💚❄💚❄💚
طيش على وجها الاوراق وقام من بلاصتو ووقف قدامها " هذا اسمو بهامة...." هزها وحطها " تسمي روحك ممرضة اه !؟...كيفاش قريت ...وكيفاش تخرجت وكيفاش عطاوك شهادة ..."
بلعت ريقها وهي مهبطة راسها بحشمة
عض على سنونو بغل " اقلب منظرك ...مانحبش نراك في السرفيس متاعي ..."
هزت عينيها وخزرتلو " دكتور انا ..."
بتقزز "اخرج عليا "
حلت الباب وخرجت وهي شادة روحها ع البكاء بالسيف ، زربت بخطواتها لين وصلت للتوالاتات وين دخلت وسكرت الباب على روحها ،سيبت روحها للبكاء لين عيت ...بكات لين فدت وهي تتفكر في الفازات ايلي صارولها ملي دخلت تخدم في المصحة ( شنوة ها الخدمة الكارثة ....هكا تتعمل الغرزة ...شنوة ها البهامة ) ...(الله الله ...لواه الدوز هكا ...ياخا ناوية تقتل المرا !؟...)....( ياخا كيفاش تخرجت انت ؟!...وشكون دخلك تخدم هوني )....( ماذبيا مانراكش هوني مرة اخرى ...)
مسحت دموعها من على خدودها وقامت غسلت وجها و ريڨلت شعرها كيف مايلزم وخرجت ....رغم انها كرهت روحها فم ...اما لازمها تكمل ...ماعندهاش حل اخر ....خطيوتين في الكلوار وصونى تاليفونها ...حمار وجها ولب عليها العرق وقت خزرت للنومرو ،بلعت ريقها وهي تهز
" ألو سي مصطفى "
مصطفى "تي علااااه ....تي علاه خليتني فضيحة يابنيتي ...في عوض تهزلي راسي ...حشمتني . .ايلي هذا يتشكى من خدمتك واغلاطك الكارثة "
زمت شفايفها " عم مصطفى انا ..."
قص عليها " شوف بنيتي ...تحمل مسؤوليتك...اذا طردوك رد بالك تجيني تتشحت باش ندخلك ...واضح ...خليتني في الحشومة مع ناس نعرفهم "
علق من غير مايستناها تكمل ، عضت شفايفها بخوف وقلبها ولى يدق بخوف وقت جاتها وحدة من زميلاتها ،هزتها وحطتها " انت ....الشاف حاجتو بيك ( تقصد في رئيس الممرضين ) ..."
"علاه ..."
"وانا منين باش نعرف ..."
خلاتها واقفة وتعدت ...اصلا دار الحديث من النهار ايلي جات فيه وبداو يتغامزو عليها ...ايلي هذا لقاها فرصة باش يحكي و يقطع ويريش .
مشات بخطوات رزان لين وصلت ليلي حاجتو بيها ،وقفت قدامو وهي ترعش ،هذا باز باش يطردها
"اسمع يا طفلة...غلطت مرة وطفيت ضو ...مرتين وغطيت عليك ...تلاثة وتدخلت ...اما اربعة وخمسة وستة وسبعة وثمانية وتسعة...و و و و ....كثرتلها راك...تي أبسط الحاجات ايلي لازم يكونو عند الفرملي ماعندكش "
"سامحني سي عماد "
"نسامحك ....يا والله حال !...يابنتي هاذي فيها سمعة المصحة ...موش لعب ذراري ....من كل بلاصة جاتني تشكيات ...هاكي علاه ...باش نبدلك لسرفيس الليل ....لو ماجيتش نعرف سي مصطفى كنت نطردك ...اما مزاياي غالبتني ...رد بالك تزيد تغلط ....واذا جاء فيك تقرير مرة اخرى باش نطردك ...وماتلومنيش ...تفهم فيا ماهو "
أنت تقرأ
💠نبض لايعرف القلب 💚💠
De Todo★الاسم : نبض لايعرف القلب 💚 ★النوع: طبي ،اجتماعي ،رومنسي ،اكشن ★الكاتبة : nodaryah ★القصة : الصدفة تنجم تخلق حكاية حب حلوة ...تنجم تخلي القلب يدق بقوة لدرجة ينسى بيها روحو ...لكن ..شنوة يصير وقت ايلي ها الحب يولي كيف السم ...شوية شوية يخلي القلب م...
