جريمة صوفيا

البارت العاشر

الحلقة العاشرة 10 من رواية #جريمة_صوفيا مؤلف القصة انا #إبراهيم_رشيد
قراءة ممتعة
توقع عماد انها من رشا او حد من اهلة خصوصآ ان اليوم مهم بكل بالنسبة لاه لأن ح يطلع في قناة مشهورة بكل
عماد مسك الباقة وفجأ فتح الرسالة وبدا يقرا وكان مكتوب فيها
(اهلين دكتور عماد الحقيقة من الرغم من انك انسان ناجح بكل الا انك مغفل واغبى واحد في العالم زوجتك رشا تخون فيك وتحب واحد غيرك وانت مش داري ولا حاس بحاجة انت مغفل بكل وزوجتك هذي وحدة خاينة ومش محترمة و..........و........و........... والدليل ح يكون عندك قريب ياعماد على نفس الطاولة ح يجيك
عماد بعد الكلام هذا تعصب بكل وطلع برا يجري وفي يدة الرسالة
عماد بصوت عالي
عماد:صوفيا صوفيا
صوفيا:نعم؟
عماد:كيف خشت هذي هنا ومن هوا الي جابها
صوفيا:جت مع مندوب خدمة توصيل كنك عليش متعصب
وطلع عماد برا يجري وجاء قدام المستشفى وقعد يشوف يمين ويسار
عماد:شنو هذا وشن صاير ومن بعت الرسالة هذي لالا هذا اكيد حد يبي يخرب بيناتنا رشا مستحيل اديرها انا نعرفها اكثر من روحي مستحيل تخوني،انا عندي فيها ثقة كبيرة انها مستحيل اديرها استغفر الله العظيم بس كاتب كلام كبير في الرسالة وكاتب قريب ح يكون عندك الدليل هذا منو وشن يبي بالضبط
رد عماد للمستشفى.
صوفيا:دكتور عماد خير في حاجة
عماد:لا الامور تمام صوفيا بعد ربع ساعة في حالة تبي تخش وبنت شابة خشي معاها وساعديني نكشف عليها
صوفيا:باهي تمام
وخش عماد وصكر على روحة الباب
عماد:شن معنى دزها في اليوم هذا بالذات؟الشخص هذا عارفني اليوم ح نطلع في القناة ودزها بس عشان يوترني اليوم والله غريبة بكل ومصدوم بكل من ياعماد فكر منو هوا صاح في الجامعة في بنات واجد ع اساس معجبات وهكي ونشوف في نظراتهن بس مستحيل توصلن بيهن للدرجة هذي وانا اعداء والله ماعندي بكل يارب والله محتار بكل بكل
نمشو مع بعضنا شويا للحوش
رودينة:واخيرآ خلاص كملت امتحانات وتوا عندي عطلة سمحة بكل
رشا:العطلة هذي اكيد ح تكتبي فيها رواية
رودينة:اكيد طبعآ اصلآ هيا جاهزة في راسي نبي نكتبها بس
رشا:نستنو والله انا كسدت بكل
رودينة:شنو اليوم نبي نشوف عماد في التليفزيون مش مصدقة
رشا:ولا انا ان شاءالله ربي يوفقة يارب
كمل عماد شغلة اليوم ومشا للحوش على السريع وقعد يلبس وهكي وجت قدامة رشا
رشا:قمر بكل
عماد:تسلمي نبي ننزل نسلم على امي ونمشي
رشا:باهي تمام انزل
وطلع عماد
رشا:اليوم عماد مش على طبيعتة بكل وغريب كأن صاير حاجة شن في زعما؟ممكن يكون متوتر بس
طلع عماد ونزل سلم على امة ورودينة وركب في السيارة
قعد يقرا ويشوف في الرسالة من جديد وبعدين حطها في الدرج متاع السيارة وطلع
رودينة:وسعولي انا قدام التليفزيون نبي نقعد في النص
منال:مازال شويا ويجي
رشا:خلاص ياعمتي مازال 10 دقائق بس ويبدا البرنامج وانتي يارودينة وسعيلي شويا قاعدة شاشة كبيرة
كان الكل يستنى في عماد اهلة وفاطمة وصوفيا الكل حاط على القناة
خش عماد للقناة وجهز روحة وكان الطفل ايهم موجود
المذيع:دكتور عماد شوف مش ح نضغط عليك في الاسئلة واجد بس ايهم ح يطلع قبل ويحكي وبعد ربع ساعة بالضبط ح تطلع انت تمام
عماد:تمام التمام
وبدا البرنامج وجاء ايهم مع المذيع
المذيع:اليوم حلقة مميزة بكل من برنامجنا معايا الطفل ايهم الي ورغم من صغر سنة الا ان شاف الكثير بكل،الطفل هذا تكلمت عليه في صفحتي على الفيسبوك شاء القدر وصار معاه حادث ادى بحياة والدة ووالدته وايهم كان مصاب اصابة كبيرة بكل في العمود الفقري وكان مشلول بس بفضل ربي وبفضل دكتور شاب وشاطر بكل تعافى وهوا اليوم معايا،زي ماقدامكم على الشاشة هذي صورت السيارة بعد الحادث،ايهم خليني نسألك انت وين تعالجت
ايهم:انا كنت مشلول والدكتور عماد عندة مستشفى وتعالجت فيها وهوا من عالجني
قعد المذيع يدردش مع ايهم وكان الحديث مؤثر بكل وبعدين
المذيع:تمام اليوم معانا الدكتور عماد حصريآ ومباشرتآ رحبو معايا بـ أيقونة الطب الدكتور عماد
وخش عماد وسلم على المذيع وجاء جنب ايهم
رشا:نعاليا
رودينة:ياربي يهبل حولي يالينو نبي نصورة
المذيع:كيف حالك ياعماد وشن اخبارك
عماد:الحمدالله انا تمام بكل
المذيع:خليني نبدا معاك الناس حابة تعرف قصة ايهم والكل متفاعل مع القصة
عماد:شوف انا كنت قاعد من اول لحظة من اول ماجاء ايهم للمستشفى طبعآ كان حادث خطير بكل تقريبآ الاب والام وصلو وربي خذا امانتهم خلاص يعني معش في حاجة نديروها وايهم كان في العناية،بس من خلال الاشعة والصور عرفت ان عندة اصابة بالغة في العمود الفقري والنخاع الشوكي استنينا لين ناض من العناية وتأكدنا فعلأ ان هوا مش قادر يمشي
المذيع:تمام خليني نسألك كيف اتخذت قرار ان طفل زي ايهم يخش للعملية الخطيرة هذي والسن صغير جدآ
عماد:والله القرار هذا كان صعب جدآ يومها كنت نفكر واجد لأن خطير انديرها والجسم كلة مازال النمو متاعة ماكمل يعني زي ماتشوف قدامك خطير نفتح عليه لكن ربي كرمنا والحمدالله شفت النتيجة قدامك
المذيع:ماشي عماد بس انا حاب نسألك سؤال ثاني لو ايهم جاء في يد دكتور ثاني هل كان ح يجازف يدير العملية ولالا
عماد:والله شوف هيا القصة كلها مش شجاعة او هكي انت في اللحظة هذي تبي تكون حكيم في القرار مش ح تاخذ قرار عشوائي انا لو الي قدامي عمرة 30 سنة نديرها وانا متأكد 100% انها عملية ناجحة بس زي ماقتلك طفل في السن هذا صعب جدآ جدآ ولكن قررت نديرها احسن شي ووقعت اني نتحمل المسؤولية
المذيع:في حد وقف جنبك وساعدك في القرار هذا