ما لم يكن بالقلب عليم

بارت12

البارت 12

شنو وينه صوتج؟وياي نظرتج مترفعييها،صوتج ما اسمعه وويه الغريب !!! ويه الغريب تركبين ويه للبيت لعد وين هالجذب كُله هذا كدامي؟ ..كال هالجُملة وكاز على اسنانه واني انحفرت هالجُملة بكَلبي حرفيًا
تقرب خطوة،ردت ارجع بس وين ؟؟ انتهت المسافة خلفي،تقرب أكثر كال..دا احجي وياج وأسالج للمرة الاخيرة ليش ركبتي وياه ؟ كلتله وليش ؟ حجيتها بتردد ..الج عين وتحجين ؟؟ جاوبي على كَد السؤال وبس ..ومنو انت جاي تسألني هيج وتشكك ؟ حجيتها لو ارتكبت جريمة !! لزم ايدي بكل قوته حسيتها راح تنكسر من قوة اللزمة..كال تهون نور..تهون..حسابج عسير ..اني مغمضة عيوني من الوجع الي دا احسه،ايدي انتهت،دفعني بشكل خفيف وطلع من الغُرفة
سيف:طلعت من يمها واني اعصابي فايرة منها ومن تصرُفها،رحت لغُرفتي واني احسب وافكر دقيقة دقيقة بحسابها
نور:طلع من الغرفة واني انهاريت تماما بالأرض من وجع ايدي،دا احس انكسرت من الوجع،نزلت دموعي لا ارادي،ما خطر ببالي غير اهلي،ياريتني جنت وياكم،ياريتني رايحة وياكم ولا هالعيشة! ياريتكم وياي وبصفي وتحموني،مضطرة اتحمل نماذج مجان حيكدرون بحرف يأذوني بوجوكم،مشتاقة..مشتاقة هواي الكم ولصوتكم ولضحكتكم،طلعت الصور وكضيت نهاري وياهن،احتجيت بحجة التعب حتى محد يسألني ..

مرت الايام واني محجيت لاحد ابدا حتى لريام،عمة سألتني هي وبيبي على ايدي كلتلهن عثرت بالدوام،ايدي صار زركة شوية،انجبرت اروح للدكتور عالجها وشديتها،بيها تمزُق ورضة قوية،واجهت مشكلة مكدرت اكتب لان جانت ايدي اليمين،سيف ما اطيقه،ولا اطيق اسمع صوته،الجملة الوحيد المحفورة بكَلبي،جُملته من جذبني وطلعني متونسة أطلع ويه شخص يادوبني اعرف حتى اسمه ! صرت ما انزل ابد واكلي لوحدي بحجة الدراسة،اليوم تعبانة بشكل مو طبيعي نزلت بليل جانت ساعة 11 دا اشرب مي،شفت ضو وبرا وخطوات قريبة على المطبخ خفت بشكل فظيع،ايدي ترجف ذبيت الكلاص من ايدي،الخطوات اقتربت والدنيا ظلمة وحتى الضوا اختفى دا اصيح،حسيت بإيد على حلكي يسكتني،الدم نشف بوجهي،اجاني صوت كال : اسكتي هذا اني ! ..فتح الضوا جان سيف ! تفاجأت أكثر،بعدني بحالة الخوف والصدمة والخجل نصيت نظري همس بصوت ناصي ..اعتبريني غريب !! باوعلي بنظرة... فهمت قصده،بس حسيتني بدون قيمة ! قبل ما اردله سحب ايده مني وطلع من المطبخ !

غيث:طه اعتذرت منه،مو لان قاصر لا والله لكن ميساء اعرفها حق المعرفة واعرف راح تخجلنا،فرفضته من يمي وهو تفهم الموقف،ابوية طلب مني اطلع ويه امي وميساء للسوك،هو تعبان ومريض،فأضطريت طلعت وياهن،نزلن يتسوكن واني وياهن،هنن طبن على محل ملابس اني بقيت واكف بالباب،لمح نظري شخص شايفه من قبل ! هاي ريام ! ريام بنت عم نور،يمكن هي ما شافتني ومن حسن حظي،بقيت اباوعلها وهي بالمحل الثاني..ما ادري ..ما ادري شدايصير !

سيف :رجعت من الشغل كملت حمامي،سمعت صوت عمة تصيحني على الاكل نزلت جوا جان الكل كاعد الا هي ! اكلت قليل جان باين علية القلق والعصبية وجنه خالي قرأ تفكيري كال شبيك سيف ؟ ماكو شي خالو
شلونها الشركة ؟
زينة،دا تمشي الامور بعون الله
عفية،اني من يوم استلمت شركة ابوك الله يرحمه عرفتك راح تطلع من حكَها وبذكائك وشطارتك كدرت تحافظ عليها وتطورها
فعلا،تعبت هواي بيها،الحمدلله كدرت ابقيها ..
عمة سلمى كامت لمت الاكل والميز فرغ بيبي راحت تصلي وعُمر ما اجا بعد من دوامه،جان عامم السكوت قطع هالسكوت صوت خالي مرة ثانية كال
سيف تعرف خط جديد ؟
المن خالي ؟ احاول ادور الك
لنور ..ابو حيدر ما بعد يفيد،وحيل يعلعلنا،ذاك اليوم خابرني كال ما اكدر اروح لبنتكم حدز ابني و نور بقت تحت الشمس تنتظره ومااجا الى ان خابرتني وكلتلها اركبي وياه ، اني ما اريد ابقيها تروح وتجي ويه شاب حتى لو هو أمين بس اخاف الجيران يحجون او شي،فدبر النا خط احسن
سيف:دا يحجي خالي واني داخل بحلقة مُفرغة من التفكير،شسويت اني ؟؟ ترخصت وصعدت لغرفتي انفردت بنفسي،دائما أظلمها..دائماً،ضربت ايدي على السرير تذكرت شسويت وإيدها شكد متأذية ! ليش ما حجتلي ؟ ليش ما وضحت الي..ليش طول عمرها متحجي بحرف وياي،حتى بعد بهدلتي ذاك اليوم مرفعت عيونها..شنو صارت نظرتها حلم ؟ تذكرت شكم مرة غثيتها،وشكم مرة جرحتها وحاولت اقلل من عدها من تاريخ الي عقدنا بيه إلى حد الآن ! تذكرت موقف المطبخ ولمحت عيوني ايدها الملفوفة من شدة قبضتي ذاك اليوم،ليش دا اسوي هشكل،ليش كل مرة تصرفي ينفهم خطأ وينعكس اذية تجاهها !!
لاشيت تفكيري،اخذت غفوة كعدت على صوت الموبايلي وجاوبته
استاذ سيف ؟
اي نعم منو ؟
استاذ اني زوجة حسن الله يخليك ساعدنا ما عدنا غيرك،ادري حسن يعزك ولهذا اتصلت عليك
ما فهمت،شمحتاجة ؟ حسن وينه ؟
حسن بالسجن ! الحكنا الله يخليك،ابنه راح يموت نفسه من البجي،ساعدنا ما عدنا غيرك
اني جاييكم،لا تتحركون من مكانكم ..سمعت بحسن مسجون،وكع كَلبي،حسن ايدي اليمين وصديقي وصاحبي صار اله سنين بالشركة،والده جان ويه والدي وهسة هو وياي،شلون صار هيج وشنو التهمة وشوكت ..الف سؤال براسي بس مردت اضيع وكت اكثر،طلعت مستعجل لبيته ووصلت،جان البيت مكلوب اولاده تلكوني بالباب يعرفوني جانوا يبجون
اخذتهم طمأنتهم شوية هدوا،اجا مصطفى وكريم موظفين بالشركة هم
كريم:استاذ انت هنا ؟
كريم،حسن بشنو متهميه وليش اخذوه ؟ بيا سجن هسة ؟
استاذ ما اعرف التفاصيل بس واحد اسمه عامر رفع شكوى عليه واجوي الشرطة اخذوه وخابرني جيرانه لحسن يعرفني
باوعت جانوا خواله وعمامه جايين وهوسة البيت سلمت عليهم جنت مستعجل
عمي اني رايح لحسن بالسجن،رايح اشوف شصاير وشنو التهمة حتى نعرف نتصرف زين
مصطفى :واني اجي وياك همات هو بسجن ال..
لعد يلا بلا مُماطلة..رحنا واجا ويانا عمه لحسن واخوه وصلنا للسجن جان خنكة ومُقرف بشكل ..الضابط ميتحاجى
بالكوة كدرنا نعرف ليش ماخذيه جانت الدعوة دعوة سرقة ! بس حسن انزه من النزاهة،مُستحيل يمد ايده !!
طلبت اقابله،شفته جان كاعد بالارض وحالته تعبانة حجيت وياه
سيف:حسن لا تخاف اني راح اخابر وسام صديقي مُحامي شاطر،راح تطلع من هنا باقرب وكت
استاذ سيف الي اريده بسديربالك على اطفالي هما ميكدرون بدوني،لا تخليهم بحاجة شي
حسن انت صديقي واخوية لا تخاف اطفالك بذمتي وراح تطلع وترجعلهم سالم غانم،بس تعال كُلي منو هذا الي رفع دعوة عليك ؟ وليش ؟
استاذ القصة طويلة بس اني والله بريئ ومسويت شي هو عنده عداوة وياي من سنين ورفع علية شكوى بدون ما أاذيه
خوش،لا تشيل هم تنحل وبسيطة،وسام راح يدبرها
استاذ ما اعرف شلون اشكرك هواي ممنون منك
حسن ! اني سيف ! ..سيف بدون استاذ،هذا واجبي ما سويت شي زايد،اني رايح هسة اشوف اطفالك وهم اخابر وسام واتفق وياه،كريم ومصطفى وعمك يسلمون عليك برا الضابط مقبل يدخلون وياي نشوفك ..