فادي !!!
لا حولا ولا قوة الا الله
حيلي برد ومات ،، استغفرتك يا مالك روحي ، استغفر الله ، قعدته في كرسي التوليت ، ودمعتي جرت سخنة ، لي يا فادي تعمل كدا توطي راسي وراس اسرتك ،، التربية والثقة الادوك ليها كلها دي مسحت بيها الواطا ،، راسي كان داير يتفجر ،، وما باقي لي الا اولول بي طول حسي واشق هدومي اللابساها دي ،، لي يا ود امي وابوي تعمل فيني كدا ومع منو ،، نسابتي عملت ليك شنو انا داير تخليهم يلقو فيني فرصة بعد الزمن دا كلو،،
قمته وقعدت جمبها
سمر ،، اسمعيني هنا الكلام البقولو ليك دا تفهميه شديد وانا ما بخليك ،، بس عايزة منك حاجة خشمك دا عندك ماف زول يعرف بالحصل انتي فاهماني..
حاضر يا خالتو
تمشي من دربك دا وتقولي لي امك انك انتي و وعد عاملين ليكم معسكر قراية عشان كدا ح تقعدي معانا ،، وانك ما بتقدري تقري في البيت لانو جايط بي اخوانك وناس البيت ،، وان وعد عندها استاذ بجي بشرح ليها عشان كدا حا تقعدي معظم الوقت معانا ،، فهمتي كلامي دا يا سمر ..
فهمتو يا خالتو ..
ما تخافي انا حا اخلي فادي يعرسك وتصلحو البلوة العملتوها دي ،، من جواي كان نفسي الم فيها اضربها ضرب لاني دمي كان فاير بس مسكت اعصابي علي بالقوة ،،،
قومي غسلي وشك دا وبطلي البكي عشان تمشي البيت ،، الننادي ليك وعد توصلك ،،
اديتها الصابونة ومشت علي الحمام..
جيت لي وعد قومي يا سجم ودي البت دي بيتهم وكدي اتاخري هناك عشان اقص رقبتك دي ،، ومن يوم الليلة حا تشوفي وش تاني مني بعد الحصل دا انتي والحيوان التاني داك ،، وحسابو براه دا ،،
لبست التوب ووقفت ليهم جمب باب الحوش ،،
امشو سريع وبطلو الونسة ..
وعد و سمر دخلو البيت واتفقعو بالضحك ،،
وااااي لكن يا سمر انا زاتي صدقتك يابت انتي طلعتي داهية وممثلة بي طريقة خوفتيني انا زاتي بكيت صحي صحي وقلت البت دي عملت بلوة معناها جادة ،،
استني علي يا وعد ،، عشان اريج ما تتحداني تاني هي قايلا روحها شنو ،، بس حا اجيبا ليها كبيرة كان ما خليتا ينقلوها المستشفي صبرك علي ،،
طيب ومازن حا تعملي معاه شنو؟
يابت مازن شنو ،، دا ود امو ما بنفع معاي ،، شفتي الود الكل كلمة يقول ليك النكلم ماما ،، ماما ما بتخليني ،، اوعي دا زحي منو طوالي ،، ما بتستفيدي منو اي شي ولا بصرف عليك قرش لا بجيب ليك ايفون 7 ،،
هسي خلينا من دا اسمعيني شوفي الحا يحصل وكلميني طوالي منتظرة الشمار انا ما بنوم كان ما عرفته بموت باقي الليل دا ...
ههههههههههه تموتي يا كريهة بعد العملتيه دا يا فالته وقبل نتم ضحكتنا التلفون ضرب ،،
الليلة ووووب دي راجية خلاص خلاص اشوفك يلا باي ،،،
وعد جات راجعة وقبل تطلع لاقاها هيثم قدام خشم الباب ،، وعد ازيك مالكم في حاجة ..
لالا يا خالو بس جيت وصلت سمر كانت بتقرا معاي.
تصبحو علي خير وطلعت..
جات علي راجية قبل تصل كويس
حالتي وصيتك ما تتاخري وخليتيني مشحوطة ساعة في باب الشارع يا بت انتي حا تشليني يوم وحا تقتليني بي جلطة ...
اعمل ليك شنو قالوا لي الا اشرب شاي ،،
ادخلي وبطلي نقة كتيرة ،،، واخوك دا بجي الساعة كم تلفونو مقفول..
انا عارفاه ليك بجي ل 12
وعد
نعم
الكلام دا ما يطلع وماف زول يعرف من ناس البيت انتي فاهمة ،، ولا تتكلمو بيه يسمعكم زول ..
حاضر
جيت داخلة غرفتي احييي والله لسه ما مصدقة الحاصل ،،،
سرحته في قبل شوية وقت كنت واقفة في الباب منتظرة وعد..
راجية !!!
الموقفك بالليل في الباب شنو؟
منتظرة وعد
ادخلي جوه وعد طايرة يعني ما حا تجي هسي وارفعي توبك دا في راسك فوق ...
هو دخلو شنو واقفة ولا ما مغطية راسي ما عندو كلمة علي ،، وانا الهبلة بي كل بساطة رفعت التوب ودخلته لي جوه ،، مالي رخيت قدامو بالطريقة دي ولا دا الشوق ،، حنيتي ليه يا راجية مش بعد العملو فيك لسه بتشتاقي ليه وهو ولا سائل عنك ساي ،،
الله يلعن الشوق وسنينو
عاينت لي ربا كانت نايمة
بتشبهو...
بتشبهو شديد ،، الحنك السنين والاضنين الطايرات ،، الحواجب الغزيرة المقرونة ،، عيونا الناعسة ،، كأنو اتخلق فيها ،، عشان قدر ما اشوفا اتزكرو بقي زي الوصمة فيني ما قادرة اهرب منها ،،
اهرب كيف وهو قدامي في شكل بتي البتحاشي مرات اعاين ليها ،،
🔄فلاش باك
ااااااه يا هيثم انا حا اموت والله حا اموت ،، انا ما عايزة الطفل دا طلعو مني حا يقتلني يا هيثم حا يقتلني اااااه .. كنت بصرخ وبتلولو بي طول حسي وانا في غرفة الولادة حاسة بي وجع الدنيا كلو ،،
راجية عضي علي يدي قدر ما تتوجعي انا جمبك ،، وقتها شفت حنانو وخوفو وقلقو علي وهو دموعو نازلة وماسك يديني وبقرا في القران ،،وبردد لي قولي وراي ...
لما جات بت وشالا بي يدو وقربا علي ،،
شايفة بتشبهني كيف قلت ليك انا جيناتي قوية ما تعشمي انهم يطلعو بشبهوك،،
وانا تعبانة كنت وغالبني الكلام رديت ليه بعدك تاني ما بخليك تقرب مني ...
ماما ماما...
صحيت من الحلم الحلو دا
ربا مالك صحيتي
عايزة اشرب ،، حاضر دقايق اجيب ليك موية واجي..
عاينت لي الساعة ال في الحيطة لقيتها عشرة ونص مشيت علي الصالون لقيتو فاضي ،،
دخلت المطبخ شلت الموية وجيت ،، ربا شربت ونامت ،،
بقيت قاعدة منتظرة فادي وداخلة وطالعة قدر ما اسمع حركة جري اطلع ما القي شي ،،
لما 12 دي جات طلعته وقعدته بره في السرير
كرب فتحت الباب دي نطيت معاها ،، خواااافة لكن الليلة الخوف نسيتو وانا منتظرة فادي ،،
راجية !!!
المقعدك نص الليل هنا شنو
[فادي اخوي الاصغر مني عمرو 22 سنة خريج]
وقفت بقيت بعاين ليه مسافة بالذات لما ودا يدو لي ورا بالجمبة ،،
بتشرب في سجارة مش ،، كم مرة قلت ليك بطل شراب السم الهاري دي وكلامي لا بجدع لا بجيب الحجار ،، ارميها وادخل الصالون قدامي ،،
جدعها ودخل ..
جيت وكنت صحي شايفاه عشرة عشرة ،، دخلت وراه وكرب كرب طبلت الباب وصلتو ليك وكفين نزلتهم فيه ،، الليلة يوم الكفوف العالمي بقي لي ،،
يا حيوان يا سافل يا قليل الادب ونزلت نبز فيه بدون احس بي روحي ضربتو ضرب لما قعد يبكي ،، يدي خلاص شعرت بيها اتشلت ،،
كان مصدوم بعاين لي وبقي بقول لي والله اخر مرة تاني ما بشرب سجاير والله اخر مرة،،
اتخلعت وعاينت ليه ،، انت بتستهبل لسه انا خابزاك وعاجناك يا فادي والشلة الصايعة المباريها لي دي كلهم جايبة خبرهم اخر الزمن تباري البعملو فيه وتبقي زيهم ،، انا اختك الكبيرة عارف يعني شنو؟
يعني موكلة اربيك حتي لو بقيت راجل،،بس ما راجل علي طول حياتك ...
اديتك الثقة بس يا خسارة ما اتوقعتك تضرب بيها الحيطة وتبقي منحل وفاشل وما نافع ..
وقت عايز الحاجات دي ،، كان تجيني بالحلال والله اعرس ليك لا هو عيب لا حرام ،، انا دي بتم ليك اي شي والبيت كبير تسكنها هنا مالو،، لكن من ورانا تعمل الحرام وتوسخ سمعة اهلك بالطريقة دي ،، لي يا فادي وانا القلت انك خلاص ح تبقي راجل البيت بعد كدا وتريحني ...
كان منطط عيونو وقعد يقول لي انتي مجنونة بتقولي في شنو..
انتي جادة في الكلام البتقولي فيه دا ،، انتي قصدك شنو ،، انتي ما ضربتيني في السجار وبتخرمي بكلام من راسك ...
فادي اسكت اسكت واسمعني هنا ولا كلمة ما عايزة اسمعا منك لاني بطني طاااامة بقت ،، الاسبوع الجاي حا نخطب ليك سمر والعرس بالكتير خلال الشهر دا ولا كلمة ما تنطقا لانو حا يكون موتك علي يدي ما يد هيثم ....
طلعته من الصالون ورزعت الباب وراي من دون اسمع ولا كلمة من فادي الخليتو واقف فاتح خشمو زي الاهبل وعارفاه بستهبل علي ...
مسكت التلفون في رقم هيثم والوقت متاخر بس بقت كل تاخيرة محسوبة علي ،،
وتوووت دقيت الرقم ....
يتبع
