#طعنة_غذر
الجزء الثاني
الحلقه 5
قامني بقوة و دخلني الدوش .. و انا نضحك .. دوشنا مع بعض مع شوية رومانسيه 🙈♥️
و طلعنا لبسنا و قالي نمشوا نتغدوا ؟ قتله هيا .. طلعنا تغذينا .. و احنا مقعمزين في المطعم قالي عينك قاعده حمراء .. في دكتور معروف شن رايك ناخدوا عنده موعد و نمشوا نعاينوا ؟ ع الاقل لين يكمل عرس وليد بعدها نسافروا نعاينوا برا ..
قتله به تمام ..
حجز حسين عند نفس الدكتور الي مشيتله قبل العرس ..
و لما قالي خفت نمشي نتلاقى مع نفس الممرضه و تكلمني قدام حسين او تصير أي لقطه ..
روحنا حوشنا و قعدنا نتفرجوا على فيلم و انا في حضنه و بعدها رقدنا مع بعض ♥️🙈
تاني يوم نضت الصبح و انا نفكر في موعدي .. كيف نتصرف ؟ شن اندير ؟
معاش نبي مشاكل .. نبي نعيش حياتي مرتاحه و متهنيه ..
قلت خلاص نمشي للعيادة و نسأل عليها و نكلمها نقوللها ادير روحها ما تعرفنيش بكل .. بعدين قلت لا لا لازم نتصرف قبل ما نوصل للعياده .. به أنا حتى أسمها ما نعرفاش ..
حسين في الدوش .. خديت تليفوني و اتصلت بالعياده ..
رد عليا : الو ..
قتله لو سمحت هذه عيادة ......
قالي ايه تفضلي ..
قتله بنسألك على ممرضه سمراء تخدم في الأسعاف ..
قالي في هلبا يخدموا في الاسعاف ..
قتله سمراء و في نهاية الثلاثين و قصيرة شوي ..
فصل الخط ..
ايييييح وقته هذا ..
عاودت اتصلت .. ما ردوش عليا .. عاودت اتصلت تاني .. رد عليا :الوو
قتله معاي خوي ؟؟
قالي معاك اختي تفضلي .. قتله هي حالة انسانيه بالله عليك ممكن نعرف أسمها ؟؟
قالي تقصدي الممرضه فهيمة ؟ قتله وين كانت تخدم قبل ؟ قالي كانت تخدم في عيادة ( .......) في جنزور ..
قتله ايه هي هادي .. ممكن ناخد رقمها ؟؟ قالي اسف و الله ما نقدرش نعطيك رقمها .. لكن 10 دقايق و عاودي تو اناديها تكلمك .. قتله بارك الله فيك وخيي في ميزان حسناتك ..
طلع حسين من الدوش .. و خش يصلي .. كيف بنتصل توا و هو أكيد مش ح يسيبني بكل ..
فطرنا و قعد حسين شادني يقولي ما خاطريش نطلع بيك بكل .. قتله خلي نكلم أمي نهدرز عليها شويه و بعدها نطلعوا .. قالي اوك ..
طلعت من جنبه بحجة التغطيه و اتصلت بي العياده .. ردت عليا فهيمة على طول .. قلت السلام عليكم فهيمة كيف حالك ؟؟
قتلي الحمدلله من معاي ؟
قتلها أنا غزاله الي طلعتيني من المصحه .. الي وصاك عليا ماجد ..
قتلي خيرك وخيتي شن تبي ؟؟
قتلها انا تزوجت و راجلي خدا موعد في نفس العيادة و خايفه يطلع تاريخ الدخول و الكشف في الكمبيوتر او نتلاقوا معاك و تزلق منك كلمه ..
قتلي اسمعي انا نسيتك راه .. و الي درته درته لله ...
_________
و أنا نتكلم حسيت بي باب دار النوم تصكر .. حسين كان يسمع فيا زعمه !! او طلع توا بس ؟؟
قتلها تمام تمام أنا قلت انبهك بس ..
فجأه نسمع في طوط طوط طوط ..
الخط فصل زعمه !! لا هادي شكلها صكرت الخط في وجهي ..
حتى انا قداش ما مسيطر عليا الخوف .. تي مفروض حتى عرفتني و جت كلمتني قدام حسين نكذبها في وجهها و ندير روحي ما نعرفهاش ..
نضت مشيت جنب حسين .. لقيته مقعمز و يتصفح في تليفونه .. قالي كلمتي امك ؟؟ قتله ايه ههههه و تسلم عليك هلبا .. قالي اوك جهزي نفسك و تلقيني تحت نستنى فيك و هو طالع خدا تليفوني فتحه شاف شي بس ما عرفتش شن هو و صكره .. مشيت حضنته و لفيت ايديا ع رقبته .. قتله امممممممم ح نستنى امته نروحوا بفارغ الصبر .. قالي حتى انا يا روحي ..
طلع حسين و طلعت انا ملابسي بنجهز نفسي .. تليفوني يرن .. قلت زعمه فهيمة هادي ؟؟ مشيت خديته بنشوف شكون الي يتصل .. لقيتها امي .. رديت عليها .. تسأل و تطمن عليا .. قتلها طالعه بنمشي للعيادة .. قتلي ديري خدمة انتضار في جهازك .. ما نقعدش انا ندور فيك .. قتلها كيف !! قتلي من بكري نتصل بيك تليفونك مشغول .. اتصلت بي حسين ..
قتلها ايه 😳😳 ....
قتلي قتله نبي غزاله نطمن عليها و تليفونها مشغول ..
أنا انصدمت 😳😳
به شن قالك هو يا ماما ؟؟ ...
قتلي قالي في المطبخ تو نقوللها تكلمك .. المهم قوليلي شن صار فيك تهنيتي ؟؟
ايه تهنيت يا ماما تهنيت 😠
قعدت تزغرط و أنا صكرت الخط ...
انا مصدومه .. كيف ندير ؟؟ يعني حسين عرف ان انا نكذب 😰😰 .. المشكله انه سألني كلمتي امك و قتله ايه ....
موقف ما فيشي كيف يترقع بكل ... أنا لي آمته بنقعد نتصرف بي عبط 🤦🏻♀️🤦🏻♀️
كيف بنقابله توا ؟؟ 😰 يعني هو بكري شد تليفوني بيشوف اخر مكالمة 😰
أنا خلاص حصلت و لازم نخلي روحي عاديه باش حسين ما يحس بي شي
نضت لبست و جهزت نفسي و نزلت ركبت السياره و طلعنا ماشيين للعياده ..
طول الطريق منحرجة منه .. جوه متغير بس يساير و يضحك و يبصر و يشد في أيدي ..
وصلنا للعيادة و خشينا للدكتور و كشف عليا .. قالي نعطيك دواء يصفي العين و ما تخافيش منها .. خدينا الدواء و طلعنا ..
قالي أمي اليوم عازماتك ع العشاء .. قتله و الله ! 😍 أصلاً أنا استاحشتها ابله زينب هلبا ..
قتله معناها نوقفوا توا ناخدوا بكلاوة باش نروح نجهز نفسي و نمشي لحوشكم طول .. وقفنا خدينا بكلاوة و روحنا للحوش .. خشيت نحيت ملابسي و جيت لي حضنه طول .. متحشمه و نحس بالخجل منه .. و كأن في حاجز بيني و بينه مش عارفه كيف نتخطاه .. الموقف محرج هلبا ..
قعد يلعب بشعري .. يبوس في إيدي .. حسيت بيه متضايق و يخفي في مشاعره و ما يبيش يزعلني .. قالي نوضي جهزي نفسك معاش وقت .. قتله تمام .. خشيت دوشت و طلعت لفيت شعري .. حطيت ميك آب .. ركبت رموش .. فتحت الدولاب .. قعدت نفكر شن نلبس ؟؟ قفطان ؟ او بدلة سروال ؟ او بدله جونه و جاكيت ؟؟
طلعت بدله متع سروال ..
لبست و تعطرت و طلعت للصاله بنقول لي حسين هيا أنا جاهزة ..
لقيته مدخن هلبا .. باكو كامل و بادي في التاني .. قالي هيا نغير ملابسي و نطلعوا ..
طلعنا و مشينا حوش أماليه .. لقيت زهور غادي و حنان و أبله زينب و خالات حسين و نساوين عمامه ..
كنت فرحانه و عندي إحساس حلو .. هكي تحسي انك خديتي حبيبك و جايه لي حوش اماليه .. تحسي ان خالاته حلوين .. نساوين عمه حلوين .. انطباع حلو ♥️🌺
أبله زينب فرحانه بيا .. و حنان مرة مرة تحذف كلمة ..
تعشينا و قعدنا نهدرزوا ..
No name ♥️🌺
