البارت ٥
#البارت 5
#أزمة_أحساس
بقلمي روسكان الجبوري
امممم ..
شنو اممم .. قصدج جبير ؟
لا .. أقصد اي ..
ههههههههههه .. حبيت الصراحه .. بس لا والله الثلاثينات أحلا عمر مو لان عمري بس نضج وشباب وخبرة ..
نضج وشباب فهمناهه بس خبرة .. خبرة بشنو ؟
بكولشي بالحياة .. وعي وتفكير حته بسوالف النسوان .. يعني شايفين وعايفين ..
عندك ضغط سكر ؟
لابيش طالبتني ..
لعد قنعتني ..
بشنو ..؟
نضج ووعي وشباب .
لعد انصحج أستفادي مني واستغليني ابشع استغلال.
هههههه
يارب دوم ..
تسلم ..
تدللين .. مرتبطه خطوبه زواج حب ؟
سكتت .. ردت أأجل الجواب لان عجبني اسلوبه بالكلام .. بالبدايه كان وكأنه يحقق وياي هسه لا .. يندار الحديث بسلاسه من قبله بدون شعور بأنو يحجي وياي بأسلوب التحقيق .. ويمكن واحد بالميه مني انطى ايعاز لعقلي وأضاء فكرة اختبارة بأني منفصله .. شراح تكون ردة فعله ..
ركزت ملامحي وتشنجت واني اكتبله ..
منفصله ..
وليش هيج الحواجب معقوده ؟
ضحكت ويه نفسي بسرعه وراسا فكت الحواجب المعقوده من جبيني .. بس هو شلون عرف ..
سألته ..
شلون عرفت هيج جانت حركه حواجبي ؟
يا به مو گتلج خبرة بكل مجالات الحياة استغليني ..
تمام .. راح اتذكر هالكلام .. وانت ؟
شبيه اني ؟
متزوج منفصل ؟
هم منفصل ..
صارلك شگد ؟
هو اي .. ست سنوات هيج شي ..
آني سنتين ..
بس بعدج صغيرة .. شنو صار وانفصلتوا ؟
مشاكل وماتوالمنه ..
عندج اطفال ؟
طفل واحد ..
ربي يحفظه الج ..
و يحفظك تسلم .. وأنت ؟
ما عندي اطفال ..
اها شعجب .. شگد استمر زواجك ؟
سبع سنوات .
وليش انفصلتوا ؟
خلافات ومشاكل وردت طفل وماكدرت تجيبلي ..
خطيه .. بس سبع سنين شويه ليش ماانتظرتوا ..
خيرتهه اتزوج عليه علمود الطفل لو اطلگهه .. اختارت تنفصل عني ..
اكيد تختار هالشي .. وتزوجت ؟
لا هذاك يوم وهذا يوم .. ع حطة ايدج ..
لعد ليش هددتهه تتزوج عليهه اذا ما عندك نيه تسوي هالشي ؟
يمكن طگت روحي منهه وردتهه فرصه من الله علمود اطلگهه ..
هااا .. ليش جانت اكو وحدة ببالك ؟
لا ابد .. جان تزوجتهه رأسا لو اكو وحدة ببالي ..
لعد شنو صار ؟
يا به مليت من المشاكل والكلام عن الخلفه والاطفال ..
اممممم جنت گاعد ويه اهلك ؟
بلي بس مو عبالك أخذتي دور المحقق مني ؟
هههههه لا بس صار عندي فضول اعرف اشياء عن حياتك ..
حلو الفضول مو ؟
اي حلو ..
تمام لعد سولفيلي .. انتي ليش انفصلتي .. ولاتگوليلي مشاكل وماتوالمنه ومااعرف شنو .. اريد تفاصيل ..
ممكن تعفيني من الكلام بهذا الموضوع ؟
اوك خليج ع راحتج ..
شكرا ..
العفو ..
أنت ضابط ؟
نعم ..
شنو رتبتك ؟
شتگولين انتي ؟
شفت نجمه ونسر .. يعني مقدم ..
زين تعرفين بالرتب ..
يعني صحيح مقدم ..
بلي ..
اممممم سيادة المقدم .. شغلك بي خطر عليك ؟
جهاز مكافحه الارهاب .. مو بس احنه مستهدفين حته عوائلنه مستهدفه ..
الله الحافظ ..
شنو شهادتج ؟
سادس علمي ومبطله ..
عاد اخذتي شهادة السادس ؟
اي اخذتهه ..
عفيه عليج ..
وانت ؟
تربيه رياضيات ماكملتهه حولت ع الكليه العسكريه (م. أ. أ. س.)(متابع يعرف نفسه )
سكتنه شويه .. سألني ..
وين رحتي ؟
هنا ..
لعد ليش ساكته ؟
ماعرف عادي يعني خلصت كلام ..
اممم خاف نعسانه ..؟
لا ..
بشنو تفكرين لعد ؟
بصراحه ؟
اكيد ..
افكر باجر اوصل ابني للروضه وأفتر عالمحلات ..
شنو هالحجي ليش تفترين ؟
محتاجه شغل ..
لعد الشغل بالمحلات ..
اي بلكي سوبر ماركت او محل يحتاجون اكل منزلي وأتفق وياهم اسويلهم كبه ماكبه وهمه يبيعون وآني استرزق ..
لا حول ولا قوة الا بالله ..
سكتت عرفته استخطاني واستخطى وضعيتي .. اكره الشعور هذا ..
ماكو غير شغل ؟
ليش لگيت وتبطرت .. شهادة سادس شألگه شغل مثلآ ..
ليش هو خريج الكليه لاگي شغل حتة انتي تلگين .. مشوفيني حولت من التربيه للكليه العسكريه ..
حسبتهه صح ..
اي لان ماكو تعيينات .. قابل اضحك ع روحي مثلا .. وهسه ؟
شنو هسه ؟
زين شركات أهليه روضات أهليه ..
قدمت ..
اي ؟
يأخذون فايلي ورقمي ويحطوني عالشحن ..
ام صديقي مديرة روضه .. خليني احجي ويه ابنهه يشوفهه بلكي محتاجه موظفه ..
فرحت حيل من گالي هيج وصار عندي أمل من صدوك الگه شغل ..
الله عليك ؟ .. تحجي صدوگ ؟
اي و الله شبيج ..
شكرا والله ما اعرف شأگولك ..
لايمعوده دخلي تصير بالاول ..
حتلو مصارت .. انت غريب وبس سمعتني انتخيت شكبرهه هاي ..
حسيته خجل من كلامي ..
يا به مسوينه شي .. وين بيتكم ؟
عقدت حواجبي .. جاوبته بأستغراب ..
ليش تسأل ؟
غير علمود أعرف الروضه قريبه عليك لو بعيده .. اذا بعيدة نشوفلج فد روضه قريبه ع البيت مالتكم من معارف ام صاحبي خو مو الراتب يصير كراوي ..
