جريت عليه بسرعة وختيت يدي علي خشمو ،، الله يرضي عليك ما تتفعل ودموعي جرو غصبا عني لاني عارفة هيثم عصبي وممكن يعمل فضيحة هسي دي ويقعد يجوض ويكورك ،،
هيثم هيثم انا عارفة الموضوع خطير شديد بس كمان لو حصلت فضيحة الناس دي كلها حا تشيل حالنا وما بتسكت وانت عارف ،،
قعد علي الكرسي وبقي خاتي يديه في راسو ساكت ما نطق حرف لما خفته عليه،،
قعدت علي الارض جمبو وختيت يدي علي رجلو هيثم رد علي العصبية والجوطة ما حا تجيب نتيجة ما لازم زول يعرف غيرنا ،، نلم الموضوع سريع ونعرسهم ،، قلت شنو ،،
كويس يا راجية كويس
اتصدمته لما رفع راسو وشفته الدموع في عيونو..
ياالله كسرة الراجل في شرفو بتكون مؤلمة بطريقة..
ما قدرت اواسيه كيف غير اني ختيت يدي علي يدو وضغطها قوي ..
معليش يا هيثم مع انو الكلمة دي ولا شي قصاد العملوه دا واكيد ما حا نمرر الموضوع دا ساي حسابهم معانا ،، بس هسي نلمو اول انت سامعني ..
كويس
الاقيك بكره بره البيت نتفاهم نعمل شنو ..
ان شاءالله
طلعت قدامو لما اتاكدته ماف زول حتي جا طلع ومشي..
ما قال اي شي تاني بس اتمنيت من جواي انو هيثم يقدر يمسك اعصابو وما يعمل لي سمر حاجة والله يعدي الليلة دي علي خير ..
ما جاني نوم طبعا من القلق والتوتر الفيني نمته قريب خمسة وصحيت قريب سبعة بي صوت التلفون الووو
هيثم
اطلعي منتظرك نهاية الشارع في العربية
قمته ولبسته سريع ولبست بتي للمدرسة وطفعنا ،، وقت شافت عربية ابوها هييي ماما انتي الليلة ماشة معانا ،،
اي يا ربا بس ماف زول يعرف اني كنت مع بابا غيرنا كويس يا ربا.
حاضر بس ليي؟
عشان ناس الفريق حاسدين وما عايزننا نكون مع بابا ..
طلعنا العربية وصلنا ربا علي المدرسة ،،
قلت ليه خلينا نتكلم في العربية انا ما ناقصة حد يشوفني معاك بره ويعملوني موضوع ..
🔄 بي هنا مع سمر و وعد
وعد جات لي سمر من صباح الرحمن طيران دخلت غرفتها،، اصحي يا بت اصحي
في شنو ياخ خلعتيني
نايمة لي شنو قومي اقول ليك الحصل
اتنفضت طوالي وقعدت لي في نص السرير اها بشريني..
مبروووك يا قمر خطتنا نجحت ..
قولي والله يعني حا اعرس فادي
ههههههه ايواااا وبي مزيكا كمان
وحكت ليك لي سمر السمعتو بالليل بين راجية وفادي ..
يلا مسافة تلبسي النجري البس خلينا نمشي المدرسة لازم نمغرز اريج وعلياء،،
🔄 نرجع ل راجية وهيثم
اتفقو يجيبو سمر وفادي ويفهمو منهم اول الموضوع ويتكلمو معاهم بي وضوح..
ام راجية لقت الشاي خلص جات صحت فادي حلف ما يقوم ليها وكالعادة بقي بجوط وجرا الغطا ورقد تاني ،، ماف زول ترسلو غير تمشي براها ،،
طلعت لاقتها نعمات بيتها قدامهم علي الشمال ،،
ازيك يا سميرة الليلة مالك ماشة وين من الصباح حالتي جاية عليك اشحدك خمار عجين ..
تقولي شنو الشاي كمل والولد حلف ما يقوم يترسل وياهو ابونا ما بقدر يمشي الدكان عارفة كراعو واجعاه ..
اي والله الا امس ناس منيرة ديل مالهم..
[ منيرة ام هيثم ]
مالم ؟
بري بس ولدي الحاج قال شاف هيثم زي 12 نص الليل كدا دخل بيتكم وزي راجية فتحت ليه الباب ،،
هيثم !!!
بري يكون الحاج بتخيل يختي البجيب هيثم انصاص الليالي عندنا شنو..
انا قلت امكن رجع راجية ولا حاجة..
قصدك شنو يا نعمات
لالا ما تفهميني غلط يا سميرة ، امكن دا فادي والحاج ما شافو كويس والدنيا ليل ..
ام راجية مشت جابة الشاي وجات لقت راجية لسه ما جات بقت منتظراها ،، قبل تدخل البيت كويس
راجية!!
نعم يا امي
امس بالليل هيثم دا جا هنا؟
اتخلعته طبعا ورديت ليها طوالي لالا كيف يعني؟
دا جارتنا نعمات الممسوخة دي دايرة تخرب ليك سمعتك قال الحاج قال ليها انو شافك فتحتي لي هيثم الباب نص الليل،،
بري يا امي مافي كلام زي دا البخليني الاقيه شنو وانتي عارفة البينا انتهي ...
مرا ممسوخة وانا عارفاها دايراه لي بتها البايرة دي ..
عايزاه لي منو يا امي؟
الفريق كلو بحكي بالموضوع دا انو نعمات ومنيرة الايام دي متصاحبات ،، وانها منيرة دايرة رغدة لي هيثم ...
شنو بتين دا حصل؟
وانتي مالك بيه يعرس ولا يحرق بعد العملو فيك اوعي تقولي راجعة ليه،، دا جابك دمعتك في عينك وبتك في يدك ،، ابوك حي الدنيا دي ما حصل مدا يدو عليك ،، واريت لو امو واخواتو ادوك حقك ديل ما خلو ليك جهة ولا نبذة ما لصقوها فيك ،،
امي عليك الله انسينا من السيرة دي انا زاتي ما بحب افتح الموضوع دا ودخلت جوه جيت الصالون..
فادي فاادي قوم اصحي
ياخ في شنو يا راجية؟
قوم لازم نطلع مشوار
ما ماشي مكان انا خليني في حالي..
ربع ساعة والقاك اتسوكته واستحميت وغيرت هدومك دي انت فاهم ..
🔄 وعد وسمر
جو المدرسة وكالعادة في طابور الصباح اول ناس يطلعوهم في التفتيش اليومي ،، مناكير ،، تلفون ،، كحل وروج ،، مراية جوه الشنطة ومكياج معاها..
التلاتة حصص الاولي تفوتهم زي ما حاصل شي ..
انتي يا سمر اها المرحلة الجاية حا نعمل شنو؟
وكان انكشفنا طيب واطاتنا اصبحت بتكون..
وبعدين اريج مستحيل تسكت ليك بالبساطة دي ياخ دي شديدة وانتي عارفاها ...
مش هي اتحدتني انو فادي ما بعاين لي وانها لابساه خاتم ،، انا جبتو ليها من اخرو وحا اعرسو ،، خلي الخاتم دا تختو منظر ..
سمر انا ما مطمنة تفتكري راجية كلمت هيثم..
ممم لالا يابت ما بتكلمو انتي عارفة انهم ما بطيقو بعض بقو خلي تكلمو شنو الموضوع ما خطير كدا ما تخليك خوافة ..
سمر ووعد اولياء اموركم منتظرنكم بره لي موضوع ضروري ...
الاتنين بي صوت واحد شنو ؟
يتبع
فاطمة قسم الله✏
