رغم إِنكساري

البارت الاول

رغم إنكساري
البارت الاول

-أستبرق-
__________

شهم ...يمه كعديني من الصبح باجر اطلع ع باب الله واني راح اوقت المنبه خاف تنسين انتي
ام شهم ...لايمه كاعده ..وان شاء الله ربي يرزقك ويفتحها بوجهك
شهم ..بعد روحي الله يخليج الي

شهم ...ساعه سته الصبح وعبالك ساعه ١٢ ظهر ..بعد البصرة وشمسها بالصيف وحاارة بس اني عندي كلشي يهون لخاطر امي واختي كرست كلشي لسعادتهن وحمايتهن من توفه ابووي لحد الان واني احس اني سندهم والهم بكلشي لازم اصير

ام شهم ...يمه شهم اكعد مو تريد تطلع للشغل
شهم ..اي يمه كاعد بس اشويه وانزل ..
نزلت جوه وشفت حبوبتي نوفه كاعده بالمطبخ صبحت عليها صباح العافيه ياشابت الشابات
نوفه....ولك نجب تضحك عليه هو بقى شباب راح برجلين
شهم ...افااا انتي ست البنات
نوفه ...ولي لك هاي لسانك لتمشي عليه ههههه
ام شهم ...يمه تتريك
...اي يمه بس بسرعه مظل وقت راح يبدي وقت الدوام بلكت احصل كم كروه ...وارجع قبل الشمس التحرك
ام شهم ..صار يمه تدلل هسه شويه ويصير

شهم ..طلعت للشغل وشويه واشوف هناك رجال يأشر لي جان عمره ب ٤٠ وجان متأنق ..المهم الرجال كالي عمي تاخذني لفلان منطقه ( ) اي عمي دلل مشينه شويه وفتح موضوع رجال ..كالي عمي انت طالب ..كتله لاعمي وين من اني اصغير اشتغل بهل تكسي
هااا ازين عمي اذا تكدر تاخذ خط بنتي اول كليه ومتعرف بالاماكن زين واخاف عليها وانت مبين خوش رجال ونعم منك وصاحب غيرة ...
شهم ..تسلم عمي اي ان شاء الله ليش لا اذا صارت مجموعه مال طالبات تدلل ...
المهم وصلنه للمنطقه ليريدها ..وتبادلنه الارقام
اني الصراحه كيفت كلت خل التم بخط وطالبات احسن ما افرفر بالشوارع ومااحصل شي يادوب احصل شي يكفينه ..اني وساره وامي ..
صحيح احنه عايشين بيت جدي بس هو وجدتي ..بس ما احب اثكل ع احد احسن امي وساره امانتي من يوم لتوفه بي ابووي

شهم ...رجعت للبيت السلام عليكم
نوفه ..وام شهم ..وعليكم سلام ياهله الله يساعدك..
نوفه...ولك شكو اليوم شو الضحكه شاكه حلك
شهم ...شبيج نوفه مايصير اضحك ...
نوفه ...دولي لك من شوكت انت ترجع من شغل مبتسم
شهم...اي اليوم ربج فتحهة بوجي وراح احصل ع خط مال طالبات احسنلي
ام شهم ..ان شاء الله ربي يرزقك ويفتحها عليك
شهم ...بعد كلبي ربي يخليج الي ..اكول يمه سااره وين شو ماكوو
ام شهم .. يمه ملتهيه تدرس وانت تدري سادس صعب ويحتاجله ادراسه
شهم ..ان شاء الله ربي يوفقها ...يمه اني صاعد انام لاتكعدوني

...

رغد...ماما رجاءا سادس وخلصت منه ودراسه وخلصت منها خليني انام رجاءاً
ام رغد...نامي منو لازمج عيني ست رغد
رغد...ماما ترا الجامعه قربت بعد كم اسبوع ولازم اروح اشتري ملابس واحتياجات
ام رغد...تدللين يجي ابوج وناخذ اذنه ونروح
رغد ...اوك
وره فتره رجع ابو رغد من الدوام..
ام رغد ...الله يساعدك شلونك
ابو رغد ...الحمد الله والله زين رغد وين صيحيها اليوم لكيتلها خط خوش انسان ومبين من خوش ناس وصاحب غيره نكدر نخلي رغد وياه بالخط وتشوف صديقاتها ويصيرن مجموعه...رغد بابا رغد تعاي وينج
رغد...ها بابا الله يساعدك ..اي سمعت اوك اني اخابر البنات الي جانو وياي بالمدرسه لان اكو كم طالبه طلعنه نفس الجامعه

شهم....مرت الايام وشو هذا الزلمه مااتصل عليه بس لا اختلف ..لا والحظ يسويها حضي
سارة ...خويه شبيك تفائل شويه متشائم شجاك
شهم ...ولج مو قرب دوام ممعقوله لحد هسه ميتصل بيه
ساره ...انشاء الله يتصل
ام شهم...يمه انت تظل هيج بدون زواج
شهم....يمه شفتح هل موضوع هسه ...ويني وين زواج هسه بت العالم لجيبها منين اوكلها اشربها
نوفه...افااا ولك چا احنه وين رحنه
شهم...حبوبه والله قصدي مو هيج الله يدومكم النه ومايحرمني منج لا انتي ولاجدي بس المرة تريد كلشي واني مو كد المسؤليه هسه
ام شهم ...براحتك يمه...اصبلكم غده ...
الكل ...ديله ماتصبين مو دكنه الجوع ...
شهم ...بهاي الفترة وجان اسمع جهازي يدك ...باوعت هذا الرقم غريب المهم جاوبت وعرفته هذا الزلمه الكالي ع الخط. ..مال بته....
الووو ها عمي السلام عليكم
وعليكم السلام شلونك امورك
بخير. عمي اعذرني ماتصلت عليك هل فترة لان جنت مشغول بدوام ..
لاعمي الله يساعدك حقك حقك
المهم اتفقنه ع العنوان والوقت ويوم الاحد يباشرون دوام .. وكال البنات الوياهة من خلال بته هي دليني عليهن

المهم مرت هل يومين واجه يوم الاحد تأنقت لان فشله خط جامعي مو لازم اطلع هيج
نزلت صبحت عليهم
ام شهم ...ها يمه صباح الخير متتريك
شهم لا يمه اليوم اول يوم وفشله اتأخر
ام شهم ونوفه ...الله يفتحها بوجهك ويرزقك

وصلت للعنوان واتصلت ع والد البنيه الماعرف اسمها الهسه ...وطلع بالباب
نوب طلعت ورا بنيه سبحان الخالقها شايله من حسن وجمال بس اني ماباوعت عليها عيب شيكول ابوها امني وهيج انوب اظل صافن عليها
ابو رغد ...عمي ماوصيك بيها دير بالك عليها
رغد ...بابا شنيه
شهم ...حسيتها خجلت من كلام ابوها لان جان يوصيني بيها عبالك طفله ههههه ضحكت عليها
ابو رغد ...مو بابا هذا مكان غريب وجديد عليج واخذي رقم شهم حتى تتصلين بي

رغد ...رحت اني و ماما للسوك ورحنه تسوقنه ورجعت هلكانه وصادف يوم جمعه بابا كاعد مو بدوام وذكرت الخط كتله بابا شسويت ع سالفه الخط
ابو رغد...اووو همزين ذكرتيني هسه اخابره والله عيب عباله فلتت
المهم مرت هاي اليومين واجه يوم الاحد متحمسه بس خايفه نفس الوقت عالم جديد وناس جدد
المهم اجه ابو الخط وبابا وصفله المكان

اجه ابو الخط ...بس شنو ماشاء الله مبين اسم ع مسمى شكله كلش رجولي بس مبين من لبسه ع كد حاله مو من هل شباب الي تحب تتكشخ اني صراحتاً اكره هيج احب الواحد الكشاخ وليلبس ماركه ...
وبعدين نزلتي راسي مرفعته كلت اهووو اني جنت اضحك ع البنات وسوالفهن لمن يشوفن ابو الخط هههه نوب اني ضربتلي صفنه ...نوب بابا فشلني يوصي عليه عبالك صف اول بتدائي ...واني نوب زادني شفته بتسم يووو تمنيت الكاع تنشك وتبلعني هااي من الصبح وهيج يومي الله ليستر ههههههه ...بعدين ودعت بابا ..ورحنه وصفتله ع بنات صديقاتي وياي جانن بالمدرسه وصرنه نفس الجامعه ... هو اشويه وعرف عن نفسه ..كال اني اسمي شهم ...
كتله تشرفت اني رغد
كال اعتبريني اخوج اي شيء تحتاجي تعاليلي وانشاء الله ماقصر وياج
كتله تسلم متقصر ..اهوو هسه هذا شافني جاهله كله من وره بابا اووف

للحكايه بقيه...