#اسميتها أميرتي
قصة واقعية
الحلقة 3
الكاتبة:رويدا القاضي
انا قاعد نكلم في مازن لين رنت عليا بيلسان
وقتلي أميرة روحت.
سلوى: كيف ديري هكي تعرفي شن عواقبه الشئ هذا.
أميرة: احنا قرينا فاتحة بروحنا وهوا توا راجلي يعني للي صار بينى وبينه شئ طبيعي.
كريمة: طول كف ع وجها وعادي عندك تتكلمي هكي تحشمي ع وجهك ياريتك
الموت خداتك ولا ترجعي بفضية زي هاذي.
أميرة:😭 بيلسان تكلمي خيرك ساكتة قوليلهم انه اهله رافضين هذا علاش مشيت
معاه نبي نحطهم في الأمر الواقع.
بيلسان:😒 وشن ينفع قبلو بيك توا غير جبتي العار ورجعتي بيه.
سلوى: كيف الحل توا ياكريمة شورى عليا
ياأختي راني بنقعد مضغة في فم الناس.
كريمة: ضروري نلقوا حد يتزوجها حتى مؤقت وبعدها يطلقها .
بيلسان:🤔 تاهت ولقيتها عرفت من بيحل الموضوع هذا مافيش حد غيره هوا .
سلوى: من تقصدي يابيلسان.
بيلسان: علاء خطيبي .
أميرة:😱😭 معقولة بالله لا حرام شن ذنبه هوا.
بيلسان: انا قداش ليا قارفه منه ونبي نلقى طريقة باش نفوته وتوا اهيا فرصة وجت بروحها.
كريمة:😈 أحسن أصلا مش هذا الراجل للي كنت نتمناه ياخد بنتي .
سلوى: فهموني قبل شن تقصدو بيه الكلام هذا نحس في روحي نتخايل.
كريمة: مازال للي بيصر دوامه كبيرة مايطلع منها حد غير احنا والباقين الكل بيغرقوا.
عند سعد وعبدو بعد انحلت القصة كنت مكسد عندهم ولا زي ماكنت متخيل انه القصة نحلت وهوا العكس الفيلم كيف بدأ.
سعد:كيف صار في البنت للي تقرب لي خطيبتك .
انا: والله كلمتني بيلسان وقتلي أهل الولد روحوا بيها لحوش امها وتمت.
عبدو: كيف تمت مفروض يقولهم ديروا حل ولدهم غلط ولازم يصحح غلطه.
انا: هما ماعندهمش راجل معاهم وأولادهم
مش كبار ماهو تعرفوا .
سعد: لازم نوقفوا معاهم مدامه الموضوع هكي ونمشوا احنا لي أهل ياسين .
عبدو: والله كلامك فعلا ومنا أجر من ستر مؤمن ستره الله يوم القيامة.
انا:لكن للي محيرني أهله كيف عرفوا بمكان ولدهم وهوا مافيش حد يعرف إلا احنا وبيلسان وأمها.
سعد: شن فيه في رأسك ياصاحبي .
انا: والله مافي حاجة لكن الموضوع طلعلي رقم .
