جريمة صوفيا

الحلقه الثامنه عشر

الحلقة الثامنة عشر 18 من رواية #جريمة_صوفيا مؤلف القصة انا #إبراهيم_رشيد
قراءة ممتعة
بس ح تصير صدفة غريبة بكل ومفاجأ كبيرة0_0
عماد قمعز قدام رشا وبعد تقريبآ دقيقة وحدة
رشا تشوف صدمة حياتها0_0
فجأ يجي سراج حبيبها السابق وتجي عينة في عينها وكان جاي شور عماد
رشا نزلت راسها وقلبها قعد يدق بسرعة0_0
سراج جاء ووقف قدام عماد
سراج:معلش يااستاذ الطاولة هذي محجوزة ليا وبأسمي
رشا من كثر الخوف كان خلاص قريب يغمى عليها خصوصآ ان سراج وعماد من قبل كان في بيناتهم مشكلة بسبب بيسان زي ماتذكروا في بداية الرواية
عماد:اها تمام معلش سامحني واجد
عماد كان من النوعية الي تقريبآ في اليوم يشوف في 70 او 60 وجه مختلف عن الثاني فـ كان من المستحيل يتذكر سراج وهكي
سراج:لا معندكش مشكلة تعالي ياامي
سراج كانت معاه امه
عماد هكي خذا الحاجات الي على الطاولة وخذا لينا
رشا نفس الشي خذت ولدها سراج بس كانت وجها في الارض مش قادرة ترفع راسها بكل
عماد صبى من الطاولة وحط يدة على كتف سراج
عماد:سامحني
سراج:مفش مشكلة
سراج كان مش مصدق الموقف بكل
جديات مدى خطورة وصعوبة اللقطة هذي كبير بكل
جاء الغارسون على طول
الغارسون:تفضل تفضل يااستاذ تعالي يامدام في طاولة فاضية هنا
ومشو مع بعضهم للطاولة الثانية
عماد:رشا رشا
رشا:نعم
عماد:كنك ساكتة هكي في حاجة
رشا:لا والله مفش شي شوف شن تبي تطلبنا
رشا قلبها قريب يطلع من مكانة
رشا:مش معقولة الدنيا الصغيرة هكي هذا ليش جاء هنا،كنت متوقعة ان عماد ناسي وجة بكل الحمدالله يارب
عماد:انا نبي الوجبة هذي وانتي
رشا:اطلبلي زيك عادي
عماد:انتي خبرة في المطاعم انتي ورودينة
رشا:صح بس المطعم هذا والله اول مرة نجي
عماد:باهي تمام وانا نبي ناخذ لـ بنتي حبيبتي وجبة اطفال
رشا:تمام
رشا كانت تدعي ان اليوم هذا يمشي على خير ويمشي بسرعة
قعد عماد هكي يهدرز مع رشا شويا وهيا طبعآ مش مركزة معاه بكل بكل
مشت تقريبآ ساعتين كانن زي السنتين على رشا
رشا:عماد هيا نمشو
عماد:شويا بس نشربوا قهوة
رشا:لا اشرب انت انا معندش نية
وبعد شويا هكي طلعو ورشا مشافتش سراج شكلة كان ماشي او هكي
ركبو في السيارة وكانوا مروحين صدفة كان في الراديو اغنية تامر حسني
رشا:عماد عماد علي الصوت شويا نحبها الاغنية هذي
عماد:باهي حاضر
كانت الاغنية مكل الناس بتقدر تنسى تنسى طب انا مش قادر انساك ليه؟ ارجعلي انا قلبي معك مش قادر انسى هواك يا حبيبي احلى ملاك
يا روح الروح .. عندي امل كلي امل اشوفك تاني في حضني وايه العمل ايه العمل ارجعلي تاني وخدني .. انا تعبان من غيرك اسمعني وراضي ضميرك لو عادي تسيبني لغيرك انا والله اموت
وصلو للحوش ونزلو وركبو على طول للشقة
عماد:رشا
رشا:نعم
عماد:مازلتي زعلانة مني
رشا:عليش يعني
عماد:عشان انا يومتها تغابيت بكل معاك
رشا:لالا خلاص انسى
عماد:انتي اطيب من قلبك مفش،قوليلي باهي اليوم ليش انتي مش على طبيعتك
رشا:مفش شي بس انت عارف اليوم كان اول يوم في النادي والتدريب وتعب بكل
عماد:اها صاح ان شاءالله لينو انسجمت شفتك منزلة صور على الفيس
رشا:لا تمام بكل فرحت بكل وهوا يوم بعد يوم يعني
عماد:باهي كويس
(بعد مرور شهر)
مشا الشهر هذا بسرعة بكل مفش جديد على جميع الشخصيات
صوفيا كانت كل لما تلقا فرصة ادير في حاجات مجهولات مش ح نعرفوهن الا بعدين بس الاكيد انها ح ادمر حياة عماد بكل بعد فترة لأن عماد كان حاط فيها كامل الثقة
عماد ورشا مازالو على نفس الحال،مالك كان فرحان بكل لأن امة ورشا ورودينة مشو لـ يارا وتعرفوا عليها وكانوا متفقين ان بكرا خطبة مالك رسمي
وسام واخيرآ تخرج من الكلية واليوم كان ح يطلع والكل يستنى فيه
وسام:واخيرآ بكل تشاو ياكلية تعبت فيك واجد
(في الحوش)
مالك:واو ياامي هذا كلة عشان الاستاذ وسام
رودينة:متقولش استاذ هذا توا احلى ضابط في الدنيا
منال:اها والله مش مصدقة ان وسام اليوم ح يجي خلاص
رشا:عمتي عمتي وين حاطة الفلفل
منال:تحت يارشا
وطلع مالك وقمعز في الصالة مع عماد
مالك:يعني انت قاعد على الابتوب والبنات مش فاضيات من يهدرز معايا انا
عماد:كنك شن في
مالك:نبي نعرف شن ح يصير بكرا
عماد:خلاص مش ح يصير الا كل خير اسكت بس عطيني تفاحة من الطاولة
مالك:تفضل امسك باهي قولي الطاقم امتى ح نجيبوه
عماد:ياراجل نفختلي راسي ماهو قتلك بكرا ح تمشي انت ومعين واختار الي يعجبك
مالك:باهي باهي كنك عصبي نحكو معاك بس
وسام طلع وكان يسوق
وسام:تمام عرفتها مديرية الامن شويا ونوصل هيا
وصل وسام للمديرية ونزل
الشرطي:وين ماشي حضرتك
وسام:انا الضابط وسام جاي للواء محمود
الشرطي:اها تعال تفضل معايا
مشا وسام وخش مع الشرطي وكان يحكي في عقلة
وسام:شنو الامن هذا كلة تي هذا لو البيت الابيض مش ح يكون هكي
وخش وسام على محمود.
محمود:ياهلا وسهلا بـ بالضابط وسام
وسام:اهلين بيك
محمود:تعال تعال تفضل
وسام:الله يزيد فضلك
محمود:قولي شن تشرب
وسام:قهوة
محمود:اثنين قهوة معلش،شنو ياوسام قولي شن اخبارك
وسام:والله انا الحمدالله كيف حالك انت
محمود:الحمدالله ها قولي شن جو الكلية
وسام:الحمدالله طلعت منها طلعت عيني
محمود:هههههه لا كويس بكل اظن توا ان الامور كلهن تمام وانت جاهز استلمت سلاحك
وسام:استلمت وجاهز بس معقولة نتخرج بعد تعب ونلقا روحي متعين في سجن
محمود:لا ماهو انت قرار النقل متاعك وقع عليه الوزير اليوم
وسام:قرار نقل0_0نقل وين معلش
محمود:من بكرا تمشي وادير اخلاء طرف من السجن وتكون عندي هنا
وسام:يعني ح نشتغل معاك انت
محمود:ح تستلم مكتبك جنبي
وسام:باهي قصدي شنو ح نمسك قضية ولالا
محمود:ههههه متحمس بزيادة ياوسام انت
وسام:اكيد هذي نستنى في الايام هذينا من سنين
محمود:ح تمسك قضية وبكرا تعال ح تعرف كل شي،وهذي الرسالة متاعك عشان ادير اخلاء طرف
وسام:تمام باهي
محمود:عدي توا شوف امك وخوذ رضاها وبكرا الصبح تكون عندي هنا
وسام:تمام
طلع وسام وكان يحكي بروحة
وسام:حيرني الراجل هذا،عليش كويس معايا هكي؟وليش يدير في هذا كلة يعني معقولة من اول مانتخرج نلقا روحي هنا طول يستر الله وخلاص
مشا وسام للحوش وخش لـ اهلة وطبعآ سلم عليهم كلهم وكان قاعد معاهم
وسام:شنو يامالك بكرا امك ماشية تخطبك
رودينة:يعني خلاص انت توا ضابط يعني
وسام:اكيد هذي
مالك:وقصدك ح تشتغل في المركز وهكي
وسام:امالا ح نشتغل في مطعم كباب؟شنو الاسئلة التافها هذي ياربي
عماد:وين طلع قرار تعيينك
وسام:طلع في سجن لكن بكرا ح ينقلوني في مديرية الامن
عماد:في مديرية الامن طول0_0
وسام:اها
رشا:هيا ياشباب العشاء جاهز
كان الجو العائلي جميل وردت اللمة من جديد والكل كان مبسوط يعني الاوضاع 100%
في نفس الوقت هذا كانت صوفيا قاعدة وتفكر
صوفيا:كل الي درتة ح يبانن عواقبة في الايام الجاية،عماد انا ح ندمرك بكل واخيرآ بعد تقريبآ شهرين من التفكير والتعب لقيت من وين ح نخش0_0هوا اليوم فرحان بكل واحد من خوتة ح يتزوج قريب وخوه الثاني تخرج بس جديات الفرحة مش ح تكمل بكل لأني انا قاعدة لأن صوفيا قاعدة عايشة
ورن تليفون صوفيا وكانت كالعادة مكالمة مجهولة
صوفيا:كنت توا ح نرن عليك.......اها فهمت عليك..........قصدي خلاص هانت اصبر شويا وقريب بكل ح يبدن معاه المشاكل..........انا تعبت واجد الفترة الي فاتت وانت عارف.........عارفه هذا بس.....خلاص اوكي اوكي
جاء الليل وكان وسام يبي يرقد خش عليه مالك
مالك:وسام وسام
وسام:كنك شن في
مالك:مش جايني نوم نوض العب معايا ببجي
وسام:ياراجل انت كنك تافه بكرا عندي شغل اطلع برا
مالك:والله انكم عائلة مفيهش جو باهي اسمع عادي ناخذ المسدس شويا
وسام:تي اطلع برا را نضربك بيه
مالك:هذا هبل ويديرها0_0
رشا وعماد مشا عليهم اليوم عادي بكل مفش اي جديد
جاء ثاني يوم وطلع الصبح تقريبآ كانت ساعة 7 الصبح
وسام اول واحد ناض وكان متحمس بكل بكل لبس وطلع شاف امة تقرا ي قرأن في الصالة
نزل وسام وباس يدها
وسام:نبي رضاكي ياست الحبايب
منال:انا راضية عليك ياوليدي ربي يوفقك ويفتحها في وجك وين ماتمشي
وسام:ادعيلي ياامي
منال:انا ح ندعيلك ديما بس ياوليدي انت توا مسؤول رد بالك تظلم حد ولا تقسي على حد حط بين عيونك ديما ان اي واحد عندة ام وعندة اهل
وسام:حاضر ياامي حاضر انا نبي نطلع توا
منال:بس مازال بدري
وسام:لا وين قصة اخلاء الطرف تبي وقت شويا
وطلع وسام.
خليني نقوللكم ان عماد ووسام ومالك ورودينة اكثر حاجة يحبوها في الدنيا هيا امهم وهيا فيها حنية كبيرة بكل
بعد ساعة هكي وزي كل يوم نزلت رشا ونزل معاها عماد
منال:ياوليدي راك تنسى الله يربحك
عماد:مش ناسي ياامي كل الي تبوه ح يجيبة معين
منال:اليوم ح نلبس العروسة ياوليدي جيبو طاقم حلو
عماد:مالك ح يمشي ومعاه معين متخافش
رودينة:واو ع اساس مالك ذوقة سمح يعني
عماد:معين معاه اكيد ومش ح يصير الا كل خير
منال:باهي ياوليدي وانت طالع خطم على محل التغليف استعجلة بالهداية
عماد:ههههههههه كنك ياامي مستعجلة انتي وبعدين انا مش فاضي الغبي الي قاعد راقد شويا وضروري ينوض يديرهن الحاجات هذينا انا مش فاضي عندي جامعة وعندي مستشفى
رشا:باهي باهي امشي انت وشويا واكيد ح ينوض مالك
رودينة:لا وين اكيد راقد على الفجر
وسام كمل كل حاجة ومشا على طول لعند محمود
محمود:تمام بكل انت من توا معايا انا بس
وسام:متبش تقولي شنو القضية الي ح نمسكها
محمود:متحمس من اول يوم انت باهي خش شوف مكتبك الاول
وسام:لا نبي نعرف الاول
محمود:تعال نمشو نشربوا قهوة في المكتب متاعك و ح نحكيلك عليها غادي
وسام:تمام
وخشو لمكتب وسام
محمود:تفضل قمعز على المكتب كنك
وسام:لا لقطة مش حلوة في حقك انت لواء وانا ضابط
محمود:غير قمعز انا عطيتك الامر خلاص
قمعز وسام وقدامة محمود
وسام:انا اعصابي خلاص ياريت تقولي