غموض ( روايات ليبية )

حلقة 1🔥

#غموض ❤الحلقة 1 ❤

للكاتبة ( هبوش )

كان صقع مش طبيعي نمشي وننفخ ف يديا والساعة تقريبا 4 قريب الفجر
لبسي خفيف واطرافي جامدة ودموعي ع خدي علاش ياربي شن إلي درته ف حياتي باش يصير معاي هكي ؟ هل هو ابتلاء او عقاب ع شيء دايراته وناسياته😭 يارب فرج عليا وعطيني القوة والصبر
فجاءة سيارة دارت الضيء عليا

مسحت دموعي وقعدت نأشر بي يديا

نزل منها راجل كبير شوي ف العمر : بنتي شن اديري اهني بروحک

اني لي انهرت بالبكاء وقعدت نقوله ربي بعتك ليا والله ما عندي غيرك ساعدني

عمي سعد : وين اماليك انتي لا حول ولا قوة إلا بالله

اني نبكي بالعبرة : ساعدني ارجوك م .... 

عمي سعد : اركبي صقع عليگ

وركبت اني الأولى وقعد هو يشوف فالقومة وبعدها لحقني وسكر الباب
.
.

ف مدينة تانية بالتحديد ف مكان فاخم ومحاوط بالحراس

هيثم : وقداش عدد المبلغ إلي ممكن نربحوه

حازم : اوووي صهيب وين سارح

صهيب حاط رجل ع رجل ويدخن : اجلوه الموضوع شوية

حازم & هيثم : علاش شن السبب

صهيب طفى دخانه وقرب كرسيه : الأيام هادي عندي موضوع ف طرابلس وبإذن الله نرجع ونديرو اجتماع

.
.

عمي سعد دخلني لحوشه بالسيارة وكان بسيط جدا وع قد حاله

خشيت لصالته المتواضعه وقعمزت بروحي جو ربع ساعه

شوي وخش عمي سعد جايب معاه سفرة فيها شاهي وخبزة وطماطم اخضر

اني ابتسمت : مافيش داعي ياعمي وسامحني ورطك معاي

للكاتبة " هبوش "

عمي سعد قعمز وصبلي طاسة شاهي : ولا يهمك بنيتي لكن قوليلي شن طلعك بروحك فهالليل اهلك وين ؟

اني سكتت لحظات وتنهدت بعد مادارت الأفكار ف راسي : ماعنديش اهل اني من لما عمري شهور عايشة ف ميتم ولأن وصل عمري 18 سنة لازم نطلع منه وندور وين نعيش ... وبديت نبكي : مستعدة نكون عندك خدامة لكن استر عليا الله يستر ع بناتک

عمي سعد تأثر وبعد ماهداني بكلامه قالي : خليك اهني وسكري ع روحك كويس وتو نجيک

اني هزيت راسي بمعنى تمام

وطلع عمي سعد وسكر وراه الباب واني درتله ف الحوش لأنه شكله عايش بروحه وغسلتله شوي طواسي وصواني لقيتهم ف الحوض
واتكيت ع الصالون لين خداني النوم ليا ايام مارقدتش زي الناس
.
.
.
ف حوش تاني

معاذ يتقلب ف فراشه وكان يحلم " بنت اول مرة يشوفها كانت واقفة ع حاشية جبل وتنادي ع اسمه وكل مايقرب منها تختفي "

الحلم كان يتكررله فوق من 4 مرات نفس البنت ونفس الرؤية لدرجة بدي يزعج فيه وما فهم شيء منه

ناض من النوم مخلوع ويتنفس بسرعه شرب من الشيشة إلي جنب سريره : اياه علينا عاد وبعدين مع هالحلمة امتا بتفوت امي

وطار نومه ناض خش بيدوش وكانت ساعه 7 الصبح

.
.

نضت ع صوت الباب يخبط خفت وقعدت جامدة ف مكاني

لي لحظة تفكرت 👇 ___________

محمود : تي افتحي ياعن ..... افتححححي

اني نبكي بشهقة : حسبي الله ونعم الوكيل الله ياخدني ويريحني منک

وفجاءة يتكسر الباب 💥

______________

...........يتبع>

شن قصة البنت هادي ؟ هل صح لما قالت انها بنت ميتم وماعندهاش اهل ف الأصل ولا كانت تتهرب من قصة تانية😱

ومن هما الأبطال التانيين وشن قصتهم ؟