سلاماً على قلبي

Part 1

جاي امشي بمكان مهجور وأهلي مو يمي اصيح اريد احد يساعدني
ماكو اي شخص شفت شخص من بعيد يجي يمي
_ بنتي شجاي تسوين هينا بوحدج
_ عمو الله يخليك ساعدني ما اعرف اهلي وين
_تعالي بنتي اوديج على اهلج دليني على بيتكم
بقينا نمشي فترة طويلة بس كأنو الطريق يطول ما يقصر
وصلنا مكان مثل قصر هيج شي وفوك القصر علم يرفرف لونو اسود
القصر شكلو مرعب كأنو حزين ومهجور من سنين
_ خلي نفوت على هذا القصر بلكت بس احد يساعدنا
_ لا عمو اخاف شوف شلون شكلو للبيت
_ لا ماكو شي اني وياج تعالي فوتي
فتنا فتحنا باب القصر وجان اكو اشخاص كاعدين بي
وشايلين أسلحة وملابسهم اسود وعدهم لحية
_تعالو انتو منو وشلون وصلتو هنا
_ عموو فدوه خلي ننهزم اني خايفة
_ لا تخافين يا بنتي ، السلام عليكم احنا تايهين هنا ونريد مساعدتكم
حتى نصل الى بيوتنا .
_ يا ابا الحارث شنسوي بهذولة
_ اقتلوهم
من سمعنا هيج اني والزلمة الي وياي طلعنا من القصر ونركض
وهما ورانا يركضون وصلنا نص الحوش مال القصر وإطلاق
النار اجانا الزلمة وكع و فزيت من الحلم امي فوگ راسي
_ الين كومي شنو شفتي صوتج بل بيت كلو
_ حلم مرعب يمه ناس مدري شلونهم وقتلونا
_ خير ان شاء الله كومي يلا غسلي وتعالي اتريكي

كمت وبالي كلو يم الحلم منو هذولا وليش هيج لابسين
افكار توديني وافكار تجيبني
كمت انظف البيت كأي بنت ما تخلص من الشغل
والتنظيف كملت صار وقت الغدا اجه اخوية
سعد
_ هلا لينو شلونج صار الغدا ميت جوع
_ هلا اي صار اكعد
صبيت اكل كملنا فكرت انو خلي اروح على بيت ماما سعاد
_ يمه راح اروح على ماما سعاد
_ لا تروحين شيوديج خلي تولي
_ ليش خطية مشتاقتلها
_ مدري ايمت تحسين انو هيا عدوة امج وما يصير تروحين
عليها بس علمود خاطري
_ يوم ترى بابا لا اول شخص ولا اخر شخص تزوج ثنين
وهيا امي مثل ما انتي امي واحنا الاولاد شعلينا من مشاكلكم
_ روحي ما يفيد بيج
طلعت من بيتنا احنا حوش وأحد وبي بيتين واحد مال امي
والاخ مال ماما سعاد فتت على البيت
_ شلونج ماما سعاد
_ هلا هلا بالغالية بنت الغالي شلونج بنيتي
_ زينة وانتي شلونج صحتج شلونها
_ على الله هيج ما تسألين عليه على الاقل قبل لا تروحين
على الدوام مريلي
_ حقج والله بس شسوي بين البيت وشغل ودراسة ما الحك
_ الله يوفقج يا بنيتي ويوم اشوفج احلى عاروس
_ بالله هاي شلون سالفة امي تصيح عاروس وانتي عاروس
شهل دعاء هذا غيرو عليكم الله
_ عمرج ما تبطلين سوالفج ، كومي سويت كبة جيبي اكلي
_ ايي والله بيني وبينج امي سوت دولمة ما تنكل فاهية وبلا طعم
اكول يمه وين سرمد شو ماكو
_  ب سرمد طالع
_ يمه ما تحسين سرمد متغير ما ادري شبي هل ايّام
_ اي مو هوا وابن عمو علي تكاونو البارحة
_ ليش شو كل يوم هذولا يتكاونون والناس تفاككهم
_ شسوي يا يمه احجي وَيَا ما يفيد اكولو ابتعد عنو ما يسمع مني
_ هما من الصغر ما يتلاومون ، اني راح انام هنا ما يجي مني
أكوم على البيت واذا امي صيحتلي كولي نايمة
_ نامي بنتي
اني بسابع نومة اسمع امي تصيح
_ هاي شعندج نايمة هينا كومي على البيت
_ عوفيها يا خديجة البنت تعبانه نايمة
_ لازم ما عدنا بيت تنام بي الى عندج اعرف هاي
سوالفج انتي كتيلها نامي هينا
_ اي كتلها وشنو يعني ماكو فرق تنام وين هذا هم بيتها

وبدت حرب عالمية بين امي وضرتها الي هيا ماما سعاد
ابوية تزوج بل اول ماما سعاد وجاب منها سرمد بس
وبعدين تزوج امي وجاب ولدين اخواني واجيت اني اصغر العنقود
ما عندي خوات وهذا شي محزن كلش
من جان عمري سنة ابوية مات ما شفتو بحياتي تمنيت لو بس شايفتو
، عاد حجيت
_ يمعودين على كيفكم خوما تورطت نمت لو ادري ما انام
_ كومي يلا امشي كدامي شو بعد اخليج تجين هينا
_ خديجة لا تدخلين الويلاد بهيج سوالف هاي اختهم وبنتي هم
_ لا بنتج ولا شي وبعد تحلمين تشوفيها
طلعنا من البيت وامي ترزلني الى ما فتنا على البيت
اليوم ما عندي دوام الصراحة اني أتمنى ماكو عطلة ابد
لان انهزم من البيت وارتاح بل مدرسة بيتنا عبارة عن مشاكل
اخوية الجبير ياسر معقد وعندو نوع من الخباثة والحقارة
وامي مقضيتها بس تتكاون من ماما سعاد وأخوية سعد مقضيها
بس بل جامع متدين واني مقضيتها بل بيت ومشاكل ما تخلص
ف من اروح على المدرسة ارتاح شوية .

مر اليوم عادي مثل كل يوم
ثاني يوم كعدت حتى اروح على المدرسة بدلت وطلعت
بل طريق جاي أتمشى و شفت علي ابن عمي بل طريق هوا مدرس
فنية ويانا بل مدرسة شافني شو هذا عوج نفسو ويايه
_ عوذه بهل وجه اي والله واني فرحانة عندي ويلاد عم
وصلت المدرسة وسلمت على البنات جان اول درس عدنا فيزياء
واطيب درس هوا الفيزياء لان المدرس تلعفري وما يعرف يحجي
عربي زين واحنا الدرس كلو نقضيها ضحك
_ السلام عليكم
_ عليكم السلام استاذ
_ اليوم راح نبدي موضوعنا عن نيوتن وقوانينو
_ خخخخخ حجه نيوتن
_ لج اسكتي راح يرزلنا
_ انتي كومي اشرحلي
_ اني استاذ استاذ اني ولد مو بنت حتى انتي
_ ههههههه
_ هدوء يلا احجي انتَ ما يفهم يلا كوم انتي
_ عمي امري لالله صرت بنت يهوين الشوارب
كمل الدرس ومتنا ضحك المدرس يسوي الولد بنت
والبنت ولد ويشرح بصف الجدر كلشي ما يفهم
طلعنا فرصة وعدنا غرفة مال بنات ننجمع بيها
اكو بنت أسمها رقية فد تجذب ومو خوش بنية
_ بنات باركولي انخطبت
_ صدك الف مبروك يوم نشوفج عروس
_ الله يباركلج الين يوم نفرح بيج هم
_ اي احجيلنا عن خطيبج شنو اسمه وين يشتغل
_ اني خطيبي دكتور واسمه قتيبة وعايش بل شمال
_ والله يابه حظج كعد الف مبروك
_ ههههه غير استاهل هوا حظو كعد اخذ وحده مثلي .
هنا حجت اسماء وهيه ورقية يتخبلون من بعض
ما ادري شنو بيناتهم دائماً يتكاونون وينفصلون بس
ما يفيد بيهم يرجعون هم يتكاونون
_ ايي شلونج عاد منو يتفل بوجهج
_ هههه تغارين مني عيني انتي تاليتج تزوجين واحد من
كرايبج القرج مثلج والهمج
_ على الاقل اخذ من اصلي وفصلي ، انتي الله يعلم خطيبج
من يا مزبلة مثلج .
_ هههههه عود اصلج ينضرب بي المثل ما شاء الله

الحمدلله دگ الجرس وانتهت الحرب وفتنا الدرس الرابع
بدأنا ناخذ الدرس ونص الدرس صار صوت عالي وناس تصيح
وصوت بنات اجه بسرعة فات مدرس وكال للأستاذ الي جان ياخذنا
ابقه يم الطلاب ولا تطلع صارت مصيبة

وللحكاية بقية ....
الكاتبة هيه 🥀