💠نبض لايعرف القلب 💚💠

★🌺part2 : أول شخص🌺 ★

💠❄💠

بدات الليلة تسخن وبدات الحالات تجي ، اغلبها بسيطة ماتستحقش تعب منهم ، حالة تسمم من ياغرطة غسلولها معدتها وقالو لازم تبات الليلة للمراقبة ،.... طفل صغير تحرقت يدو وهو يقلد في امو في الكوجينة .....، ومرا حبلة تفجعت.... ،ماكانتش حالات ايلي تستاهل تدخلات كبيرة وتعب ، ربما الايكيب فرحو بها الراحة المؤقتة ، شطرهم مشاو للكافيتيريا يشربو في قهوة ، كان فمة حاجة ينادولهم .

قعدت وحدها قريبة من زوز أخرين ،الظاهر انهم زوز فراملة كيفها ،كانو  مرة يحكاو على الكورة مرة على اقتصاد فرنسا و مرة على تاريخ المانيا الحاصل حديث اخر غير خدمتهم ، هوما اكاكا و ضربت سونري الايرجونس ، وقفو بالوقت وخلو ايلي بين يديهم وجراو للاستعجالي ، من الاكيد انو فمة حالات خطيرة وصلت ، هي قعدت تتلفت يمين ويسار ومن بعد تبعتهم ،كيف وصلت لقات برشة حركة وبارشا حس وكلام ...جات عينها على طبيب   وهو  يضغط  بيدو على جرح طفلة تقريبا في عمرها    والدم يقطر منها ، قعدت متمسمرة  في بلاصتها وهي ترى في الدم يجبد جبدان، ...وقت هز راسو وشافها متكونسية وموش تعمل في شي  صاح

  "تحرك اعمل حاجة ....ها الجرح   لازمو خياطة ، حكاية ثمانية والا  تسعة  غرز و ماذابيك انستيزي لوكال لانو ماهيش باش تتحمل الوجيعة "

خزرتلو  مستغربة تقول يحكي بالشنوة ايلي خلاه يصيح اكثر " تي نحكي معااااااك ...تحلحز "

صياحو خلى الناس الكل تتلفتلو وتثبت فيها ايلي خلاها تمشيلو وتحط يدها ع الجرح وضغطتو ...لكن اول مايدها تمسخت بالدم بعدت يدها لين الدم عبالها وجها ،شهقت وماعرفتش شنوة تعمل ،حست كان بيد تجبدها لتالي تبعدها ،خزرت لقاتو واحد من الفراملة ايلي كانو معاها في الكافيتيريا

  "ابعد  تو انا  نتصرف " قالها  وهو ينظف في الجرح ويحضر لزريقة باش يخدر البلاصة
بقات عاجزة موش عارفة شنوة تعمل ،قعدت اتبع في الايكيب كيفاش تخدم ،مشي وجي وصياح وريتم خدمة قوي وهي موش هوني

"ابعععد من قدامي " خزرت لصاحب الصوت لقاتو مراد ،بالنسبة ليه ماكانش مركز شكون كل همو هو الحالات التي وصلت ..بعدت واختارت بلاصة بعيدة عليهم ...خزرت للدم ايلي على يديها برعب وقت هزت راسها لقات الطبيب ايلي وصاها باش تغرز جرح الطفلة يثبت في البادج متاعها باش يعرف الاسم

"فاتن ....اسمك فاتن موش هكا ....نحبك تقابلني من بعد عند الشاف سرفيس وتوا ....اقلب وجهك عليا خلي الناس تعرف تخدم  "
حبت تفسرلو " انا ....كنت ...."

صاح " تحرك "

هز مراد راسو باش يشوف شنوة قصة الصياح ،جات عينو في عينها ...وقتها باش فاق على كل شي ....مرة اخرى يراها...لكن ماتوقعهاش تكون بالمستوى هاكي ...فيقتو زميلتو

"دكتور ....هذا عندو كسر في ساقو ...خليه عندي ..انا نتلهى بيه "

هز راسو موافق وقعد يتبع فيها وهي خارجة لين غابت عليه...وقتها باش تعدى يشوف  في  حالة اخرى .