روايه هو ثورجي وانا كوزة💛
الجزء الأول
للكاتبه أمنيه عبدو
ي تسنيم كدي اسمعيني بالأول انتي كيف تعترفي ليهو بحبك ليهو هبله انتي؟ خليك عارفه انو لمن تعترفي لولد لازم تكوني متأكده ميه في الميه انو بحبك لازم تكوني متأكده ي تسنيم!
دي اخر مره أحذرك فيها قالت لي ي امنيه والله افعالو كلها البتكون ناحيتي بتثبت لي انو هو فعلا بحبني اي نعم انا اعترفت ليهو بس دي اخر مره اعملها ف حياتي قلت ليها ااي ااي ي بت وكدي وريني قرأ رسالتك ولا لسه؟ قالت لي قرأها وماديني اشاره انو قرأها قلت ليها غايتو الاولاد ديل، واسمعيني كدي اوعك تفكري ف حاجه زي دي تاني مشاعرك احفظيها لنفسك بكون احسن والله وخليك عارفه المعلومه دي الاعتراف بجي من الولد ما من البت تمام؟ انتي عارفه حاليا ح يكون قال عنك خفيفه ولفيفه بس اصلو م مشكله كانت تجربه ليك لقدام وافصليها منو زاتو لا بشبهك لا حاجه قالت لي ح احاول غايتو قلت ليها هسي الساعه 2 صباحاً ع فكره يعني! مفروض ننوم لانو ورانا جامعه بكره قالت لي لا لا م ح اقدر انوم قلت ليها هبله انتي؟ حاولي ي بت قالت لي بكره هو ح يجي الجامعه اقابلو بياتو وش؟ وريني ي امنيه قلت ليها كدي خلينا لبكره نعست انا حاليا، قالت لي طيب طيب اسفه لاني ساهرت بيك قلت ليها لالا يااخ يلا يلا النوم وبعديها قفلت الخط ونمت.
أصبح الصباح اتصلت عليها ي تسنيم اها ح تجي ولا قررتي ع شنو؟ قالت لي لالا الليله بالذات م جايه قلت ليها وااي يعني ح احوم براي الجامعه الكئيبه دي! قالت لي م مشكله يوم واحد اصلا هو قلت ليها حزينه والله قالت لي لو رد لي اقول ليهو شنو قلت ليها لمن يرد ليك وريني وانا بوريك تقولي ليهو شنو وعيني ف عينك ي بت وبحذرك انا، دي اول مره واخر مره قالت لي والله عرفت خلااص قلت ليها كدي عايني أمس نمتي؟ قالت لي ااي لكن بعد فتره طويله قلت ليها كويس برضو يلا باي ماشه ألحق الجامعه وبعديها خلصنا مكالمه.
لبست الهدوم سريع وطوالي اتحركت، الساعه كانت حوالي عشره ونص، وصلت الجامعه وع طول للقاعه سلمت ع زميلاتي وقعدت فجأه سرحت جاني شكل مؤيد ف خيالي! فجاه اتذكرتو من غير مقدمات اتذكرت افعالي معاو والعوارة الكنا بنعملها، اي نعم هو اتخرج ليهو سنه من الجامعه وخلاني حزينه طول الوقت، مؤيد كان جزء أساسي ف حياتي، مؤيد اكتر ولد خشى قلبي وحبيتو من جوة، مؤيد هو الوحيد الكان بشجعني اقرأ، مؤيد عمل حاجات كتيره عشاني وعشان يفرحني، مؤيد غيرني وغير حياتي كلها، مؤيد الوحيد الوقف معاي ف أشد أحزاني، مؤيد الوحيد البقدر يغير الحزن حقي لضحك مباشره، اي فعلا مؤيد كان جزء أساسي ف حياتي بس مع الزمن قدرت أتجاوزو حاولت بكل الطرق عشان انساهو عدت فتره طويله وانا بسأل نفسي هو ليه اتغير وبقى م مؤيد الزمان!! هو ليه مشى خلاني من غير سبب ع الاقل كان يوريني السبب ويمشي بس لا هو اختار طريقو براو، هو ليه خلاني براي ومشى؟ هو كان عارف اني م بقدر اكمل من غيرو هو كان عارف انو هو نمبر ون ف حياتي، كنت بسأل نفسي كتير هو ليه مشى خلاني من غير م يقول لي السبب، هو كان مؤمن بمقوله انو الناس فترات ف حياة بعض بس هو فعلا اثبت لي كدا مع انو نحنا كان ممكن نكمل سوا زي م بدينا سوا بس للأسف مشى وخلاني اكمل طريقي براي، كنت بسأل نفسي ليه دائما الناس ف بدايه العلاقه بكونو حلوين وظريفين وف النهايه بكونو قاسين معانا؟ السؤال دا دائما كان بجي ف راسي دائما دائما، ولسه بفتش ف جواب ليهو فجاه الدكتور قطع لي تفكيري وبدأ يشرح طلعت دفتري وقلمي وبديت اكتب معاهو.
خلصت محاضرتو بقيت بشوف ف رسائلي حقت الواتسب لقيت تسنيم مرسله لي ي امنيه رد لي اقول ليهو شنو ورسلت لي المحادثه بيناتهم كان مرسل ليها انا بحبك بس حب الأخ لاختو قلت ليها لا دقيقه هو جادي ف رسالتو دي؟ دا شنو العواره دي مفروض يقول ليك اي بحبك أو لا م بحبك اجي اجيي! ردت لي وقالت اقول ليهو شنو حاليا؟ قلت ليها م تردي ليهو زاتو قالت لي حركه م ظريفه لكن قلت ليها تعبت منك ي بت انتي شوفي ردو ليك مسيخ كيف؟ لو عاوزة تردي ردي شوفي البريحك بس قالت لي خلاص خلاص م حارد ليهو قلت ليها يكون احسن قالت لي اها الجامعه من غيري كيف وكيف؟ قلت ليها شوفتي الشاي من غير السكر؟ بس ياهو نفس الاحساس وراسك بالله م يكبر😒 قالت لي هههههههه كبر كبر خلاص قلت ليها يلا يلا ماشه افطر قالت لي طيب وقفلت الشبكه وطوالي مشيت الكفتريا.
اسمي امنيه بقرا ف تالته جامعه تخصص طب أسنان وفضل لي سنه واتخرج، عندي اخو كبير (يوسف) واخت أصغر مني(هبه) وانا الوسطانيه بيناتهم، ابوي شغال ف الحكومه💛 وامي ربه منزل.
م بحب اخش ف الناس لانو عموما بخاف منهم مريت بتجارب سيئه وكانت فعلا سيئه، منهم الخذلوني ومنهم الكرهوني الحياة من بعدها بقيت م بصاحب لي زول الا صاحب يخش القلب غير كدا م بحب ولا ح احاول.
دخلت الكفتريا لقيت خالد قاعد مع اصحابو عاينت ليهم ومشيت، شلت فطوري واتصلت ع تسنيم قلت ليها ي بت خالد جا وحاليا مع اصحابو ف الكفتريا قالت لي الليله ووب معاهو بنات؟ قلت ليها لالا مع اصحابو بس قالت لي طيب ظابط قلت ليها يلا خلاص قلت اوريك بس وبعديها فطرت وحضرت المحاضره ومرقت البيت.
اول م دخلت لقيت خالي قاعد قلت ليهو هيي صحي العيشه بقت بجنيه؟ شايفه الناس ف المواصلات هايجه! قال لي ااي من يوم الليله قلت ليهو والله دي مشكله دي قال لي المشكله حاليا ف الدقيق الخوفه ينعدم زاتو، قلت ليهو مصيبه مصيبه السودان دا امي قالت لي فطرتي ف الجامعه ولا اسخن ليك الاكل؟ قلت ليها لالا شكراا شبعانه قالت لي أمشي نومي عشان تقري طوالي، كفى السمستر الفات جبتي نتيجه كعبه قلت ليها طيب حاضر واستاذنك ي خالو قال لي موفقه قلت ليهو امين ومشيت منهم.
يمكن انا وحده من الناس الحياتي غريبه شديد، بعيده شديد من الناس وم بحب اصاحب لي ناس، حياتي عباره عن يوم واحد وبتكرر كل يوم.
صحيت من نومي فتحت اول شيت شايفاهو أسهل واحد وبديت اقرا فيهو لحدي م حسيت انو كدا كفى واواصل لي يوم تاني، طولت شديد من الفيس قلت اشوف ف الفيس الحاصل شنو؟ فعلا بديت أشوف وفجأه جاني فيديو مليان ناس اولاد ع بنات ع رجال ع نساء استغربت وبديت اركز فيهو لقيت انو كان قبيل وقت كنت نائمه وكان تحديدا ف عطبره المظاهرات دي، مشيت لأمي قلت ليها ي امي ف مظاهرات قالو قالت لي اي قبل شويه جابوها ف قناه العربيه قلت ليها يعني هسي فجاه حصلت والسبب شنو لكن؟ قالت لي عشان الازمه يلي بتمر بيها البلد قلت ليها يعني كدي وريني ابوي مع ياتو فئه؟ قالت لي حاليا حاليا لسه م عارفه انا زاتي بس حاليا السودان دا ماشي لورا، قلت ليها ربنا يصلح الحال بس قالت لي اميين ومشيت منها لقيت هبه اختي شايله تلفونا وبتضحك قلت ليها ضحكيني معاك قالت لي نكته طبعا هي😂😂 قلت ليها غايتو انتي حياتك كلها نكات قالت لي هو ف احلى من كدا يعني قلت ليها سمعيني ليها النكته قالت لي ف ليمونه واقفه عند باب المسجد ليه ؟!! مستنية العصر😂😂😂قلت ليها ههههههههههههه غايتو قالت لي ارح نمرق لينا يوم ظابط كدا طولنا ع فكره ي امنيه قلت ليها فعلآ نشوف ابوي وامي ويوسف المناسب معاهم متين ووين ونمرق طوالي قالت لي طيب قدام قلت ليها يلا نومي بعد دا راجيانا جامعه بكره قالت لي نسيتي ولا شنو انتي؟ قلت ليها شنو؟ قالت لي بكره م عندي قلت ليها كويس طيب يلا يلا انا ماشه قالت لي اقفلي النور معاك فعلا قفلتو وطلعت منها.
لقيت الساعه حولي 11 ونص اتعشيت وطوالي نمت، أصبح الصباح لبست واتحركت اتصلت على تسنيم قلت ليها تسنيموو كيف وكيف الليله؟ قالت لي اي اي قعد البس حاليا قلت ليها م تتاخري لكن قالت لي طيب ركبت المواصلات وقعدت وشايله تلفوني فجاه وفجأة شفت مؤيد عاوز يركب معانا الحافله😭😭 حرفيا م صدقت عيوني فعلا ركب معانا قلت ليهو مؤيد؟؟يمكن كل الحافله ركزت معاي، بقى بعاين لي وهو شبه م مصدق قال لي امنيه؟! لقيت جمبي واحد شاب كدا قلت ليهو ممكن تبدلو بالمكان قال لي جدا وفعلا جا مؤيد وقعد جمبي قلت ليهو انت متأكد إنك مؤيد ولا انا م شايفه كويس؟ قال لي اي مؤيد ببسمه كدا قلت ليهو هييي وين مختفي انت؟ سلم علي قال لي انتي المختفيه م انا قلت ليهو نعمم؟ مؤيد انت اول م اتخرجت قطعتها معاي من غير سبب حتى كل مره برسل ليك م بترد علي المشكله وين وريني؟ بقى بعاين لي وقال لي ي امنيه ماف سبب معين وانا لي فتره بفتش ف رقمك م لاقيهو قلت ليهو مؤيد م تبرر لي وريني الحقيقه شنو؟ انا عمري كلو ي مؤيد م كنت بفكر يحصل معانا كدا م كنت مفتكره ف يوم ح تمشي وتخليني من غير م تقول لي السبب شنو؟ انت اتغيرت ي مؤيد، م عارفه السبب شنو بالضبط وانت م عاوز تحكي لي السبب، قال لي ماشه الجامعه انتي؟ قلت ليهو ااي قال لي عاوز انزل معاك خلاص قلت ليهو لشنو ما خلاص انت نهيت اي شي حصل قال لي لالا انا م نهيت لي شي والله وعاوز أصلح الأمور قلت ليهو هههه والله غايتو دنيا غريبه شديد قال لي امنيه بطلي سخافتك دي قلت ليهو استغفر الله ي الله وبعديها نزلنا.
وصلت الجامعه وقعدنا ف مسطبه ف الكليه قلت ليهو مؤيد انت كان توريني غلطتي شنو وانا كنت صلحتها عشان خاطرك انت وكان ممكن كمان اعمل اي شي عشانك عشان نكمل زي م بدينا سوا، مؤيد انت نسيت وعودك الكتيره لي وانو انت اصلا م ح تمشي وتخليني ف يوم! مؤيد انت م شايف نفسك اتغيرت علي وريني يااخي السبب شنو خلي قلبي دا ع الاقل يرتاح شويتين قال لي حاليا ف الوقت الحالي م اظن اقدر اقول ليك السبب انا م عاوز اعلقك بي بس ي امنيه ما عاوزك تنكسري بسببي قلت ليهو شنو شنو شنو؟؟ يااخي من بعدك انا انكسرت آلاف الانكسارات لانو آخر شي م كنت متوقعاهو يحصل حصل بالفعل والعمل على كل يعني انت م عاوز تحكي وانا م عارفه لو بقدر ارجع امنيه الزمان او لا؟؟ نحنا حاليا تمينا سنه وكم شهر م عارفين أخبار بعض؟ م عارفين اي شي عن بعض! حتى سألت منك قالو رحلت وكمان امشي شوف مرسله ليك كم رساله ف صفحتك ف الفيس ورقمك العندي طبيعي كان قافل يعني كل الطرق عشان اصل ليك فيها م لقيت لي طريقه!! انا حاليا يمكن نسيتك خلاص بس انت حاليا رجعتني لنقطه الصفر ي مؤيد انت كيف تعمل معاي كدا؟ انت عارف نفسك ف حياتي أهم زول فيها م عارفه بس ربنا يغفر ليك ع كميه الأنكسارات العملتها لي انا اسفه وبعتذر قال لي خلاص خلاص انا كمان بعتذر ع اي شي وحاليا رقمك ضاع مني مليني ليهو قلت ليهو رقمي بهمك يعني؟ مش انت مسحتو من تلفونك حاليا عاوز بيهو شنو؟ عاوز برقمي شنو ي مؤيد؟ قال لي عاوز أصلح كل العملتو ليك بسببي بعتذر ليك شديد ي امنيه ف وقت تاني صدقيني انتي الحتعتذري لي! قلت ليهو نعم؟ كيف كيف اشرح لي قصدك شنو انت بالكلام دا؟؟ قال لي م عارف بس الوقت المناسب انتي ح تعرفي كل شي واسف وبعتذر قلت ليهو خلاص مقبوله منك بس اوعدني دي اخر مره تعملها لي اوعدني وريح قلبي قال لي بوعدك ي امنيه دي اخر مره اكسر قلبك فيها قلت ليهو طيب خلاص مقبوله وبعديها سكتنا.
لقيت اتصال من تسنيم قلت ليها ايوة وين انتي قالت لي ف الاستراحه قلت ليها تعالي قصاد الكفتريا قالت لي جاايه فعلا جات ولقت معاي مؤيد وقالت لي بسم الله دا ظهر من وين قلت ليها اساليهو هو سلمت عليهو وعلي وقعدت، مؤيد قال لينا القرايه كيف قلت ليهو يعني يعني قال لي كيف يعني؟ شكلي ح ارجع من الاول واوريك دي حياتك ومستقبلك قلت ليهو هههههه فقدت الحاجات دي لي فتره وسكتَ قال لي نزلت لي شغل طبعاً قبل أسبوعين كدا قلت ليهو كويس طيب قال لي دا رقمي لو عاوزاني ف يوم لشي انا موجود قلت ليهو طيب حاضر وسجلتو عندي وقلت ليهو انت ليه غيرت رقمك؟ قال لي ماف سبب والله قلت ليهو عملت تغيرات كتيره الفتره الفاتت حاجه غريبه شديد وظهرت فجأه كمان! انت داسي مني شنو ي ولد؟ بقى يعاين لي و رد لي قال لي ماف شي قلت ليهو طيب خلاص ارح نفطر لانو بعد شويه ح تبدأ محاضرتي قال لي ارح تسنيم قالت لي أمشي قدامي لو لقيتي خالد قاعد وريني عشان م اخش قلت ليها وووب منك بلا خالد بلا زفت ارح خلينا نفطر قالت لي أمشي مع مؤيد سوا وانا بنتظركم برا قلت ليها اجيب ليك معاي شنو خلاص؟ قالت لي فطيره طعميه بالشبس قلت ليها طيب ظابط فعلا دخلنا الكفتريا اشترينا وجينا مارقين قلت ليها ي تسنيم خالد م قاعد جوا قالت لي اسكتي اسكتي هداك واقف مع شلتو قلت ليها اتصرفي عادي وخليك ع طبيعتك مؤيد قال لينا انتو مالكم ف شنو؟ قلت ليهو لالا ماف شي مهم كملو الفطور سريع عشان نلحق المحاضره مؤيد قال لي بجيكم يوم تاني لاحق صحبي وماشي الشغل قلت ليهو مؤيد م تتغير علي خليك مؤيد الزمان خلينا حلوين زي م كنا يااخي😭 قال لي حاضر ي امنيه اسف شديد ويلا مع السلامه نتلاقى ف يوم تاني وم تنسي تتصلي علي قلت ليهو طيب يلا.
فعلا مؤيد مشى وبقينا انا وتسنيم قلت ليها اها كيف وكيف احساسك شنو حاليا؟ م ندمانه انك قلتي ليهو بحبك لخالد؟ هو زاتو م بستاهل تقولي ليهو بحبك انتي م شايفه كميه البنات الحولو؟ يمكن كلامي قاسي معاك بس حرفيا المقوله حقت الحُب بعمي البصيره دي بالجد بالجد ، ع كل لو فتح معاك الموضوع فكري وردي ليهو برد مناسب وم تلوميهو لانو هو م بحبك زي م انتي بتحبيهو، وخليك عارفه هو اصلا م بستاهلك والله فبس يعني ي تسنيم خلينا نخلي خالد دا بجهه ونشوف المحاضرات بوين قالت لي فعلا فعلا ارح نمشي وبعديها وصلنا المحاضره قعدنا وسلمنا ع باقي الزميلات جات خاشه الدكتورة وجا بعديها خالد وشلتو خشو طوالي، مسكتها من يدها قلت ليها ركزي ركزي مع الدكتورة بكون احسن قالت لي طيب المحاضره خلصت جانا خالد ف محلنا ونادى تسنيم قال ليها تعالي عاينت لي قلت ليها امشي واتصرفي عادي وقلتها بصوت واطي شويه فعلا مشت ليهو وقال ليها.....💛
#الجاي_احلى
