يوميات مسلمة

التاسعة

#يوميات_مسلمة

#الحلقة_التاسعة

اخدت الشنطة وقعدت عالسرير عشان افتحها الشنطة لقيت فيها بوكيه ورد وعلبة فيها خمار بنفسجي! ورسالة فى العلبة فتحتها لقيت مكتوب فيها ( أتمنى تلبسيه عالفستان بتاعك انا سبب رفضي للفستان انه ضيق من فوق بس الخمار هيغطي المنطقة ديه واتمنى يكون لبسك كله كدة خمار او طرحة عريضة مش بس لان اللبس المفروض يكون واسع وفضفاض ولكن كمان لان انا غيور جدا ومش هقبل باقل من كدة ... عارف انك بتسالي هو طالما عايزها بلبس معين ما اخدش واحدة كدة ليه من الاول!؟ بس انا اخترتك انتي وشايف انك اهل لده ومتاكد انك مش هترفضى لانك زي ما قولتيلي نفسك ترضي عن نفسك دينيا .. .. انا عارف انك لسة موافقتش عليا اصلا بس انا متاكد انك هتوافقي)

قفلت الرسالة وانا جوايا فرحة كبيرة حسيت ان ده بجد كان حلمي.. فجاة لقيت نسمة بترن
نسمة: عاملة ايه يا ملك؟
ملك: الحمد لله ليكي وحشة والله مشوفتكيش من ساعتين كدة
نسمة: خطوبتى بكرة وبعزمك
ملك: انا عارفة انك نادلة بس ما توصلش للدرجة ديه! ابقى معاكى طول اليوم وتقولى لي قبلها بيوم
نسمة: جت فجاة يا ملك صدقيني لأن والد إسلام مسافر في مؤتمر فهنعملها بدرى عشان يلحق الخطوبة وانا عزمت نور ساعديني في باقي البنات اللي كانوا معانا في الثانوي زمانك عارفاهم
ملك: ماشي يا سيتي مقبولة!.
بابا دخل عشان يشوف رايي في عدي وقررت ايه كنت محروجة اقوله موافقة
الاب: ها قررتي ايه
ملك: اللي تشوفه يا بابا لو شايفة مناسب خلاص
الاب: ديه مش اول مرة يتقدم لك هو جالك قبل كدة ورفضته عشان مكانش عنده شقة
ملك: ما هو دلوقتى عنده
الاب: ايوة بس لسة بيجهز ومعاه سنة او سنتين عما يخلص
ملك: مش مشكلة يا بابا ما انا برضو سني مش كبير
الاب: اممممم افهم من كدة انك موافقة
ملك: والله يا بابا اللي تشوفه!
الاب: انا شايف انك تصلي استخارة
ملك: صليت وحاسة براحة
الاب: يعنى موافقة؟
ملك: حسب رايك
الاب : بعد كل ده تقولي حسب رايي!؟ ده ناقص تحددي معاد كتب الكتاب!
ملك بخبث:  مش بتسالني وبجاوبك؟!
الاب: خلاص على بركة الله .
********
عدي انهاردة خطوبة نسمة ولازم اروح
  قالتها نور لعدي وهو يقرا في مكتبته.
عدي: مفيش مشكلة هتروحي مع مين؟!
نور: لواحدي طبعا... ما ملك مش في طريقي وما اعرفش حد قريب مني رايح الخطوبة

عدي: طب خلاص هاجي معاكي .
نور متسائلة بخبث: هوااا عمو سعيد ابو ملك مردش عليك!؟
عدي: لا هو قال اعطيني مهلة يومين والمفروض الرد انهاردة
نور: امممم اوووك ... طب هروح البس عشان متاخرش
******

انا مكنتش متعودة اصلي قبل ما اخرج بس انا عاهدت ربنا اني لازم هتغير واحافظ على صلاتي اتوضيت قبل ما البس هدومي عشان اصلي العشا قبل ما اخرج وبسبب اني بنسى دايما الصلاة جبت ورق وكتبت عليه تذكير بالصلوات ولزقته عالحيطة عشان كل اما ابص عالحيطة افتكر الصلاة وافتكر انها اهم عبادة هتسأل عنها حطيت عالمكتب وعالسرير وعالباب وكان شكلهم جميل جدا خاصة انى بعرف ارسم والون كويس 🤗
بقيت معظم الاوقات بتوضى حتى لو مش وقت صلاة منها احافظ على وضوئي ومنها مجرد ما اسمع الاذان مكسلش 
صليت العشا قبل ما اخرج ولبست جيبة سمرة واسعة وطرحة بيضة  عريضة تغطي منطقة الصدر وشميز كشمير كنت مستغربة لبسي وقفت قدام المرية عشان احط حاجة خفيفة من المكياج  بس حسيت اني مش محتاجة الطرحة لايقة على وشي جدا وحاسة شكلى حلو كدة قولت لنفسي  المكياج هيزيدني جمال فعلا بس انا مش عايزة ابقى ملفتة للانتباه انا مش عايزة الناس تشاور عليا تقول الحلوة اهي انا عايزة امشي مرتبة ولبسي كويس وفي نفس الوقت مش حرام قررت اكمل المغامرة للاخر واخرج من غير ميكب مع اني مبحطش ميكب كتير اصلا ده يا دوب روج وماسكرا وفى المناسبات بزود الميكب شوية بس المرة ديه قررت اغامر عشان اتعود ما انا الحمد لله حلوة ونسمة مبتحطش وحلوة برضو اشمعنا انا اللي احط عمال على بطال!
ماما دخلت عليا قالت لي ابوكي رن على عدي وبلغه بالموافقة بكرة ان شاء الله هتروحوا تجيبوا الدهب والشبكة كمان تلت اربع ايام عما تجيبي فستان
ملك: بس انا مش هجيب فستان؟!
الام: ليه؟
ملك: عندي الفستان البنفسجي بحبه وعايزة البسه
الام: يا بنتي انتي قابلتيه بيه في الرؤية الشرعية هتلبسيه تاني هي شغلانة ؟!
ملك: حلو يا ماما وبحبه وشايفاه مناسب جدا للمناسبات
الام : مناسبات ايه يا هبلة انتي هتبقى العروسة يعتى لبسك يبقى شيك وجديد
ملك: ما هو فعلا شيك وجديد
الام: طب عدي قال شوفوا مصاريف الفستان بكام عشان هو اللي هيدفع اقوله عندها فستان قديم!؟
ملك: اه ايه المشكلة.!؟ ... ولا اقولك قولي له تكاليف الفستان والكوافير ٤ الاف جنيه.
الام: ودول هتعملي بيهم ايه؟!
ملك: بس قولي له كدة وبصي هفاجئك  .. هفاجئك ايه ده كلكم هتتفاجئوا ... انا لازم امشي عشان الحق الخطوبة
طول الطريق كنت بفكر في عدي وبفكر ان كلها يومين وهبقى خطيبته رسمي واني ابقي عروسة وفستان والدور جاي عليا اي بنت بتتمنى الاحساس ده بالنسبالنا الفستان واحساس الفرحة اهم من العريس نفسه 😂 فازاي بقى الاحساس لو كان قلوبنا مطمنة ومرتاحة للعريس .. كنت فرحانة جدا بجد وفجاة لقيته في وشي جاي هو ونور

حسيت بتوتر ومكنتش عارفة اتكلم لقيت نفسي فجاة بقوله: انت جاي معاها ليه؟!
عدي: انت...؟
ملك: حضرتك جاي معاها ليه اتفاجئت بوجودك!؟
عدي: بنورك ...
ثم تصنع عدم الاستماع والتفت الى نور قائلا اطلعي يلا مع ملك وهستناكم هنا
حسيت انه مش معبرني فزعلت ومعتش فاتحته باي كلمة.
(تنبه هو لغضبها ولكنه لم يبادرها بالاعتذار او الالتفات لمشاعرها لم يجد في نفسه كلمات تواسيها وتكون لها ضماد لحزنها. )

طلعنا عالسلم وكنت مش لاقية كلام اقوله والحزن كان باين على ملامحي لدرجة ان نور حست
نور: مالك.. زعلانة ليه!؟
ملك: مفيش بس هو اخوكي بيحدف كدة على طول؟!
نور: يعني انتي بتنقطي شهد !! انتو  الاتنين شبه بعض اصلا
ملك: عمل نفسه مش سامعني ومردش على سؤالى مبحبش حد يتجاهلني على فكرة
نور: ما انتي بتقولى له جاي ليه! عايزاه يقولك ايه
ملك : ميقولش حاجة .. يلا يا اختي عشان الخطوبة
نور: بس بغض النظر عن كل ده لبسك انهاردة  شيك وجميل يا بختك يا عدي بتفهم
ملك ساخرة: هه ظريفة يا بيه

خلصنا الخطوبة ونزلنا مشيت عكس الاتجاه اللي واقف فيه عدي
عدي : راحة فين استني هنوصلك
ملك: راحة البيت!
عدي موجها كلامه الى نور لتتبعه بالسير مع ملك: يلا يا نور
وصلوني البيت وعدي مفتحش اي كلام معايا نهائي لحد ما وصلت البيت!
ملك : اتفضلوا
كنت بعزم عزومة مراكبية مش اكتر نور ردت وهو ولا عبرني
وده زاد غيظي منه اكتر
وقت الخطوبة حسيت اني لازم اعمل حاجة مختلفة كان نفسي اغيظه