سلام وعليكم
شلونكم مشتاقين حبايب
اسف علاطاله بنشر
بسبب ظروف العمل
#عشقته_حتى_اذلني
البارت الثاني
❤ مواجهات
مودة:
وصلنا بيت جدي اني اكبر اخواني وشويه اتذكر عنهم شغلات وكلها مو حلوة وما تسر كنت من رأي امي وما اريد اجي لهنا لان اسلوبهم ويانا دائما كان خشن وكلامهم جارح اني صح هادئه واسكت هواي واعبر هواي شغلات بس ما اكدر اشوف احد من اهلي ضايج لو متأذي ولو فكر اي شخص يضايقهم اني اللي راح اكون الصد اله بيت عمي ابو خضير اتذكرهم بطفولتي هو وزوجته كانوا زينين بس زوجة عمي ابو نذير وعمتي سهيلة همه سبب اذية امي وابتعاد اهلي منا
استقبلونا من الباب وكان استقبالهم حلو بس لساهم الاشخاص اللي اذونا قبل على نفس المنوال ما متغيرين يباوعولنا خزر
اول ما نزلنا اجت عيني بعين شخص اعرفه زين وياما لعبنا سويه صح كان اكثر لعبنا عركة وعناد وغيرة بس كان مثل اخوية خضير ابن عمي الجبير اكبر مني بسنتين
اول ما شافني ابتسم او بالاحرى ضحك اكيد تذكر من جنت اوكعه بالتراب واوكله تراب لان جسمه انعم واقصر مني واكدر اله رغم هو اكبر بالعمر هسه خضير صار الشيخ خضير طبعا اني هم من شفته تلقائيا ابتسمت لان اتذكرت شلون جنت صاكرته وما اخليه يفك حلكه رغم فرق عمرنا بس كان يخاف مني
تغدينا وبعد ما كملنا والكل راح بقينا احنا كاعدات ننتظر احد يجي يدلينا البيت اني اضوج من السفر وكان سفر متعب وبس اريد اغير ملابسي
شويه ودخلوا الزلم سارة ركضت لبابا هالبنيه تبقى بهالطبع مثل الزعاطيط ولا تكبر شكد انبهها على هالشغلات وتسرعها واندفاعها الكل انتبه لتصرفها وخزروها وهي مستمرة ولا كأن حواليها ناس هي ما شايفتهم ولا تعرفهم ضليت اني اغلي اريد اسحبها من نصهم والادهى من هذا كله انتبهت لنذير يباوع بنضرات قبيحه مثله ومثل امه ردت اروح اطلع عيونه
مرت فترة وانتبه واحد من ولد عمي على الموضوع ونبه على ريم تجي تاخذنا نغير ملابسنا ونرتاح واخيرا
صعدنا للطابق الثاني ودخلنا للغرفه كانت كلش حلوة وبناتيه غرفة ريم وكانت بيها ٣ أسرة وكنتور كبير كلش وكله باحدث طراز واحسن اثاث بس وصلنا انتظرت ريم تنزل دا اتفاهم ويه خواتي لازم يلتزمون اكثر بتوجيهات ماما وبابا
-سارة هاي شنو هالتصرفات تكمزين ومجلبه بايد بابا شوفي احنا جايين هنا ضيوف ونروح اولا لازم تلتزمين باعلى درجات الهدوء ومو بس هيج لازم نعكس رقي ورزانه لان انت ما تعرفين عماتج شلونهن وشلون يضوجون من عدنا وشنو يكولون عنا انت ما انتبهتي بس كلهم جانوا ينظرون بنظرة اشمئزاز النا
-دخيلج مودة لا كلش تضلميها تعرفيني دا احاول بس والله ما اكدر هو طبعي هذا وعالعموم تأمرين جلالة الملكة سمو الاميره معالي حضرتج راح التزم بالتوصيات والبنود الخاصه بالاسرة الملكيه وراح اتصرف بمنتهى الالتزام بس فكي مني تره مختنكه منهم ومن نضراتهم
-اي حبيبتي اني لمصلحتكم احجي لا تصنفين عليه ادري دائما تباوعيلي على انه اني كائن غريب من غير كوكب بس هذا الاسلوب هو اللي ينفع ويه عمتنا سهيله وزبانيتها اللي راح تعرفيهن
وانت غدير ليش هالمره ما تسمعين مني مو كلت الج لا تتقربين لجدتنا لان انت ما تعرفين شنو اللي ببالهم من كل هالزيارة
سارة:شنو غير معزومين عرس بنت عمنا ابو نذير نهى لابن عمي خالد سنان
مودة:لا مو بس هاي جدتنا الحنينه تريد تربطنا اكثر هنا وتريد وحدة من عدنا تبقى وجابونا حتى يختارون لواحد من شبابهم اللي ادعوا الله يبعدنا عنهم وعن شرهم وما نعجبهم اريدكم تصدون وتحجون واني اللي راح اخليهم يشيلون هالافكار ويقتلعوها من راسهم
غدير: تره جدتنا تبين زينه وما عدها هذاك الكره والحقد علينا بعدين شعلينا بيهم احنا اسبوع وراجعين
ساره كاعده يمنا بس كعادتها بغير عالم مو ويانا مرات اريد اضربها كثر مو ببالها ولا مهتمه لو تنكلب الدنيا هي اخر همها صبغ اضافرها لا يتخربط لو الريميل يطلع مو صحيح
سارة: اووو شنو هالملل حتى اشارة نت ماكو هذوله شلون عايشين
مودة:سارة انت ويانا عالاقل بيني انه انت مهتمه لكلامنا هسه يعني راح تموتين اذا ماكو نت يلا غيروا ملابسكم حتى ننزل وما اريد وحدة منكم تتصرف اي تصرف بدون علمي او بدون ما تاخذ راي
سارة :مودة لا تقفلين فد مره ما راح ياكولنا تره
عصبت لبرود اخواتي لان ما يعرفن شلون حيايه اكو بهالبيت وما اعرف شراح يلاكينا
نزلنا وتلاكينا ويه عمتي وجه لوجه وهي ساكته بس وراها كلام هوايه بس ساكته ابتسمت ابتسامه غريبه لغدير وفاتت احنا كلنا صافنين عليها
دخلنا للصالة والدي مبتسم اني عرفت صار الاتفاق وضل الوقت اللي يخبرونا بقرارهم ضليت الوب خواتي اندمجوا يسولفون واني التزمت الصمت اريد اعرف اللي صار
ريم اقترحت نطلع نشوف البساتين والكاع وطلعنا وياها ومشى ويانا احمد ومرتضى لان بنفس عمره وصلنا المكان يجنن كلش حلو بساتين عامره بالفواكه والنخل ويجري نهر اروائي كبير بمحاذاتها اني وصلت للنهر وروحي هامت بجمال المكان كعدت اتفرج واسمع خواتي واحمد والبقيه يضحكون ويركضون جفلت بصوت ورايه
-ها مودة حلو المكان
-خضير
-شلونج
-الحمد لله وانت
-هاي شنو صايره شابه وكبرانه صديقتي
خجلت من كلامه
-انت هم متغير بس عرفتك اول ما شفتك
-تذكرتي شي اني بصراحه ما كدرت الزم نفسي وضحكت تذكرت من جنت اكتلج ههههه
-متأكد جنت تكتلني هههه
-عيب اسكتي ميصير تحجين هسه اني الشيخ اكو شيخ ياكل تراب هههههه
-هههه
-هسه لازم اردها الج جنتي كادرتلي النهار كله تمرغلين بيه الا اوكلج تراب
-اخاف تردها وهسه وهم توكع بيها احفظ مكانتك يا شيخ هههه
-والله عاد انت تخوفين
-هههههه
-مودة
-نعم
-ينعم عليج صديقتي عندي سؤال
-اسأل
-انت تعرفين ليش سوولكم العزيمه وصمموا تجون كلكم انتي واخواتج
-ها اي ادري بس اخواتي ما يكدرون يعيشون هنا خضير عفيه ساعدنا ما اريدهن يتبهذلن
-زين خواتج ما تريديهن يتبهذلن انت اذا وكع عليج الكلام تقبلين بواحد من اخواني
-اخوانك اصغر مني وبس جعفر بعمري واكيد ما راح يكون هو اللي يزوجوه
-جعفر والا غيره بس انت ما تتزوجين سمعتي ترفضين لمة اشوف حل
ضليت صافنه بوجهه تغير كليا من وجه يضحك الى عصبيه ووجه احمر يريد الدم يطلع منه واوردة كصته طلعت كام وعافني هذا شبي مخبل شنو قصده عزه بعيني لازم نرجع لبغداد خضير متزوج وزوجته بنت عمي ابو نذير عزه شلون لا اكيد لا مو هيج قصده يلا بعد ما اتقرب اله خلي ابقى بعيد عنه وما اتقرب ابد اله
مشيت بعيد وتركت المكان وكعدت وجسمي يرجف كله كاعده غدير يمي انتبهت الي حاولت تعرف شصار سكتت ما حجيت اويلي علينا هم اصعب من هم خواتي يتدمرون هنا اذا تزوجوا اباوع الهن غدير كلش فقيره ما تعيش هنا ابد وساره بعدها فطيره وما تعرف تتصرف
-------
يلا متابعيني صوتواوعلقوا الي منو من الاخوات اللي راح تتزوج من ابناء العم
