يوميات مسلمة

السادسة عشر

#يوميات_مسلمة

#الحلقة_السادسة_عشر

عدي: اما تكملي بنود اللى انا مضيت عليه
ملك: منا كل شوية هضيف حاجة
عدي : خلااااص لا تعطينى ولا اعطيكي وروحى نامى عندك جلسة بكرة الصبح بدري
ملك: ينكد عليك يا بعيد.. بتفكرني!؟
عدي: ههههههه يا بنتي الحق عليا خايف عليكي ومش عايزك تسهري عشان متتعبيش! الساعة دلوقت عشرة مش عايزك ترهقي نفسك
ملك: طب بالله عليك هات العلبة اللى معاك ديه
عدي: والله ما هيجي ليا نوم لو ما اعطيتهالك خدي يا سيتي
ملك: احلى عدي ده ولا ايه!؟
عدي:مرغم على أمره!! هيعمل ايه؟!
********
اخذت العلبة ودلفت الى حجرتها تعبث بما بها لتجد دفتر مذكرات مكتوب على غلافه إلى زوجتي شهقت بفرح وهي تتصفح محتوياتها لتجده يشاركها فيه لحظات فرحه ولحظات حزنه وكأنها كانت تعيش معه منذ زمن وليس فقط تلك الأيام!
دقت الساعة الثانية عشر وهى لا زالت تسبح بين الورقات في تعجب شديد! يحكي قصة التزامه يحكى عن مشاعره وكأنها لفتاة مجهولة الهوية! الآن وصلت للصفحة الأخيرة وجدته كاتبا فيها
إليكِ❤
انا كتبت المذكرات ديه بدون تحديد أنا بكتبها لمين عشان لو ربنا قدر إن يكون ليا زوجة تانية غيرك يا ملك فمكونش مقصر معاها في الجانب العاطفي ومهما كانت زوجتي حتى لو ما اعرفهاش مكنتش هعاملها الا كملكة ربنا كرمني بيها حتى لو مش عن حب مش هحرمها من الحب حتى لو مصطنع! لانه حقها ومرة في مرة المصطنع هيبقى حقيقة طالما انا صادق في رغبتى فى الحب الحلال وطبعا انا مش هتجوز اي واحدة والسلام ولكن هكون مقتنع بيها اقتناع تام ولا هبقى متجوزها لرغبة حد تاني ولا متجوزها لاي سبب دنيوي غير اني خلاص مقتنع ان ديه اللي هتبني معايا البيت الصالح  وربنا كرمني بيكي مش مجرد زوجة ولكن انا بحبك من زماان من لما كنا جيران كنت بتهرب منك بكل الطرق كنت بتعمد اسافر اشتغل في محافظات تانية عشان ما اصطدمش بيكي! اتقدمت لك عشان تبقي من حلالي رغم اني مكنتش وقتها مستعد ولكن كنت بسلك كل السبل الشرعية اللي متضيعكيش مني! واما بعت لك الرسالة ندمت اني بعتها عشان ما اشغلكيش بيا وحسيت بالذنب وانا فعلا كنت غلطان في ارسالي الرسالة ليكي ولكن كلنا بنغلط! ... المهم من غير نكد انتي اغلي حاجة في حياتي بعد الدين..

شعرت ملك ان حياتها تبدا من جديد ألاي درجة خفق قلبها بالحب والفرح كأنه لم يفرح قط من قبل!
قامت بأخذ هاتفها في شغف وهاتفته رنة فالتالية ولم يجب! ولكنها لم تمل ألى أن سمعت صوته مضطرب خائفا من أن يكون سبب المكالمة شيئا يقلق!

عدي بفزع:  أيوة يا ملك في حاجة ولا إيه !؟
ملك: بحبك
اغلقت الهاتف دون أن تسمع أي كلمة اخرى أو تساؤل او تعجب وقامت بوضعه على الطيران.
عدي متعجبا: المجنونة!! ايه اللي مصحيها لحد دلوقتي؟! ... ده الساعة ١٢!! اكيد قرات المذكرات! .. يا الله .. عندها جلسة بدري ولسة منامتش
كيف تنام جوارحها بعدما امتلكها الفرح!! للفرح شعور يفتك الجوارح كما يفتكها الحزن ايضا!.
******
عدي: يلا يا ملك عشان منتأخرش!!
ملك: هصلي بس ركعتين ضحى واجي
عدي: ماااشي ..
ظل منتظرها ما يقرب من ربع ساعة الى ان خرجت
عدي: كل ده ركعتين !! ما شاء الله الخشوع عالي للدرجة ديه
ملك مستنكرة: خشوع ايه الله يسهلك ده انا بتلغبط في الصلاة وكل شوية اعيد نفس الركعتين!
عدي: طب امال في سجود سهو ليه لما انتي كل شوية تعيدي ؟! اما تشكي اسجدى سجدتين عاديين خااالص وقولي سبحان ربي الأعلى عادي خالص وكملى النقص!

زفرت ملك بغيظ: منا عارفة بس بشك بزيادة انا بقيت غالبا بشك يوميا فى صلاتى سواء نوافل او فروض وغالبا بشك في الفروض اكتر

عدي متسائلا: انتي بتشكي كتير ؟!
ملك: يوميا
عدي: ممكن تكبري تكبيرة الاحرام اكتر من مرة؟!
ملك: وبعيد الصلاة كلها كمان اكتر من مرة
عدي: طب بصي اولا ده اسمه وسواس قهري وديه لعبة من الاعيب الشيطان عشان يبوظ صلاتك وكل اما هتصدقيه هيزيد معاكي لدرجة انه ممكن يكرهك في الصلاة وفي العبادات كلها
ملك متعجبة: ايه اللي بتقوله ده يا عدي خوفتني يا اخي!؟
عدي غامزا : مفيش حاجة تخوف احنا اقوى
ملك: بس ده شك عادي!
عدي: لا طبعا طالما زايد وكتير يبقى مش عادي ولما بتسايسيه بيزيد يعنى لو مثلا بتشكى في اليوم مرتين هتلاقي بعد كدة بتشكي تلت مرات وبعدين في كل فروضك وممكن بعدها تشكي فى الوضوء والطهارة بعد كدة مش عايز اقلقك بس ده لما بيزيد مع بعض الناس ممكن تبطل تصلي عشان بتتعب جدا عما تخلص الفرض في ناس ممكن توصل انها تصلي الفرض في ساعة!
ملك: يعنى اعمل ايه دلوقت 
عدي: بصي يا سيتى اولا اي حد ناسي نسيان طبيعي بيبنى عالاقل
ملك: يعني ايه؟!
عدي: منا جايلك اصبري... يعني مثلا انا شكيت صليت تلاتة ولا اربعة هبنى عالاقل يعنى هعتبر نفسي صليت تلاتة واجيب ركعة رابعة واسجد سهو ..تمام كدة ؟!
ملك: اه عارفة ديه
عدي: متحسسنيش ان كلامي مالوش قيمة .. بصي دايما انفخي فيا الراجل يحب النفخ يعنى لو قولت لك الصالة ديه اربع جدران قولي الله ينور عليك معلوماتك قيمة وافضلي انفخي حتى لو كدب انا قابل هتلاقيني بسد معاكي في كل حاجة.
ملك: طب كمل يا ترعة المفهومية يا بحر المعرفة يا هندسة.
عدي: اللي بيشك كتير بقى هيبنى عالاكثر ويعتبر نفسه صلى اربعة مش تلاتة اما يلاقى نفسه بيشك كتير المفروض انه ميلتفتش للوسواس اصلا يعنى لو شكيت انا سجدت اتنين ولا واحدة اعتبر نفسي سجدت اتنين عكس اللى شكه طبيعي ونسيان حقيقى ده هيعتبر نفسه سجد سجدة واحدة انما انا هعتبر نفسي سجدت اتنين
ملك: بجد؟! .. يعنى مثلا انا شاكة صليت تلاتة ولا اربعة والموضوع ده بيحصل معايا يوميا وبيتكرر كتير اعتبر نفسي صليت اربعة وما اسجدش سهو؟
عدي: بالظبط كدة لان استرسالك مع الوسواس هيزوده عليكى فممكن فجاة تلاقي نفسك بتسجدي السهو في كل صلواتك!
ملك: طب وده مش حرام؟!
عدي: بصي يا ملك الوسواس ده ابتلاء والعلماء نصوا   أن المبتلى بالوسوسة مش داخل في الامر بالبناء على الاقل  ولا يأثم بإعراضه عن الوسواس ولكن قد يأثم إذا استرسل معاه وتمادى فيه مع قدرته على خلاف ده
والشيخ العثيمين رحمه الله  أما اتسأل عن الموضوع ده  اللي بيكتر الشكوك في الصلاة قال (لا يلتفت لهذا الشك ولا يسجد له، لأن الشكوك الكثيرة تؤدي إلى الوسواس.)
ملك: يعني ممكن اكون آثمة لو اتبعته؟!
عدي: انتي مش هتعرفي تتغلبي عالوسواس ألا اما تاخدي الجملة ديه في اعتبارك وحتى لو انتى شكيتى صليتى تلاتة ولا اربعة وكنتى فعلا صليتى تلاتة ولكن عشان بتجاهدي الوسواس اعتبرتى نفسك صليتى اربعة ربنا هيعف عنك لأنك في مقام مجاهدة فمعتيش تسمعي للشيطان
ملك بانبهار: العلم حلو .. انت متتصورش انا كنت بعاني من جلد الذات قد ايه بعد كل صلاة؟! ..لا بجد ربنا ما يحرمنى منك ومن وجودك في حياتي
عدي متصنعا ضبط البدلة الغير موجودة في الحقيقة: أيوة انفخي فيا ..
ملك: طب يلا عشان منتأخرش عن الجلسة؟!
عدي: عامل لك مفاجاة بعد ما نخلص د
ملك بالم: بخلص مبيبقاش ليا خلق لاي حاجة
جذبها عدي  من ذراعها وأخرجها للخارج متصنعا اللحاق بأحدهم!! 

هستنى ارائكم 🙈❤ واقتراحاتكم ولو في موضوع معين حابينى اكتب فيه مفيش مشكلة كله شغال 😂💔