"صوت ضحكتو بقت نغمة يومية لازم تسمعها او يومها بكون ناقص🚶♀️💔.."
ريفان رمشت مرتين و هي بتحاول تستوعب ف الوضع..
لا خلي الوضع..
بتحاول تستوعب ف الكلام..
ف الحروف المرقت من خشم محمدللتو و ترتيبتها مع بعض و الكلمات الكونوها
و المعني البتحملو
حازم دخل ف حادث؟
و ف غيبوبة؟
لبه يومين؟
دقية دقيقة
غيبوبة دي شنو؟
غيبوبة..
غيبوبة..
يعني كوما؟
يعني فاقد الوعي؟
دقيقة فاقد الوعي لكن معناتا حيصحي
لكن غيبوبة..
غيبوبة..
ريفان حاولت تدخل اكبر كمية من الهوا جوا رئتيها لدرجة انها شرقت ع الهوا زاتو و قعدت تكح لانها اتزكرت معلومة واحدة
غيبوبة معناتا ميت سريريا صح؟
المعلومة دي كانت كافية ل انها حرفيا تعمل قايم اووفر ل ريفان..
ريفان جمعت نفسها..
حازم ف غيبوبة..
حازم ف كوما..
حازم ميت سريريا..
ح-
-الوووو...ريفااان..اديني امك اتكلم معاها..
ريفان م ردت..
-الوووو....
مافي زول طلع نفس
وابل و نون م كانو مستوعبين زاتو
اعتقد ف الثواني ديك معني غيبوبة راح من عقلهم زاتو
و لينا تحس ب انو ف شيء ماسكة لسانها ل كم ثانية
-الووووو...رييفااان ريفاااااان..
بعد كم ثانية حتي لينا قدرت ترد
=الو ي محمد..
محمد سكت و استغرب..
دا صوت منو دا؟
لانو دا م صوت اختو ولا صوت اخت ريفان..
-انتي برا البيت؟..منو معاي؟
=معاك لينا صحبت ريفان..نحنا ف الجامعة..ياداب طلعنا من الامتحان..
محمد سكت ل كم ثانية لانو مخو ضرب
-امتحان؟..كيف امتحان..هو انتو م انتهيتو الاسبوع الفات؟؟
لينا استغربت
-لا..نحنا بننتهي بعد بكرة..
محمد سكت مسافة..
كيف؟
م بنتهو مع ناس ميكانيكا يعني؟؟
-ف الجامعة؟؟..طيب هي وين ريفان؟؟كويسة؟
لينا رفعت راسها عاينت ل ريفان..
وشها كان فاضي..
عديلك كدا..
كانت بتعاين ل تلفونها ب نظرة فاضية..
لينا زاتو م فهمتها
=هدي قدامي..
-اديني اتكلم معاها
-التلفون فاتح اسبيكر..هي سامعاك..
محمد بلع ع ريقو
-اسمعيني..انا م كنت قايلك شغالة..م كان وريتك..كنت قايلك انتهيتي من الاسبوع الفات..
ريفان م ردت..
والله هو نفس م قادرة تدخلو
خلي كمان تطلع كلمات من خشمها
-اسمعيني..قزمي امشي البيت..امتحني امتحانك..و تعالي لينا الاسبوع الجاي..للوقت داك م تعملي شيء غير كلامي دا..اكلي نومي اتنفسي و عيدي تاني..م تعملي شيء تاني لحدي م نتلاقي فاهمة؟؟؟..
ريفان م ردت..
-الوو..الوو ريفان قولي الي شيء رد-
صوتو قطع مع قفلتها للتلفون فجأة..
ريفان قفلت ف وشو
لينة عاينت ليها
حرفيا م كانت عارفة تقول شنو
قعدو ع حالهم كدا يس..
الله اعلم المدة القعدوها كدا..
قبل م ريفان تشيل تلفونها و تمسك شنطتها و تقوم..
لينة و وابل و نون قامو وراها..
_لينة..
-امم..
_اديني رقم يوسف ولا نشوة..حالا..
لينة طلعت تلفونها و مدتو ليها
-هاك
ريفان شالت التلفون و ضربت ل نشوة..
كانت واقفة ف نص الكلية بتتلفت حوليها
الشلل البكونو واقفين ف النص ديل خفو شديد
كانت قادرة تشوف معظم الناس لانو الناس مرقو
التلفون بس برن و برن
و ريفان تتلفت
شوية كدا و تسمع ليك نغمة ب وراها ف الركن هناك
ريفان اتلفتت وراها
كان ف بت قاعدة مكومين حوليها كم بت تانية..
البت شكلها كانت بتبكي لانو صوت البكي بتاعها كان مارق
ريفان مشت طوالي عليها
لزت الكم بت ديل براحة و عاينت
نشوة كانت قاعدة و خاتة يدينها الاتنين ف وشها و هي بتبكي ب حرقة..
ريفان دي بس التقول رجعت بالزمن قبل شوية ل الشعور الجاها لمن محمد فتح خشمو
امكن لانو بكية نشوة دي للتو اكدت ليها الكلام؟
او لانو ب كدا لا محال لا محال ه لا بتحلم لا بتتخيل
الشيء دا حقيقة و جد
ريفان قعدت جمبها و نشوة لمن حست بيها عاينت ليها
البكي بتاعها زاد زيادة و مسكت فيها حضنتها
ريفان وشها دا بس كان فاضي
حرفيا م فيه ولا شعور
=ريبييففااااننن..
الالم الكان ف صوت نشوة و هي بتقول ف اسمها قطع قلب ريفان تاني
يحليلها يحليها
=ريفان حازم ف غيبوبة حازم دخل غيبوبة..الولد ع حافة الموت...اسوي شنو انا؟؟..لمن يموت اسوي شنو؟؟
ريفان كانت بس ساكتة
والله تفكير م بتفكر فيه
م تفهم زاتو الضربها شنو
عطل بس
مخها عطل حرفيا بقي م شغالل
صراحة نشوة دي تبكي..
و جزء تسمعو و جزء م تكون فاهماه
سامعة الكلام وكلو
لكن مخها م قادر يعرف دا بكي ولا دا كلام
از م قادر يعرف هي بتقول ف شنو
والله بقي عاطل عديلك كدا
صحبات نشوة هدوها شوية و بفت م بتبكي شديد..
الله اعلم كمان قعدو كم لحدي م يوسف جا..
ريفان عاينت ل يوسف
وشو برضو كان احمر و عيونو حمرة..
حتي هو كان ببكي
هم وروهم كلهم للتو ولا شنو؟
يوسف عاين ل ريفان و عاين ل نشوة
يوسف:قومو اررح اوصلكم انتو الاتنين..
ريفان عاينت ليه
نشوة وقفت ع حيلها و صحبتها بقت ماسكاها..
لكن ريفان م اتحركت
يوسف عاين ل ريفان:ارح اوصلك
ريفان بلعت ع ريقها
اعتقد بعد مرور الوقت دا و قعدتها
الحروف بدو يرجعو ل لسانها تاني
_برجع مع لينا
يوسف عاين ليها ب حدة:ريفان..اسمعي الكلام..
لينة كانت قاعدة جمب ريفان
ريفان عاينت ل لينا
يوسف:قومو بوصلكم كلكم..
لينة عاينت ل يوسف و ريفان
الاتنين كانو منتظرين موافقتها من النظرة الفي عيونهم
لينة:ارح ي ريفان احسن لينا يوصلنا
ريفان هزت ليها راسها و وقفو ع حيلهم
يوسف عاين ل وابل و نون:ارح اوصلكم برضو
نون:عندنا كم شغلة لازم نقضيها..م مارقين حسي..امشو انتو..
يوسف طوالي قبل و مشي و ريفان و لينة و نشوة و صحبتها مرقو ب وراه..
و بالفعل..
مشو ركبو..
صحبة نشوة ركبت ورا مع نشوة و ريفان علينت ل لينة..
لينة ابتسمت ليها و مشت ركبت قدام و ريفان ركبت ورا مع ديك
يوسف قشي وشو و دور العربية..
تحسي بيه مدروش شوي..
حواجبين لينة اتلاقو
لينة:يوسف..
يوسف قبل عاين ليها
لينة:بتقدر تسوق
يوسف هزا ليها راسو:م عندي حل تاني
لينة:متأكد؟
يوس ابتسم ليها و هزا راسو..
لينة قبلت منو
حرفيا حرفيا حرفيا العربية كلها ناسها عاملين زي الطماطم
يوسف ع نشوة ع صحبة نشوة زاتها..
ريفان و لينة بس القاعدين ساكتين ساي..
يوسف مشي نزل صحبة نشوة اولا..
شكلو مرجع نشوة معاه بيتهم..
نزلها و سأل ريفان من بيتهم و ورتو..
نشوة كان سكتت الوقت داك..
=ريفان..
ريفان عاينت ل نشوة
_امم
=عارفة عن الحصل؟
ريفان هزت راسها
_اممم..
نشوة قعدت تدمع
=وانتي كيف حسي..
ريفان م ردت ليها..
هي كيف؟
همم..
جد هي كيف حسي تقريبا لانو كل شيؤ وقف من العمل جواها
ريفان م كانت قادرة تستوعب زادو
نشوة نزلت كم دمعة
=حاسة بيك لسا ف حالة صدمة
ريفان هزت ليها راسها
اعتقد دي الايجابة الوحيدة المنطقية مع الحاصل معاها دا
نشوة قشت دموعها..
ريفان ابتسمت ليها
شوية كدا و كانو وصلو ل بيت ريفان
ريفان نزلت و عاينت ل لينة
لينة ابتسمت ليها: بضرب ليك لمن اصل
ريفان هزت ليها راسها
ريفان دخلت جوا طوالي و يوسف ساقهم..
يوسف عاين ل نشوة بالمرايا..
لقاها نامت الريدي..
لينة عاينت ليها برضو
-ما نايمة ليها كم يوم مع الامتحانات دي ولا شنو؟
يوسف هزا راسو..
لينة سكتت شوي..
تاني جات تتكلم
-يوسف..
يوسف رفع ليها حواجبينو
=اممم..
-الحصل شنو بالظبط؟
يوسف بلع ع ريقو..
اخد ليه كم ثانية..
كان بجمع ف الكلام والاحداث ف راسو..
تحس بيه هو زاتو م نايم
هه..
ينوم كيف و هو خريج و شغال امتحانات
ميتين عينو طالع
و لينة كانت منتبهة للحاجة دي
=اممم..ابوبكر قال حادث عربية..امم..انتي عارفة انو حازم عندو هوس السواقة و السباقات و دا كلو صح؟
لينة هزت راسها..
يوسف كان بزكرها لبها كم مرة..
يوسف طلع نفس طويل
=المرة دي الحظ وقف ضدو..
لينة قلبها وجعها
-ضرب عربية تانية؟
يوسف هزا راسو ب معني لا
=ضرب العمود و هو لافي..
لينا ختت يدها ف راسها..
لا..
=هو ع حسب كلام ابوبكر..م كان بسابق زاتو..
حواحبين لينة اتلافو
-كيف؟
=قال طلعو الكاميرات حقات الشارع..م كان معاه عربات تانية..و حادث قالو غالبا حصل لانو حازم م قدر اللفة كويس..الشرطة قفلت ع كدا..
لينة عاينت ل يوسف
-انت شكلك م مقتنع بالكلام دا
يوسف ضحك ضحكة استهتار
=لانو م صاح..
يوسف بلل شفايفو
=حازم دا ممكن يقدر اي لفة و هو مركب قماش ف وشو م شايف..دي م غلطة يغلطها حازم..
-امكن دقس؟
يوسف هزا راسو ل معني لا
=لا لا..حازم م بدقس ف السواقة..
-طيب انت مقتنع انها شنو؟
=حازم حافظ شوارع مانشستر حفظ..اخوانو و ابوه علموه فيها السواقة من هو 7..و انتي عارفة علموه وين؟..
لينة عاينت ليه ب استغراب
=ف الشوارع المابكون فيها ناس كتار..عشان م يتقبضو و يسجنوهم لانو شافع زيو سايق..وروه كل اختصارات المدينة حرفيا..الشوارع الانوار كمية الناس البكونو فيه و ف ياتو وقت..مدة الاشارة كيف بفتحو بعد كم و حتي كيف يقطعها لو قافلة ف اتجاهو..دا كلو..كانت دراستو اليومية و الاهم عندهم..
لينة بلعت ع ريقها
-كلهم مهوسين كدا؟..
يوسف هزا راسو
=امم..كانو كلهم كدا..و حازم غصبا عنو طلع كدا..الحاجات دي بتجري ف دمو م ممكن يغيرها زول..
-كانو؟..
يوسف هزا راسو
=اخوانو و امو و ابوه اتوفو ف حادث عربية ب نفس الغلطة..بس هو و نيفين مرقو منها شبه حيين..
-شبه حيين؟
يوسف قشي وشو ب يدو
كانت الدمعة نزلت بدون م ينتبه
=نيفين مرقت مشلولة..و حازم..حازم نصو مات معاهم ف الحاادث..
لينة طلعت نفس طويل..
واي..
الدموع دي اتكومت متين ف عيونها اصلو؟
قشتها بسرعة..
-و هو العمود الضربو دا..
يوسف كمل كلامو
=وقف فيه..يا الله مرقوه من العربية..
لينة تاني قشت دموعها
-حالتو الصحية كانت كيف؟
=الطحال اتمزق..ارتجاج و اعتقد ضلعين من الصدر اتكسروا؟
لينة بقت كاتمة الدموع..
=انا م دكتور..لكن الكلام دا بوحي ليك انو هو خلاص انتهي..
-طيب كيف ف غيبوبة؟؟
=غيبوبة..مرق من العملية سليم قبل 3 او 4 ايام تقريبا..ولحدي حسي م صحي..ابوبكر قال الدكاترة قلقو و اعلنو انو ف غيبوبة..
-محمد قال لينا يومين بس..
=يومين من م سجلوها ف السجل غيبوبة..لكن هو مرت ع عمليتو 4 ايام..
-هو دخل ف الحادث اليوم الوصل فيه من المطار؟؟
يوسف هزا راسو..
-طيب و الغيبوبة سببها شنو لو قالو العمليات نجحت؟
=قابو غالبا من الضربة القوية الاخذها ف راسو لمن اضرب..
لينة قبلت منو..
الولد
-و م قالو حيصحي متين؟
يوسف دمع و قشي دمعتو
=الدكاترة م فاهمين شي اساسا..
يوسف بلع ع ريقو و تحس نفسو انقطع قبل م يقول اخر جملة
=بعدين متين هي اقل اهتمامتهم..خايفين جسمو م يشفي من العمليات و هو ف الغيبوبة كدا..و ينتهي الوضع بيه م يصحي نهائي..
لينة ختت يدينها ف راسها
لا..
لا لا..
لا كدا م ينفع..
استغفر الله..
يموت قصدو؟؟
-و حسي قالو شنو؟
يوسف هزا راسو
=م عارف..الدكاترة قالو لو حيصحي غالبا م يصحي ف الاسابيع الجاية..لو اخد اكتر من كدا..
يوسف سكت و م كمل كلامو..
اعتقد واضح كلامو ماشي ع وين
