ما لم يكن بالقلب عليم

بارت٤

كمت من الارض واني متحلفة بالشخص الي دا ايسوق بعد ما هو وكف سيارته وما تحرك ولا كلف نفسه وشاف منو هذا البشر الي وكع بسببه
كمت عليه ونزل هو اني جنت دا ارتب بشالي لإن تخربط ..لك انت مدا تشو ! ..بعدني ممكملتها ونزل من السيارة بيده الموبايل جان سيف !!
عمة:يلا نور كومي وانت سيف شبيك حبيبي الله ستر مصار شي هالمرة
عمة الطريق طريق سريع وانتوا دا تمشون بيه والبيت بذيج الجهة !!
عمة: يلا مصار شي بيج شي نور ؟
بعدني اباوعله بإحتقار حتى مكلف نفسه واعتذر !!
دا احجي ويه روحي وصاحتني عمة
لا عمة ماكو شي يلا أمشي نرجع
رجعنا على البيت تلكتنا بيبي شوفتها شكم غرض وصعدت فوك ارتاح كلش تعبت اليوم وباجر حروح اداوم اول يوم،ومنسيت موضوع خالي توضيت وصليت إستخارة وإستسلمت للنوم ..
كعدت ثاني كلي نشاط بدلت ولبست صدريتي جان لونها اسود وفصالها بسيط وحجابي شلت كُتبي ونزلت تريطت شفت بيبتي صبحت عليها تريكت وياها اثناء الأكل سالتني بيبي
بيبي:حبيبتي نور مرديتي جواب على ذيج الشغلة؟
باعي بيبي اني موافقة صدكيني هذا القرار مو هين أبد واني وافقت لان أنتِ أنطيتيني ضمان هو مو زواج وحتى الغُرباء ماحيدرون بيه مجرد بيناتنا ومثل مكلتي بيبي اني حياتي اكملها اعتيادي وسيرة الزواج تنقفل بالبيت
بببي:هذا انسب قرار اتخذتيه صدكيني ماراح تتندمين اني وخالج واكفين وياج ومستحيل نخلي شي يزعجج وبعد على اتفاقنا القديم المهم انت تضمنين واحنا نضمن راح تبقين يمنا وبين إيدينا
نور:كمت بستها لبيبي واجا خالي
يلا نور لا نتأمر بأول يوم حوديج اليوم علمود تعرفين الطريق وبالرجعة حيجيج رجال اسمه ابو حيدر رجال جبير صديقي امنته عليج حيكون خطج من يوم ورايح ويوصلج الى يم الباب
اي خالو تذكرته جان يجي وياك للشغل عرفته
عمومًا رحت للمدرسة بالبداية استغربت شوية وبفيت لوحدي تعرفت على شكم بنية حبابات والمدرسات هم زين تعاملهم وتدريسهم يعني نوعا ما فرحانة رجعت لدوامي ومُستقبلي اجني بنتين وحدة اسمها مها والثانية ازهار حيل حبيتهن وحجولي قصة حياتهم بس اني مُتحفظة حيل مو من النوع إلي أتألف بسرعة واسرد كل شي اكتفيت اعرف باسمي ووين ساكنة
مها حيل طبعها اريحي وتنكت غيرتلي جو شوية
انتهى اول يوم وودعت البنات اجا عمو يوسف ابو حيدر عرفته اول ما شفته سلمت عليه سلام سطحي وودعت البنات ووصلني للبيت
اول مطبيت جانت الكهرباء مطفية والجو هواية حار
مجان موجود احد غير بيبي عمة سلمى وخالو ببيتهم
بيتهم بصف بيتنا بالضبط،الأكل جان جاهز يحتاج اله بس اسخنه واصب
بدلت هدومي واني ميتة تعب سلمت على بيبي واجت عمة سلمى من الباب واني اسمع صوتها تحجي ويه واحد ووياهم خالي طبوا شافوني بالمطبخ
سلمت عمة سلمى وطب سيف ! سيف وخالي اثنينهُم طبوا للهول كعدوا على ميز الاكل
اني وعمة سلمى صبينا الاكل وجبناه عُمر مجان موجود
اثناء مدا ناكل خالو كسر حاجز السكوت وكال حضروا نفسكم الشيخ حيجي اليوم العصر وعمامج حيجون هم
اني جنت موافقة بس لمن صارت حقيقية الخوف اعتلاني وسيطر علية صرت بموقف لا يُحسد عليه لا اني إلي اكدر ابجي ولا اني الي اكدر اتظاهر بمظهر الفرحان والسعيد ! باوعت لسيف بطرف عيوني نفس حالتي ومبين مغصوب على الموضوع لحد هسة ما تجرأت فد يوم اباوع بعيونه واركز بيهن أبداً !!
سيف:خابرتني بيبتي طلبت ارجع من وكت علمود سالفة الشيخ وافقت اجي سديته منها والعبرة خانكتني،اني ما اريد اتزوج ليش محد فاهم هالنُقطة ؟
رجعت واني اعصابي متوترة بشكل ما طبيعي سقت بسرعة فائقة لدرجة نجيت من حوادث اجيت اسويهن بأعجوبة خابرني حسن طشيت غضبي بيه وسديته منه ولا عرفت اساساً على شنو خابرني هو
رجعت للبيت وبلغنا اني وهي خالي بموضوع الشيخ مباوعتلها اصلا ولا يعجبني اباوعلها ولا يهمني
هي السبب اني كل شي راح اسويه مو لاجلها أبداً لاجل خالي بس !!
كامت من الأكل هي بعد ما ترخصت شفتها طلعت فوك
اني هماتين ترخصت وطلعت بالحديقة يمكن خلصت نص باكيت جكاير من الهم الفظيع إلي شايله شفت عمة سلمى كاعدة ويه بيبتي يتفرجن على البرنامج وخالي دا يخابر وملتهي
طلعت فوك على الطابق الثاني توجهت مُباشرةً لِغُرفتها دكيت الباب ودخلت جنت عبارة عن قُطعة عصبية وقهر دخلت عليها جانت كاعدة على التخت بيدها صورة هي انصدمت من شافتني مجنت تعرف اني ألي دكيت الباب
سيف: باعي راح احجي كم كلمة وخليهن ترجية بأذنج لا تظنين ولو لِمرة وحدة راح تكونين مرتي !!
انت مجرد لعبة مجرد ولا شي بحياتي لا تتخيلين حتعيشين الفيلم،منو انت اساساً ؟
شكد حاقد على ناس بس مثلج ما حاقد صدكيني راح تتندمين انت بنفسج على هالزواج التعبان او بالاحرى التمثيلية بسبب عمامج المايخافون الله
تقربت خطوة بإتجاهه وحجيت بنترة أكثر:
لاتتخيلين ضحيت اني علمودج انت ! لخاطر خالي بس ..لا تنسين هذا الشي
تركتها وطلعت واني فاير وتركت البيت كُله ..
نور:جنت كاعدة بغرفتي بيدي صورة والدي ملامح التحسُف ظاهرة علية اندك الباب كُل ظني عمة سلمى او بيبي منو يجي قابل ؟
طب سيف اني رأساً كمت من السرير اجا هو وعصبي
حجا حجي بعُمري ما تخيلته راح اسمعه من احد !! هو استنقص مني وجرحني وجرح كرامتي !!
شظنه هو اني مستمتعة بالزواج ودا اراقب يوم بيوم حتى اقابله ! طول ما هو يحجي اني مباوعه بالارض مرفعت عيني عليه ولا يشرفني اباوعله اصلاً
جرحني وهان كرامتي بدون ذنب بس منزلت دمعة وحدة كدامه ابداً
بعد ما طلع انفجرت بالبجي ارتخت اقدامي لا ارادياً كعدت بالارض ودموعي تشهد على ضُعفي
منو هو حتى يذلني بهالطريقة ؟ منو سمحله يتجاوز حدوده وياي؟
ظليت بهالوضع إلى ان اجاني صوت عمة سلمى اضطريت امسح دموعي واغسل وجهي بسرعة فتكت الباب بيدي هالمرة طبت عمة
يلا حبيبتي الشيخ دا ينتظرنا جوا
اي جاية
ثواني نور ليش تبجين ؟
لا عمة ماكو شي نازلة هسة
حبيبي ميخالف تحملي فترة قصيرة بس
اي عمة
يلا حبيبي لبسي عبايتج وحجابج انتظرج يم الباب
اي هسة
لبست مثل مكالت وطلعت نزلنا جو بالإستقبال جان سيف وخالي وخالي الثاني عطالله
خالي الثاني عطالله موجود بس على الاغلب يكون مسافر خارج البلد ولهذا منشوفهالا قليل وخالي مسولفله عن الموضوع كُله
وبصف خالي لمحت عمامي الإثنين
كعدت على الطخم وعمة لبستني لابس الأبيض وبصفي بيبتي بصفتها جبيرة بالعُمر فجان عادي
الشيخ سأل سيف سيف ردله بالموافقة
اجا دوري سألني مرة ومرتين مرديت جنت بحالة صدمة وخوف للحظة اجيت اتراجع واكول لا ما اريد ومموافقة ..للحظة بس !
بيبتي لمست أيدي نبهتني الشيخ دا يسأل جاوبت :
نعم موافقة ..بغصة جبيرة وألم مَ ينقاس ولا ينحزر
بارك النا الشيخ وطلع
عمامي اجوي باركوا لسيف وباركولي ..خالي مكدر ما يبقيهم للعشا ..بقوا للعشا وطلبوا اكل من المطعم
طلعت من الغرفة واني أجر اذيال الهزيمة والكسران
صعدت لغرفتي نزعت كل شي يدل على اني عروس
طبيت للحمام والمي يضرب بوجهي
المي قاسي لو اني إلي حساسة بشكل صايرة؟
بقيت تحت قطرات المي ما يُقارب الساعة سمعت دكة الباب جانت بيبتي تسأل عن مكاني اكتفيت بإطمِنانها وطلعت هي
سيف:بعد ما تم العقد جانوا عمامها موجودين تحججت بالشغل وطلعت مكدرت ابقى كدام هيج وجوه أنانية ! طلعت من البيت رحت للمُكان إلي متعود من أني ..رحت على حافة النهر بمكان خالي تقريباً بقيت كاعد لوحدي موبايلي طفيته ...
ريام:رجعوا عمامي على البيت وهما ضايجين واني ادري السبب ..نور من تزوجت محد راح يكدر ياخذ ورثها وعمامي جانت عينهم عليها بالتالي هي بنية شتسوي بالفلوس ؟ هيج جان خطتهم،بس تزوجت صار عندها زوج فماحيكدرون ياخذون الفلوس،خالها لنور ذكي ولعبها صحيح نور بقت يمه وفلوسها هم بقت وأمنوا عليها،سمعت عمامي دا يطششون الخبر عود هي متزوجة لنور وعلى اساس مسووا حفلة مجرد بس شيخ لإن اهلها مصارلهم فترة على وفاتهم
ادري بيها مو زينة نور وادري بيها هي بوضع صعب بس هذا جان اسلم حل دكيت عليها مرتين وثلاثة ماكو رد !

_____
ريام الزُبيدي