ادم صحي لقي حياه جمبه باس دماغها وقام خد شاور ونزل يحضر الفطار لحياه وبعد ماخلص طلع لاقاها صاحيه بس زي العاده على طول سرحانه وبتعيط، رحلها حط الفطار علي التربيزه وقعد قدامها ومسحلها دموعها وقالها: عامله اية يا حبيبتي.
حياه بصتله بس مردتش عليه وفضلت بصاله وهو قالها بحزن ووجع: حياه ردي عليا والنبي انا بتعذب وانا شايفك كده انا عارف انك تقدري تتكلمي بس انتي بتفضلي ساكته، والنبي يا حبيبتي ردي عليا ابوس ايدك قولي اي حاجه.
حياه بتبصله وهي ساكته ومش عايزه ترد عليه بس عماله تعيط، قالها: طيب بلاش تتكلمي بس بطلي عياط طب بصي قوليلي عايزه ايه وانا هعملهولك والله بس اتكلمي قولي اي حاجه متفضليش ساكته كده.
برضو مردتش عليه وبعدت عنه قعدت في آخر السرير وهو جابلها الاكل، وقالها: طيب خلاص بلاش بس لازم تاكلي، كلي اي حاجه انتي كده هتتعبي اكتر.
حياه قامت وقفت ورمت الاطباق على الارض وقالتله بصريخ: انت ايه ابعد عني بقي انت مبتفهمش أنا مش عايزه منك حا....
ومكملتش كلامها لانها اغمي عليها ووقعت فى الارض وكل ده حصل وادم مش مصدق انها اتكلمت وفاق لما لاقاها واقعه على الارض ومش بتتحرك خالص جري عليها وحاول يفوقها وهو بيقول: حياه فوقي متعمليش فيا كده انا اسف والله مش هزعلك تاني، قومي بقي.
لما مردتش عليه شالها ونزل يجري ركب العربيه وساق بأقصي سرعه ولما وصل المستشفى خادوها منه ودخلوها الطوارئ وهو واقف مش عارف يعمل ايه وبعد شويه الدكتور خرج، ادم جري عليه وقاله: مالها حياه هي كويسه صح.
الدكتور: الحمدلله انك جبتها بدري مدام حياه مريضه قلب، قلبها ضعيف وهي عندها اكتئاب لازم تحاولو تخرجوها من الحاله اللي هي فيها دى لان قلبها مش هيستحمل الحزن ده كله.
ادم:طيب هو في عمليات بتتعمل لمرضي القلب وبيرجعوا كويسين.
الدكتور:مش هينفع تعمل العمليه وهي في حالتها دي ولازم اقل من شهر تكون عملت العمليه.
ادم:طيب هي هتخرج امتي.
الدكتور: بص انت تقدر تاخدها دلوقتي بس لازم يكون عندك اوضه مجهزه زي اوضه المستشفي لانها ممكن تتعب في اي وقت.
ادم:حاضر حاضر.
