى غير الغلط من وجهة نظرك
يارا : يعنى ايه الغلط اللى انا بعمله مش عاجبك وعايز تغيره
عمرو : اقل حاجه ستايل لبسك مش هقولك اتحجبى بس على الاقل يبقى مُحتشم عن كده
يارا : امممم ايوة وايه كمان
عمرو : صحوبية الولاد والتهريج الاوڤر ده انا مقبلوش ، كمان النت اللى انتِ قاعده عليه ٢٤ ساعة ده
يارا : انت ليه محسسنى انى بعمل حاجه غريبة ما كل البنات بتعمل كده ويمكن اكتر من كده
عمرو : بس المفروض يا يارا انتِ تبقى غير كل البنات ، المفروض تبقى princess مميزة وليكي اسلوبك لوحدك لانك اصلاً مختلفة جداً عنهم فى حاجات كتير
يارا : الحاجات اللى انت عايزها دى عايزة تدريج ، يعنى مش من مرة واحدة هاسيب اصحابى وابطل نت واغير ستايل لبسى
عمرو : اكيد يعنى بس يبقى عندك نية انك تتغيري فعلاً
يارا : حاضر هتغير فعلاً
عمرو : ان شاء الله ، مش هسمعها بقى
يارا : قصدك بحبك
عمرو : ايوة بقى
يارا : لا مش هتسمعها
عمرو : هههههه مانا خلاص سمعتها
(. قعدوا يرغوا شوية وبعد كده روحوا .)
*_____________________________________________**___________________________*
فى بيت يارا :
عائشة : يارا هتتعشى ولا اتعشيتى بره
يارا سرحانة ومبتردش
عائشة : يا يارا يارا انتِ نايمة ولا ايه
يارا : لا يا نينة انا صاحية بس سرحت شوية
عائشة : هتتعشى
يارا : لا ماليش نفس
عائشة : طيب يا بنتى انا هدخل انام
يارا : خدتى الدوا
عائشة : اه
(. دخلت عائشة اوضتها ودخلت يارا وراها .)
يارا : نينة عايزة اسألك على حاجه
عائشة : اسألى يا حبيبتى
يارا : هو انا وحشة ؟
عائشة : وحشة ايه ده انتِ زى القمر
يارا : لا يا نينة انا مقصدش الشكل انا اقصد الطباع ، طباعى وحشة
عائشة : مش وحشة اوى بس عادى مفيش حد كامل
يارا : زى ايه
عائشة : العند والعصبية والانفتاح اللى انتِ فيه ده
يارا : يعنى انتِ مش عاجبك اسلوب حياتى
عائشة : يا بنتى انا عارفة انك مبتعمليش حاجه غلط بس الانفتاح ده ممكن يسئ لسمعتك
يارا : اه فهمتك ماشى يا تيتة تصبحى على خير (وخرجت)
يارا لـ نفسها : مش ممكن كل الناس دى غلط وانا اللى صح ، جايز مبعملش حاجه غلط بس المجتمع بياخد بالمظاهر والمنظر ، بس ده غصب عنى انا طول عمرى عايشة بدماغى مالقتش حد يقولى الصح من الغلط ، بابا طول عمره فى التنقيب والصحرا ، ماما ماتت وانا صغيرة انا يدوب فكراها بالعافية وماما رباب رغم انها بتحاول تعاملنى زى بنتها الا ان كل اهتمامها كان كلت شربت ذاكرت ، ورغم انها بتحاول تعاملنى برضه زى بنتها الا انى دايماً حاسة ان فى حاجز بينى وبينها معرفش انا اللى حطيت الحاجز ده ولا هى ولا بحكم انها مش امى الحقيقية ، عمرو وجدتى عندهم حق جايز اكون مبعملش حاجه غلط بس الغلط ده نسبى يعنى اللى انا شيفاه صح غيري شايفه غلط فعلاً انا لازم اتغير اولاً عشان نفسى ثانياً عشان عمرو ، انا بحب عمرو وعمرو انسان يستحق انى اتغير عشانه لانه انسان كويس فعلاً .....
*_____________________________________________**___________________________*
تانى يوم فى الجامعة :
(. مجموعة من البنات والشباب قاعدين فى المعمل .)
لى لى : شوفتوا يا بنات اللى حصل امبارح
نسرين(زميلة) : ايه اللى حصل يا لى لى
لى لى : امبارح انا وندى كنا فى الجراچ وشوفنا الدكتور عمرو واقف بيكلم حد
ندى : تحديداً واحدة
نسرين : ايه ده بجد ؟ مين دى
لى لى : اكيد واحدة من اللى بيتسلى بيهم
يارا : طب وانتوا شاغلين نفسكم بيه ليه
لى لى : انا صعبان عليا البنت اللى مصدقة انه بيحبها دى
يارا : هههههه بجد طب ما تروحى تنصحيها
لى لى : خايفة متتقبلش النصيحة
يارا : والله ابسط شئ هتقولهولك وانتِ مالك
لى لى : اه صحيح مالى ، ان شاء الله حتى يولعوا هما الاتنين انا مالى
يارا : اهتمى بنفسك بس يا لى لى
(. هنا دخل عمرو .)
عمرو : صباح الخير
الجميع : صباح النور
(. وبدأ عمرو فى الشرح ويتبادل هو ويارا النظرات اثناء السيكشن .)
عمرو : عن اذنكم لحظة واحدة (وخرج عمرو)
(. دخل عمرو تانى وشاف يارا بتكلم واحد وبيهزروا ، خلص عمرو السيكشن .)
عمرو : ايه المنظر اللى انا شوفته ده
يارا : منظر ايه
عمرو : فى المعمل
يارا : انا مش فاهمه حاجه يا عمرو ، هو حصل ايه عشان تكلمنى كده
عمرو : حصل ايه ؟ انتِ للدرجة دى مبتاخديش بالك من تصرفاتك
يارا : الله هو حصل ايه
عمرو : وطى صوتك
يارا : سورى
عمرو : انتِ مش كنتى عماله تكلمى وتهزرى مع اللى اسمه ياسر ده جوه
يارا : عادى احنا كنا بنتكلم عادى ده مجرد زميل
عمرو : بلا مجرد زميل بلا مجرد نيله متكلميش حد خالص
يارا : انت بتغير عليا ؟
عمرو : مش فكرة غيرة ، انا مش خرووووووف
يارا بتذمر : اوكى عن اذنك عشان عندى محاضرة
يارا لنفسها : انا مش خروف ؟ يعنى مبيغيرش عليا ولا ايه ؟ وبعدين هو بيكلمنى كده ليه هو انا حبيبته ولا جارية جايبها من سوق العبيد ؟ انا مينفعش يكلمنى بالاسلوب ده وبعدين انا سكتله ازاى
(. خلصت يارا المحاضرة بتاعتها ومركزتش فيها من كتر تفكيرها ، خلصت وراحت لـ عمرو .)
يارا :: ممكن اعرف انت بتكلمنى كده ليه
عمرو : هو انا جيت جنبك يا بنتى
يارا : انا قصدى من ساعة قبل ماروح المحاضرة
عمرو : كلمتك ازاى
يارا : امممممم
عمرو : ما تتكلمى ساكته ليه
يارا : يوووووه خلاص يا عمرو مفيش حاجه
عمرو : اوكى روحى شوفى وراكى ايه عشان عندى سيكشن دلوقتى وكلمينى وانتِ مروحة وكلمينى برضه اول ما توصلى وقابلينى النهاردة بالليل فى نفس المكان والمعياد (ومشى وسابها)
يارا لنفسها باستغراب : ايه ده !! ايه ده !! ايه اللى بيعملوا ده !! هو بيقول اوامره ويمشى ولا كأن انا ليا رأى ، وبعدين مش المفروض كنت الومه على معاملته دى ؟ ايه اللى خرسنى بس !! اوووووووف انا لازم اخد موقف مينفعش كده
*_____________________________________________**___________________________*
فى الامارات :
اشرف : رباب كلمتى يارا النهاردة
رباب : ايه !! اه اه كلمتها كويسة بتسلم عليك
يامن: وانا ويحيى كلمناها على النت امبارح
اشرف : عاملة ايه يا يامن
يامن : كويسة يا بابا بس زعلانه نفسنا ننزل اوى
اشرف : قريب ان شاء الله
رباب : انت هتنزل مصر قريب
اشرف : ايوة هننزل نشوف يارا ونطمن عليها
رباب : انت عايز تشحطط عيلة بحالها عشان واحدة ما تخليها هى تجى اسهل
اشرف : دى فترة دراسة ومينفعش تجى
رباب : يعنى يحيى ويامن هما اللى مش فى فترة دراسة ولا انت عايز تضيعلى الولدين
اشرف : فى ايه يا رباب من امنى وانتِ بتتكلمى عن يارا كده مش دى برضه بنتك البكرية
رباب : احنا مش قولنالها هنتصرف وندخلها جامعة هنا وهى اصرت تنزل مصر وتعيش مع جدتها يعنى هى اللى اختارت مش انا اللى بعتها مصر
اشرف : يووووه بقى انتِ كل يوم تسمعينى الاسطوانة دى زهقتينى
رباب : اعمل حسابك انا وولادى مش نازلين مصر عايز تروح تطمن على يارا روح او ابعتلها لكن انا مش هنزل مصر (. مشى اشرف وسابها .)
يامن : ليه يا ماما كده انا عايز اشوف يارا وحشتنى اوى
رباب : انت ايه اللى دخلك فى كلام الكبار ملكش دعوة
يامن : انتِ ليه يا ماما مبتحبيش يارا
رباب بشراسة : انت اتجننت ياد انت ، انت ازاى تقول كده عايز ابوك يزعل ، يارا اختك وبنتى فاهم
يامن : سورى يا ماما
*_________*
(. يارا بتكلم يحيى على النت اثناء الخناقة .)
يارا : ايه الاصوات العالية دى يا يحيى
يحيى : ده بابا وماما كالعادة بيتخانقوا على نزول مصر
يارا : هى ماما برضه مش عايزة تنزل مصر
يحيى : هى بتقول انه مينفعش عشان دراستنا انا ويامن وعشان عندنا كورسس فى الاجازة
يارا : كورسس ايه
يحيى : مش عارف بس هى قالت ان انا ويامن هناخد كورسس فى الاجازة دى
يارا : يعنى مش جايين الصيف ده برضه
يحيى : ما تجي انتِ يا يارا
يارا : يا يحيى يا حبيبى انا كنت جاية فى اجازة الميد تيرم بس بابا قالى احنا جايين وفضل يقولى احنا جايين لحد قبل الدراسة بيومين قالى اسافرلكوا ؟ اسافر ازاى انا بقى
يحيى : حصل خير
(. خلصت رباب الخناقة مع اشرف ودخلت على يحيى .)
رباب : بتعمل ايه
يحيى : بكلم يارا
رباب : طب كفاية كده يالا عندك مذاكرة (وخرجت)
يحيى : ماما بتسلم عليكى
يارا : هههههه الله يسلمها
يحيى : طب هروح انا عشان عندى مذاكرة وعشان معملتش الـ home work
يارا : اوكى اوكى انا كمان نازلة يالا باى
يارا لنفسها : ههههههه بتسلم عليا !! على اساس انى مكنتش سامعه
(. غيرت يارا واستأذنت جدتها وخرجت تقابل عمرو .)
*_____________________________________________**___________________________*
فى احدى الكافيهات :
(. دخلت يارا الكافيه وبتبص حواليها يمين وشمال بتدور على عمرو وشافت ........ .)