سلاماً على قلبي

Part 4

فتحت عيني من النوم اليوم يصادف خميس واني اكره الخميس
ما ادري دائماً تصيرلي سوالف بل خميس
قريت أذكار الصباح واني الم أفراشي واعدل تختي
طلعت من الغرفة توجهت للحمام غسلت ورجعت خليت قوري
الجاي على النار ونصيت جوا الى ما ابدل بدلت طلعت
كملت الريوك كعد ياسر وسعد
_ الين اليوم تجين ويانا على السوگ نشتري ذهب وكم
شغلة محتاجتهم جيهان
_ ليش اجي اني انتَ طول عمرك ما تخليني اروح للسوگ
امي تروح تجيبلي ملابس وألبسهم حتى اذا مو عاجبيني وساكتة
وهسه ما اريد اروح لأي سوگ خلي ماما تجي وياك وأخذ خالة
مروة هم وياكم
_ الين عيب هيج تحجين هذا اخوج الجبير
_ رجاءً سعد اني ما احب اطلع ياخي عوفوني بحالي
_ هوا قابل بكيفج شنو ما تجين الناس شتكول اخت العريس
ما راحت وَيَا العروس للسوك
_ هوا منو يعرف انتَ عندك اخت هاا شو محد يعرفني الكل
يكول انتو بس ولد واذا احد يشوفني يستغرب انو عدكم اخت
_ هسه ما علينا جيهان كالت خلي تجي الين ويايه
_ هاا من هيج واني اكول لو اموت كدامك ما تطلعني
تالي حبيبت الگلب طلبت هيج
_ ترى اكص السانج افتهمتي
_ استهدو بل رحمان شبيكم من الصبح تتكاونون
ياسر الين ما يعجبها تجي اخذ امي وياك وكل الين شوية مريضة
_ لا الى تجي وأشوف منو يكسر كلمتي

طلع ياسر من البيت واني كلشي ما اكلت كمت شلت جنطتي وطلعت
بعد وكت على المدرسة كلت اروح على ماما سعاد دام امي نايمة
فتت على البيت كلهم كاعدين على السفرة
_ صباح الخير
_ صباح النور
_ هلا نور البيت تعالي اكعدي يمي بنيتي الغالية
_ اشتاگيتلج ماما سعاد وكلت اجي عندج قبل لا اروح
على المدرسة
_ واني هم اشتاگيتلج والله كل يوم ادحك على بيتكم اكول بلكت
اشوفج نطف گلبي على شوفتج ليش ما تبينين
_ تعرفين يمه بيت وشغل ودراسة ما الحگ
_ شسوين يا يمه الله يوفقج يا بنيتي
_ فديتج يالغالية
كعدت تقريباً ١٥ دقيقة وتاخرت على الدوام ما انتبهت على الساعة 
_ يوم اني راح اروح على الدوام تاخرت
_ روحي الله يوفقج ويفتحها بوجهج وينور دربج
_ الله يطول عمرج ويحفظج النا يا يمه

طلعت من البيت كمت امشي سريع بل طريق مال مدرسة
وصلت المدرسة اليوم خميس لازم اروح على الساحة رفع العلم
شلون راح اروح الكل هسه واگف هناك واذا بقيت بل صف انفصل
لان ممنوع احد يبقى بل صفوف لازم الكل يطلع بل ساحة
طلعت من الباب الي يوصل للساحة نزلت من الدرج مال الساحة
الكل اندار عليه الطلاب والمدرسين ومن بينهم علي واگف
عَل سريع مشيت وصلت يم بنات صفنا
كملو الطلاب رفع العلم
وفتنا على الصفوف اول درس يوم الخميس عدنا فنية والي
يدرسنا علي اجه فات على الصف
_ قيااام
_ السلام عليكم اجلسوو
_وعليكم السلام استاذ
_ اليوم موضوعنا رسم الوجه من الجانب يلا طلعو دفاتركم.
طبعاً علي خابص نفسو وخابصنا وَيَا بل فنية عندو فنية عبالك
كيمياء ويتخبل اذا احد ما يرسم ف رسم الوجه على السبورة
_ يلا طلاب ارسمو
اني رسمت غوريلا مو بشر ما اعرف خوما غصب
شفتو اجه وكف على راسي
_ هاي شراسمة ما تكوليلي
_ استاذ ما اعرف ارسم والله
_ اتعلمي يلا امسحيها وارسميها مرة الاخ
_ حجيت ابداخلي قز القرط اي والله ليش تصيح
شايف نفسو بيكاسو
_ استاذ خلصت
_ ابني هاي اش راسم هذا بشر لو كائن فضائي
_ ههههههه
_ لا استاذ شوف اشكد حلوو ماكو فرق
_ بلااا ضحك ، شو كوم على الصبورة
_ هاا ليش استاذ
_ انتَ كوم ولا تسال زايد
شفنا الولد وكف يم الصبورة واستاذ علي خل الرسمة يم وجهو
_ طلاب وين الفرق بين هذا الطالب وهاي الرسمة
_ استاذ ثنيناتهم كائن فضائي ههههه
_ شوف استاذ شلون يحجون عليه
_ بلا شقه طلاب ، طلاب الرسم فن ويعبر عن شعور واحاسيس
ومشاعر وخاصةً الرسم الكاركتري يرسم لوصل معاناة الناس ومواضيع
مهمة جداً
_ استاذ علمنا الرسم الكاركتري بدال الوجه
_ هوا دتعلم ارسم الوجه بل اول بعدين الكاركتري

كملنا الدرس بين الشقه مال طلاب وبين الرزايل وأخذنا الدرس
الثاني الي جان عدنا عربي واليوم نستلم أوراق مال امتحان
وطبعاً بل عربي اني صفر كلشي ما اعرف دخل المدرس
_ السلام عليكم
_ وعليكم السلام ، استاذ وين اوراقنا شو ما جبتهم وياك
_ خليتهم بل غرفة مال مدرسين اخر الدرس اجيبهم
_ لا استاذ هسه نريدهم
_ لا ناخذ الدرس بعدين لان اعرفكم هسه تقلبون الدرس
اعتراضات وسوالف .
كملنا الدرس بقه ١٠ دقائق والمدرس كال للمراقب جيب الأوراق
شو الطلاب كل واحد يكول اني اروح اجيبو ونقلب الصف
_ اسكتوو بلا صوت محد يروح يجيبهم يلا بنات اول رحلة
كومو انتو جيبوهم
_ استغربت وجهي صار احمر لازم اروح للغرفة واني عمري
ما رايحة لغرفة المدرسين لان مليانه مدرسين
_ عفواً استاذ خلي غير بنات يروحون احنا نستحي
_ كومو ليش يعني تستحون قابل ما شايفين المدرسين يلا

كمنا اني وصديقتي ماريا مشينا الممرات محد اكو بس كم طالب
هذولة الي مطرودين من الدرس وصلنا الغرفة اني ادفع صديقتي
وهيا تدفعني أخيراً فتت اني جان اكو بس استاذ علي
_ السلام عليكم استاذ وين ميز مال استاذ خالد
_ ليش شرايده وشجابج على غرفة المدرسين
_ استاذ خالد كالي ولصديقتي نجيب أوراقنا كال على ميزي
_ لازم ما عدكم مراقب حتى تجون شوفي الين هاي اخر مرة
اشوفج بل قطاع مال إدارة افتهمتي
_ حاضر بس وين ميز استاذ خالد
_ هاذا الي بل زاوية
مشيت على الميز وأخذت الأوراق جان مكتوب عليهم صف
خامس إعدادي طلعنا نمشي بل ممر
_ لج الين هذا شبي استاذ علي وياج ليش هيج يحجي
_ شدراني شايف نفسو على شنو ما شايفه وجهو شلونو
_ عاد ابن عمج وهيج خاف بل مستقبل يصير من قسمتج
_ حتى اخرب الدنيا غير
وصلنا الصف فتنا وانطيت الأوراق للمدرسة وكعد يسلم
الأوراق واني كالعادة اخذت ٥٩ من ١٠٠ بل عربي
زين نعمة كريم
كملنا اليوم عادي رجعت للبيت امي وسعد موجودين سلمت
وغسلت وصليت وكعدنا نتغده
_ الين شلون تحجين هيج مع اخوج اليوم الصبح
_ليش شلون حجيت يمه اني ما اريد اروح للسوك ما يعجبني
واصلاً ما متعوده اطلع بره ويه الناس
_ اي ميخالف بس اليوم لازم تروحين وياهم للسوك
لخاطر اخوج وعيب من اهل جيهان شيكولون
_ حاضر امري لالله بل اشكد نروح
_ العصر بل ٤ تروحون
كملت غده جاي اغسل مواعين وأفكر اني شلون اروح للسوك
بين الناس اول مرة بحياتي راح اروح ياسر مانعني اطلع باب الحوش
وبزور يخليني اداوم مدرسة كملت رحت ادرس ورا ساعتين شفت
الساعة صارت ٣ ونص كلت ابدل الى ما تصير ٤
غسلت وجهي زين ولبست دشداشة سودة مال جوه العباية
ولبست عبايتي ولبست حجابي زين وعدلتو ولبست شحاطة
جديدة امي اشترتها اليه  طلعت للاستقبال
_ ياسر اني جاهزة نروح صارت الساعة ٤ و٨ دقائق
_ تجين هيج للسوك
_ اي ليش شبيه مو لابسة عباية شبيه
_ لا روحي البسي بنطرون وقميص طويل علي وانزعي
هاي العباية
_ شنوو شلون انزع العباية مستحيل اني متعودة عليها وحرام
البس بنطرون وانت مو مانعني البس غير العباية
_ اي ميخالف روحي اليوم البسي بنطرون
_لا خويه لا اني ما انزع العباية اني حتى بل مدرسة
البس جبة شلون انزعها يأن اجي هيج يأن ما اجي اصلاً
_ لا خلص تعالي هيج شسويلج

طلعنا وركبنا بل سيارة بالي كلو شلون ياسر هيج يكول
هوا طول عمرو ما يخليني انزع العباية وصلنا بيت جيهان
وهنا جانت المفاجاة 

وللحكاية بقية
الكاتبة هيه 🥀