طبيبة القلوب

الفصل التانى

كملت جرى على السلالم وانا بعدهم وبحسب الوقت  هما اصلا دورين وكنت عاوزه أخدهم فى دقيقتين بالظبط بس للأسف الدقيقتين لقيتهم عشره .. يالا مش مهم هعوضهم يوما ما .. ما انا فاضيه بقاا
كملت استمتاع بالايس كريم اللى كنت باكله لحد ما لقيت قدامى الباب اللى المفروض كان لشركه بس واضح حاليا أنه باب لخرابه !
دخلت بهدؤ مش عشان دى طبيعتى .. أبدا دا بس عشان مستمتعه بالايس كريم .. كان قاعد فى اللى المفروض كان مكتب بس أنا مش شايفه غير كومة أوراق وبس
هو شكلا حلو وواضح أنه عنده حس فكاهى هيطلع على دماغى بس لما يفوقلى أنا عارفه .. عنيه بُنى .. شعره جميل وناعم أسود ذى الدقن الخفيفة اللى عنده دى جسمه فى العموم حلو .. بس استايله .. لاا مش حلو .. معجبنيش .. خلصت الايس كريم وبصتله كان لسه دافن وشه فى الورق اللى قدامه مش فاهمه يعنى هو لما يعمل كدا هيلاقى الحل طالعله من الورق يسلم عليه .. ضحكت وانا بتخيل المنظر .. وطبعا ضحكت الرقاصات اللى عندى مش هتفارقنى لازم تيجى وتسلم على أى حد اتعرف عليه .. بصلى بذهول واضح أنه هيلازمه طول ما احنا نعرف بعض .. صحيح أنا اللى عرضت عليه أساعده فى حل مشاكله وهو وافق من مبدأ ما هى كدا كدا خربانه .. بس أنا لازم اثبت نفسى واساعده .. واهو تحدى بينى وبين نفسى أما نشوف مين اللى هيكسب أنا ولا نفسى .. صحيح أنا ونفسى واحد بس فى الحاجات دى اتنين معلش ....
قعدت قدامه
_ يالاا عشان نبدأ
رفع نفس الحاجب وهو بيبصلى بإستفهام
_ إنتى مين
مش باين عليه أنه عنده فقدان فى الذاكره .. يعنى اكيد اشتغاله
_ امك
بينرفزنى وبعدين يزعل
_ أهدى ي كبير أسفه .. مقصدش .. انت اللى بتسأل أسأله غير منطقية .. ايه انا مين دى .. لحقت تنسى المانجا ي مانجا
حاول يهدى نفسه وهو بيسألنى تانى
_ قصدى اسمك ايه .. وانتى مين وعاوزه تساعدينى ليه وكداا .. معلش أنا لازم اطمن .. مش يمكن تطلعى من المنافسين
المره دى انا اللى رفعت حاجبى وكان نفسى أشوف شكلى ما انا مش دايما بعرف ارفع حاجب واحد
_ أنت اصلا ليك منافسين
_ احم .. لاا
الحمدلله طلع اهبل .. مديت ايدى اسلم عليه وانا بعرفه بيا
_ أنا فرح .. فرح المنصورى .. خلصت دراسه من سنه تقريبا ومافيش داعى تسألنى كنت بدرس ايه .. ويساعدك عشان انا حابه اساعدك .. وببساطه اكتر تقدر تقول عشان مش لاقيه حاجه أعملها
رفع حاجبه تانى .. واضح أننا مش هنشتغل احنا هنقعد هنا ونشوف احسن واحد يرفع حاجبه
_ يالاا نبدأ ونشوف هنعمل ايه
فجأه لقيت قدامى ورق كتير وبيطلب منى ادرسه واشوف هعمل ايه وايه الحلول من وجهة نظرى .. اممم .. شكلى لازم اعمل كل حاجه بنفسى ..
_ قوم ي أستاذ .. خلينا ننضف المكان الأول
_ مافيش داعى ... مفيش غيرنا هنا ومحدش هييجى
_ اذا كان حضرتك معندكش مشكله مع القرف أنا عندى مشكله .. ننضف وبعدين نشتغل
بدأنا تنضيف .. ما هو أنا يستحيل اقعد فى مكان مش نضيف هو اه مش هوس بالنضافه .. بس كمان مش بحب القذاره اطلاقاا ..
مافيش موظفين .. كلهم مشيوا عشان معندوش فلوس يديهم مرتباتهم .. كان مشروع شركه بس من الواضح أنه فشل .. المكان مافيهوش حياه .. فبالتالى مفيهوش اى ابداع أو ابتكار .. أصل الحياه إبتكار .. لو مافيش حياه مافيش حاجه خاالص !
تعبنا اوى فى التنضيف ... تقريبا اخدنا نص اليوم وبعد ما خلصت كنت بظبط هدومى عشان امشى بس مش عارفه هو استغرب ليه
_ انتى رايحه فين
_ ماشيه
_ لا والله .. هو انتى كنتى جايه تساعدينى فى التنضيف بس
شكلى لازم اشرحله كل حاجه
_ أنا مش بشتغل وانا تعبانه أو مرهقه .. ومش بشتغل تحت اى نوع من الضغوط .. ونصيحه منى خد شاور ونام شويه .. واصحى اتفرج على اللى احنا عملناه فى المكان .. عشان زى ما رتبناه إن شاء الله هنرتب حياتك
_ ازاى
لفيت ومشيت خطوتين .. ما انا بصراحه معرفش ازاى .. مافيش فى دماغى خطوات ثابته نمشى عليهاا عشان ننجح .. بس كمان عندى يقين من جواياا اننا مش هنفشل .. وعشان كدا جاوبت عليه بكل هدؤ .. الحل العبقرى عندى لأى أزمه
_ اشرب مانجاا
سيبته ومشيت .. أنا مرهقه .. مش بحب اعمل اى مجهود .. مش حكاية انى دلوعه .. بس كمان شايفه أن مافيش حاجه تستاهل اجهد نفسى عشانها .. اتمشيت لأخر الشارع .. بشوف الوجوه والأشخاص نفس أعرف حكايتهم .. هو فضول والله مش أكتر يمكن اقدر اساعدهم .. بس عارفه أن أغلب الردود هتتلخص فى كلمتين .. " وانتى مالك " 
هو صحيح أنا مالى .. بس اعمل ايه مش بحب أشوف حد مهموم .. وبعشق الحكايات
هو انا مش هيكون لياا حكايه بقاا ... سرعت فى خطوتى شويه وانا بشاور لعمو السواق يوقفلى .. سواق الاتوبيس .. الرايق اللى مشغل الست ام كلثوم وبيجبر الكل أنه يسمعها .. أنا بحب أغانى الست بس مش بسمعها زى حاجات كتير بحبها بس مش بحب اعملهاا .. كسل يمكن .. ملل أكتر .. مش عارفه بس أنا بحب كلمات أغانيها لما اسمعها صدفه فى مواصله .. أو وانا بلف بين القنوات فى التلفزيون أو المقاطع اللى ممكن تيجى قدامى على السوشيال ميديا .. بس انى ابحث عن أغانيهاا وافضل طول اللى اسمعهاا واشغل مساحة التليفون بيهاا .. لا مش ممكن ... بحبها زى حاجات كتير بحبهاا حبهم مجرد خاطره فى خيالى .. ركزت اكتر مع كلمات الست وهى بشجن بتقول
وأنت معاياا يصعب عليا .. رمشت عينيا ولا حتى ثانيه
وأنت معايا يصعب عليا رمشت عينيا ولا حتى ثانيه
يصعب علياا .. ليغيب جمالك ..
ليغيب جمالك .. جمالك .. ويغيب دلالاك
اه لو شويه
قد كداا مشتاق اليك ... قد كداا ملهوف عليك
وكعادة كل السواقين لازم توصل عند اجمل حته فى الأغنيه .. وانا وصلت
مشيت ادندن بالكلمات بينى وبين نفسي .. مش هنكر انهاا جميله وعندى فضول اسمع بقيتها .. يمكن احفظها واغنيها لبطل حكايتى لما ييجى .. هو مش هييجى بقاا
تليفونى رن .. نغمة الفون المستفذه .. مش بحب احط أغنيه أو نغمه مفضله لياا .. ليه بقاا لان لو عجبتنى الرنه هفضل اسمع فيها ومش هرد .. فرفقا بحال المتصل بسبب نغمة الفون المستفزه عشان ارد
فتحت الخط وانا بسحب نفس طويل عشان اقول بأنعم صوت عندى
_ الو
وقبل حتى ما الحق أعجب بصوتى اللى طلع دا لقيت الموكوسه "نجلاء" صحبتى بتصرخ وتقول
_ الحقينى ي فررررح ... انا فى مصيبه