عيلة شايشة

البارت التاني

_
_
{ بسم الله الرحمٰن الرحيم }

{عيلــة شايشــة }
البــارت التاني

في البارت السابق ⏮
وفجاة سمعو صوت احمد من وراهم يصيح :هي انتي وياها

فتحت روميساء عيونها علي وسعهم وشهقت وهيا تشبح لروسم لشدت نفسها وتلفتت لأحمد لجايهم وشبحت بطرف عينها لروميساء لتمتم:اشهد ان لا اله الا الله واشهد ان محمد الرسول الله

قراءة ممتعه💛
#البارت_التاني

قرب عمهم أحمد منهم  في لحظة صدمة و غباء منهم قعدين فيها يشبحو لبعض ويشبحوله من غير مايردو علي مناداته ليهم .

احمد:خيرك انطرشتي انت و هي ؟

خدت روسم نفسها بتوقع كف يجيها علي وجها بعد ردها :اااا انعم
وتلفتت لروميساء لتراجي في اجلها :نعم يا عمي

احمد:نبيكم تفتلكولي صفرة فطور اني وصاحبي ، عمتكم مش فاضية عطيتها تغسلي حوايجي

زمتط روسم ريقها وشبحت لعمها لكمل كلامه:وتعالي جاي انتي وياها ماتتحشميش ملوحين لمكانس قدام المربوعه ومش لامين التراب قدام صاحبي ، برو ديرونا فطور وزودو كملو كنس من غير تهدريز وضحك قدام الراجل

هزت روميساء راسها بالقوة وبخوف :حـ حاضر هو قداش عندنا عم من عيونا زوز

استغرب أحمد من رد روميساء و ضيق عيونه :شن هالاسلوب لعسل هدا ، ربي يستر ما تكونش وراها فالطة

ردت روسم بسرعة:لالا هيا روميساء باش نديرو الفطور خير ما يقعد يراجي الراجل ، عيب قدام صاحبك ياعمي مخليه بروحه برا برا
وخشو هما الزوز للحوش يجرو للكوجينة و اول ما خشو شبحو لبعض بعيون مصدومة خايفة .

روسم:حي حي ربي سترها و الحمد لله

روميساء:المصيبة مش في عمك في التيلو اللي راقد في المربوعة ربي يستر و يسكر فمه

روسم:اي والله اااه يارب شن لخششنا حني بس

و فجأة تبسط عليهم عمتهم سالمة :شن تفتفتي انتي وياها و لا تبوني اناديلكم احمد

ردت روميساء طول بخوف :لا شن تناديه خليه مرتاح

تلفتت روسم لـ روميساء و قالت بهمس واطي: غر كان تمشي تغسلي الحوايج و تخلينا في مصيبتنا

فنصت فيها روميساء وهيا أدف فيها قبل ماتتلفت تفتح التلاجه : سكري فمك وطلعي الصفره

فتلكو روسم ورميساء صفرة فطور مدلعة ولا عمرهم داروها لـ روحهم .

.

عيطة رنت في الحوش بصوت عالي من روان:ماماااااااااااااااا

جت هُدى تجري للمطبخ بخلعة :خيركم شن في

واول ماخشت للمطبخ قابلها هداك الرز المخلط متفرش علي الارض توسعو عيونها و فتحت فمها من الحوسة اللي صايرة و شدت راسها و بدت تدعي بصوت واطي من صدمتها :عطيكم سحيقة عطيكم عفريت يعفرتكم منييييي اللي بزعه حي عليكم حي
و ما خلتلهمش فرصة يتكلمو وطبست خدت الشبشب لقدامها و بدت فيهم بالعمياني