ارض الاحلام

البارت 3

هلوووو...شلونكم ..مراح اطول بالمقدمات و تملون رأستن.. راح ادخل بالبارت ..

علي: اني اريد كهوة ..
ملاك: سادة..لو نسكافية ..
علي :لا نسكافية ...
ملاك : اوك ..رحت سويتلة الكهوة..انشاء اللة تعجبة وميعيب ترة هاذة العصبي يفشلني اذا ما عجبتة ..و هية تسويها صفنت و تفكر انو ضاگ الكهوة وكال ما عجبتني هاذي هم تسميهة كهوة..و الكل يباوعلي ويكولون معقولة متعرف تسوي ابسط الامور وهية الكهوة.. ما حس الة ايد انخلت علة كتفي ..واني قلت لا واللة اعرف اسويها..
غصون: هههههه حبيبتي شنو هية الي تعرفين تسويهة..
ملاك :الكهوة..اااعرف اسوي الكهوة واللة☺️
غصون :اعرف بس انتي شبيج مرتبكة ترة عادي ..
ملاك : ترة اخوج العصبي ..يخوف بلة ضل يرزلني كدام الكل ..
غصون :هههههه لا حبيبتي ميسويها..
ملاك : صبيت الكهوة وانطيتها ل غصون توديها لهاذة العصبي ..وصبيت كوب الي واحد لخ ل غصون..
علي :اجتي غصون انطتني كوب الكهوة ..اني ضگتة كلش طيبة ..بيني وبين نفسي ..لك هاذي شمخلية بالكهوة كلش طيبة ..اجيت اكلها ..لا عيب هسة شيكولون مشايف اول مرة يشوف كهوة..بس صدق طيبة..
رزان :اكوول عمة شتنسيتي بملاك وطلعت بهل جمال..
فاطمة :تنسيت بيها بقيمر ..
غصون :اكول ليش طلعت جنهة كمر..
رزان :صدق اسم علة مسمى اسمهة ملاك وهية جنها ملاك..
جهاد : اي صح اصلا من اول ما نولدت اني حجزتة ل علي ..تذكر محمد
محمد :اي ..هوة اني ناسي علمود اتذكر حتة من يجونها خطابة ما قبل واللة ..مع العلم اني ما ريد اجبرهة بس الاهل والكل قررو من كانو زغار..
ملاك :همة يحجون واني وجهي صار طماطة من الخجل من كثر ما خجلانة ختلت وره غصون..
غصون: كتلهم واللة من كثر ما خجلانة ختلت وراية هههههههه .
ملاك: همستلها يا حقيرة اني اعلمج..
علي : بداخلي ..اني ما استغربت لان بابا كلالي واني اصلن وافقت لان هاذة اختيار بابا وهية بت عمي فما اعترضت ..
جهاد: اصلن اني محاجي علي وما عندة اعتراض بقة بس قرار ملاك ..
ملاك :انطيني ستكانج خالة خلي اصبلج جاي..
شمس :اي صارت تتحجج علمود تشرد.ههههه
غصون:ههه واللة يوم عيد لمن تصير ملوكة حبيبتي❤ مرت اخوي..
رزان: اي واللة ههههه
روان :اي اخذوهة وخلصوني منها خلي يبقة دلال بابا حبيبي بس الي..
كلهة تضحك علة اخبال روان..
ملاك :رأستن رحت للمطبخ اصلن ما حجيت ولا فكيت حلكي..وبداخل افكر ..صح اني ما اعرفة بس يبقة هوة ابن عمي وما القة احسن منة وغير هاذة كلة والاهم بابا موافق..
هدى:تدرين روان ..روان بت قيس هم نفس عمرج ونفس اخبالج واسمهة نفس اسمج..
روان:فديتهة لبنت عمي حبيبتي طبعا موهية صديقتي..
(اكيد دتسألون ليش علي ميعرف ملاك ومشايفهة من قبل لان علي كان مسافر وية عائلتة من عمرة ست سنوات هستوهة صايرة ملاك وبقوو هناك 15سنة ورجعو بس علي بقة هناك مرجع وية اهلة ورة 3سنين ونص يلة رجع مصارلة من رجع للعراق غير 6 شهور و مصحتلة فرصة انو يجي لبت عمة هواية صح اجاهم مرة من قبل بس كانت ملاك بالكلية )

اي وبقوو يسولفون ويضحكون علة مناگر سجاد وروان..
هوة يكلها جنج مرت شهيد..
وهية تكله انتة شايف خلقتك مينطلع بيها..
ههه..وبقوو يشاقون لحد المغرب .سمعوو الاذان اذن الكل راح يصلي وخلصو صلاة ملاك حررت الاكل طبعا كل هل وكت ملاك بالمطبخ ماطلعت سوت عشة كبة وكباب وشويت اربع دجاجات بالفرن وخليت عليهن صلصة (الطماطم والكجب والثوم وليمون)..
وحررت المركة اللحم الي زادت من الغدة..
بس وسويت زلاطة ومقبلات..
والتحلية سويت كيكة باردة ..لان اعرف عبودي يحبها خلصت وبقيت اقلب بالتليفون
شوية ودخلن البنات..
غصون:يمعودة شدعوة عليج ما تقعدين يمنة واللة سوالف وشقة حتة نسينة انج ما موجودة ..هاذة كلة لان كالوو راحوو يخطبونج.
هدى :اللة شهل ريحة الطيبة ..
رزان :ملوكة شمسوية عشة..
ملاك:كبة وكباب ومرقت لحم ودجج مشوي وزلاطة ومقبلات ولتحلية كيكة باردة..
شمس :يا حبيبتي شوكت لحكتي تسوين كل هاذة..
غصون: دجاج شوي بالفرن ..
ملاك: اي ..
رزان :ولج شبسرعة كملتي كل هاذ وحتة ما ساعدناج..
روان : اي حبيبتي اختي ملاك سريعة بالشغل ..والاهم من هاذة كلة متحب تطلب مساعدة من احد..عدهة عزة نفسها فوك الكل..
هدى :خالة واللة وعرفتوو تلكون مرة لبو راس يابس..
شمس :اي واللة مخاب ضني بهل ملوكة ..
فاطمة :بنتي بس الي اذا راحت منو يساعدني قابل روان ام الوصخ..هههه
روان:ماما فشلتيني ..هاهية بعد متجيني خطابة..
غصون:ههههههه..انتي فلم ما ينشبع منة..
رزان :اي واللة اللة يساعد الياخذج..هههههه
روان:ليش حبيبتي يروحلي فدوة ..مو زين مني اني روان راح اقبل بية ولة ترة محد يستاهلني..
ملاك:علة كيفج روان خاتون ..وليش حبيبتي علة راسج ريشة..اصلن انتي منو يتحملج..
روان:هااا بدت الغيرة.. حبيبتي مو نخطبتي وصرتي براس شيخ معمم..
اجة عبد اللة:ها روان افندي تريدين تعرسين وما ادري هاذ خويلد ابو المي..عادي اخطبج الة..ههههههه
رزان :واللة عليك سوالف..ههههه
روان :شوفي ماما عبود شديكول..اهئ اهئ..
فاطمة :يمة ياهوو وية روانو حبيبت امهة..ولك عبيدان ان حجيت وية روان بهاذي الطريقة مرة ثانية الة...
روان :عفية ماما كملي كملي...
فاطمة :الة ازوجهة لخويلد صدق ...ههههههههه
روان :حتة انتي ماما ..اهئ اهئ..
شمس :ولكم شبيكم وية روان حبيبتي اصلن اني اكول ازوجهة لسجاد ابني ..شكلتي..
روان: اني اخلص منو واحد يجيني الاخس منة..
غصون:صحلهة رجل كالت اعمة..
روان :انتي غصونو ترة اموتج علة ادية..
عبد اللة:اذا لقيتو غصون مقتولة فاعلمو انة روان هي من قتلتها..ههه
غصون:لعد خلي اجهز وصيتي ..ههه.
عبد اللة :يلة بنات ما كملتن..العالم دتنتضر العشة..
ملاك:اصبر شوية..
سجاد: انتةهنا اطق حنك وتسولف وتضحوك.. و الفيلق مات من الجوع..
عبد اللة :الفيلق جوعان..لو انتة ..
سجاد: اي صح اني هماتين ميت من الجوع..
ملاك:يلة تعالو اخذو العشة..

اخذوو العشة والكل اتعشة طبعا الولد تعشوو وحدهم والبنات وحد.. والكل راح ينام لان تعباني من سوالف العصرية .. الولد ينامون بالاستقبال والبنات بغرفة ملاك.. وجهاد وشمس بغرفة عبد اللة..
ملاك :جاي نفرش فراشات حتة إنام جوة و روان هماتين تنام يمنة.. طبعا احنة كل واحد غرفتة وحدة..وبقت غرفة روان فارغة ..بقينة احنة البنات كاعدين للساعة«11»ونص انسولف ونضحك وبعدين نمنة..
--------------
عبد اللة :جاي انسولف ونضحك احنة الولد..اشوية واجاني اتصال من بابا رديت..
ابو عبد اللة:اعبيد تعال بسرعة اريدك..
عبد اللة :خير بابا صاير شي ...
ابو عبد اللة :لا مصاير شي بس اني اريد احجي وياك بموضوع ..
عبد اللة:اوك جاي .. شباب اني شوية وارجع..
سجاد:ها ولك وين مولي..
عبد اللة :راح اشوف بابا شيريد مني وارجع..
رحت ودقيت الباب ..
فاطمة:اتفضل..
عبد اللة :ها بابا محتاج شي ..
ابو عبد اللة :اي اكعد اريد احجي وياك بشغلة.
عبد اللة :تفضل بابا كول امر ..
ابو عبد اللة : بصراحة اني...................... .

ولهنا ويكون البارت خلص يا حلوين احبكم كومة.. انشاء اللة مطول وانشر البارت الجاي بسرعة احبكم كولش هواية..