#طعنة_غذر
الجزء الثاني
الحلقه 1
طلعنا من الصاله لحوشنا طول .. كنت انا و أياه في السيارة و ورانا سيارتين متع صحابه ... أنا متوترة .. حسين متوتر أكثر مني .. اللحضه هادي كنت نستنى فيها بعقلي قبل قلبي ..
( تعرفي لما تختاري حاجة بعقلك ح يحبها قلبك بعد وقت .. لمجرد إنها هي الصح و ح يزيد احترامك لذاتك و مشاعرك و لو إخترتي حاجة بقلبك و عقلك يقولك في حاجة غلط .. مش ح ترتاحي .. ح يموت حبك مع الوقت )
طول الطريق حسين ساكت وجهه عرقان .. إيده في إيدي ..
وصلنا حوشنا .. اول ما خشيت نحيت الكاب .. جى حسين وراي و حضني .. شديت إيديه .. قتله تعرف إنك في عيني كبير .. همس في وذني .. نحبك .. طرت من الفرح .. و كأني أول مرة نسمعها .. كانت الكلمة فيها كمية مشاعر كبيرة .. تلفتت شديته من رقبته .. حضنته .. غمضت عيوني و كأني في حلم .. قالي تعرفي .. قتله شنو .. قالي ما عنديش صبر للرومانسيه بكل ..
ضحكت 🤭 قتله كيف .. قالي يعني بنطير بيك للفراش طول .. قتله حسين لااااااااااا خلينا مع بعض حبيبي .. قالي مش قادر بكل بنهبل .. قامني و ركبني لدار النوم .. و أول ما خشينا باسني .. و باسني .. و باسني ...
نعشق فمه .. نعشق ريقه .. نعشق أنفاسه .. نعشق كل شي فيه .. قالي مش قادر نتحمل .. قالها و صوته يرعش .. قتله بنلبس الروب .. قالي ما ليشي داعي .. تعالي ما نبيشي .. و بصعوبه فلتت منه و قتله خليني نلبس الروب .. قالي به نساعدك .. قتله الشنطه فيها روب الدخول طلعهولي و معاه شبشبي .. و خشيت الحمام ..نحيت الڤيلو و درت دوش خفيف و حطيت كريم لي جسمي كله و لبست الروب .. طلعت من الحمام لقيت حسين مقعمز .. حطيت عطر و روج خفيف و تلفتت لي حسين لقيت في ايده تليفون الي بعتهولي ماجد .. انصدمت 😨 و نسيت نقيمه من الشنطه .. أنا كيف نسيته 🤦🏻♀️ .. قربت منه ..
ما كنتش قادرة ننطق بي و لا حرف .. به مفروض أنا ما نخافش .. ليش نحس بخوف !!!
تلفتلي حسين .. يقلب في التليفون .. قالي هذا شنو ؟؟؟
قتله تليفون .. قالي عارفه تليفون .. قتله من وين تبيني نحكي ؟
قالي كل شي ..
قتله إنت تعرف كويس إني كنت ع علاقه بشخص .. قالي به !!
قتله لما روحت طرابلس بعتلي الجهاز هذا مع غنى اختي ..
فجأة تغيرت ملامح حسين .. وجهه تغير .. وجهه في الارض ما يبيش يقيم عيونه فيا بكل ..
قتله أنا فتحته الجهاز هذا يوم الحنه .. و ما يهمنيش الي فيه .. بما إنك حسين دسيت عليا كل شي .. و من المفروض تحكيلي .. كيف كلمته ؟؟ و ليش كلمته .. مفروض عندي ......
فجأه قام إيده 🤚🏻🤚🏻 و ما يبيش يشوفلي بكل ..
سكتت انا بمجرد ما قام إيده ..
قام راسه فيا .. عيونه يقدحوا شرار .. لدرجة إني خفت منه .. قالي هنا 👇🏻 في حوشي أنا ردي بالك تجيبي سيرة ذكر .. و لما نبدا مش راجل وقتها نجيك و نقولك صار و صار .. و المفروض الي تحكي عليه أنا نعرفه أكثر منك ..
و طلع من الدار و خلاني ...
حسيت بتأنيب الضمير .. أنا شن الي درته ؟؟ فعلا لو جى حسين و قالي انا كلمت ماجد او تلاقيت معاه او هددته كان ح يطيح من عيني ..
ليش هكي يصير في أحلى ليله في حياتنا .. 💔😢 ...
فجأه انتبهت و كأن في حد قالي زعمه حسين يعرف ان انا كنت عند ماجد في الشركه ؟؟ يعرف انه ما كانش حادث ؟؟؟
اااااااه ياربي .. كله بسبب التليفون .. به شن اندير ! نمشي نفول لي حسين كل شي و نرتاح ؟؟
لا لا انا لو قتله مستحيل يسامحني .. مستحيل يرضاها على نفسه يقعد معاي ..
طلعت من دار النوم لقيته في البلكونه يدخن .. لفيت ايديا ع صدره و حضنته .. حطيت راسي ع ضهره .. قتله حبيبي .. تلفت لي حطيت ايديا ع لحيته .. نحالي إيديا .. قالي نبي نطلع شويه و تو نجي ..
قتله لا لا حسين ما اديرش فيا هكي ارجوك .. أنا نسيته و الله نسيته و نسيت كل شي ...
قالي نسيتيه ليش جايبه تليفونه ؟؟؟
قتله نسيته في الشنطه و الله نسيته .. قالي انا بنطلع و انتي خشي ارقدي ..
شديته من ايديه قتله الليله دخولنا .. انا حلالك ... حسين احنا مع بعض .. انا نبي نكون مرتك الليله ..
قالي انتي مرتي من شهور و امنعتيني نمسك .. ماهو كنتي حلالي .. مش ح يتغير شي الليله .. و طلع و خلاني ...
يا ربي شن الي صاير هذا ! مكتوب علينا يا نادرة كل روايه تكتبيها تعذبينا في ليلة دخولنا .!!!!
خشيت دار النوم .. راسي بيتفجر من التفكير .. غلطه وحدة في ماضيك تقعدي تخلصي فيها طول عمرك و بياكلك الندم .. بينما الراجل يغلط و حياته تمشي عادي ..
قعدت في الفراش .. تغطيت .. خداني النوم .. نضت الفجر .. توضيت صليت .. طلعت نشوف في حسين جى او لا لقيته ما جاش ..
رجعت دار النوم .. قلبي مقبوض .. قعدت في الفراش .. مع الساعه 8 نسمع في الجراج .. هذا حسين ..
نضت بنشوف من الروشن .. لقيته هو .. قعدت في دار النوم .. خش و جيته طول .. أول مرة نشوفه هكي .. قالي بنخش ندوش و بنرقد ..
قتله حسين ليش تعامل فيا هكي !! شن الي درته انا ؟
خلاص انساه الي فات ..
قالي غزاله انا ما رقدتش بكل .. خليني نستريح .. خش الدوش و طلع لبس و خش للفراش بيرقد ... قعدت نبكي و الدموع الي ما نزلوش الليله قبلها نزلتهم كلهم اليوم ..
تلفتت له و هو راقد في الفراش .. و من غيضي قتله من الي مفروض يحاسب التاني ؟؟ منو قولي ؟؟ نوض احكي معاي .. تلفت و قعد يشوفلي و ساكت ما نطقش بي و لا كلمة ..
احكي حسين منو الي يحاسب التاني !!! نقدر نعرف ليش كنت تهدد في ماجد ؟؟
ليش قتله انك خطيبي و احنا وقتها مزال حتى مش علاقه ؟؟؟
ليش ما قلتليش ان ريهام كلماتك ؟؟ ليش تتصرف من غير اذني ؟؟
من الي اعطاك الحق تقرر مصير حياتي و تباعد ماجد عليا .. ناض من فراشه و ضربني كف .. و شدني من شعري .. قالي لما نبدا مش راجل وقتها انطقي اسمه قدامي ..
و طلع و خلاني .. انقهرت قهرة ما يعلم بيها الا الله .. أنا كنت نحب ماجد .. نحبه .. و حسين هو الي باعده .. بكل أنانيه ما احترمش فيها حتى مشاعري ..
و بعد ما تعلقت بيه هكي يدير فيا !! تي من الي مفروض يحاسب التاني ؟؟؟
قعدت في الدار نبكي .. لين حسيت بوجع في عيوني و راسي ..
الضهر اتصلت بيا خالتي .. رديت .. قتلي كيف حالك و فايقه او لا ؟
قلتلها الحمدلله بخير .. قتلي صوتك تعبان شكلك ساهرة مبارح 😀
قتلها اها ايه ايه ..
قتلي الحوش زحمة هنا .. كلهم عندنا .. قتلها به ربي يدوم لمتكم يارب ..
قتلي شن صار ؟ تهنيتي ؟
ارتبكت و ما عرفتش شن نرد .. قتلي قولي عادي ما تتحشميش مني ..
قتلها ايه .. فتحت خالتي المايك و قعدت تزغرط .. و الي في الحوش كلهم يزغرطوا ..
و أنا نبكي .. قتلي هيا عاد بلا دلع بديتي امرأة توا شن الدموع هادوا ليش ..
قتلها لا عادي ما في شي .. قتلي تو نجيك بعدين ناخد الڤيلو .. قتلها به ..
صكرت الخط و قعدت نبكي ..
كيف يتجرأ يمد إيده عليا كيف .. اخخخخخ وجع في عيني ..
No name ♥️🌺
