امرأة في جحيم الحرب ( مكتملة)

-5-

بعد انتهاء العشرة أيام ، ارسلت عائلة ابو حسن الجواب الى عائلتنا بالموافقة على زواج ابنتهم من عمي حسين على ان يتم الامر في غضون شهرين لكن عمي رفض ذلك وطلب من جدتي ان تخبرهم انه حال عودته من العسكرية ستكون الخطبة الرسمية بينهم ومن بعدها يبدأ التحضير للزفاف وهم بدورهم لم يرفضوا ذلك . وبعد بدأ التحضيرات ليوم الزفاف وبعد أسبوعين جاءت الأخبار بوفاة خديجة أخت الشيخ حميد وذهاب جميع العائلة الى الكوت لحضور مأتم العزاء وبذلك تم تأجيل مراسيم خطبة عمي حسين لبضعة اشهر أخرى لحزن جدي ابراهيم على ابنة عمته خديجة لكن ما أفرح جدتي هو رؤيتها لابنتها ابتسام بعد ذهابها الى الكوت وما أدهشهم هو عدم حضور الشيخ حميد الى عزاء أخته ، كنتُ جالساً الى جانب جدي عندما تحدث عمي رائد معه بشأن ما حدث في العزاء :
*يابة عندي سؤال ، هو ليش شيخ حميد ما حضر للفاتحة مالت اختة .
• غير عندة وياها زعل ومن زمان هو لا يطب عليها ولا يروح الها.
* اي ادري بس ع الاقل كدام الناس ، الناس كلها تسأل ليش شيخ حميد ماكو .
ثم قمت انا  بسؤال جدي :
~ جدو هو ليش زعلان وياها لهدرجة هاي هي عود شمسويتلة.
• هاي سالفة قديمة يا جدي وما بية حيل اسولفلك هسة.
توفيت خديجة وظل أمر مقاطعتها لأخيها الشيخ حميد مجهولاً لدى الجميع لكنني دائما ما كنت احاول معرفة الأمر وما حدث بينهم منذ زمن لكن دون جدوى لا أحد يريد الحديث عن هذا الموضوع بعد ان خيم الحزن على بيتنا لوفاة العمة خديجة بالرغم من انها كانت بعيدة عنا ولم نراها ابداً لكن وفاتها أحزنت جدي كثيراً لشدة حبه لها بينما جدتي لم يشغل بالها سوى حسين وخطبته التي تأجلت وأخبرت أبي أنها بعد اسبوعين ستذهب الى بيت ابو حسن وتاخذ معها خاتم الزواج على ان تتم الخطبة دون حفلة او شيئ آخر فقط بينها وبين عائلة العروس احتراماً الى جدي وحزنه على ابنة عمته.
-اكلك يمة خليل احنة انطينة كلمة للناس والناس تنتظرنا وعيب هسة شيكولون بطلو.
~ يمة شنو عيب غير عدنا فاتحة وهم يدرون بينا شنو بعد.
- اي بس خاف حسين انوب يبطل لو غير راية شلون بهاي الحالة.
~ يمة قابل حسين اصغير وكل ساع براي ، لا يغير ولا من حقة بعد يغير .
- انت شنو رايك لو اني اروح الهم واخذ الحلقة وانسوي خطبة اصغيرة ابينة وبينهم بدون احد ما يدري شتكول انت.
~ والله يمة بكيفج شسوين سوي بس مو هسة خلي بعد كم يوم يلا هم عيب من ابوي ترى .
- اي چا شلون مو هسة بعد اسبوعين يلا اروح الهم .
ثم جاء عمي رائد وفاجئ الجميع بقرار عزوفه عن العمل والبحث عن عمل آخر اكثر راحة وامان حسب رأيه :
^ يابة اني قررت اغير شغلتي لان تعبت من هاي الشغلة ابقى اسبوع برة البيت ومن محافظة لمحافظة .
• وين تشتغل بعد ابني ليش هو اكو شغل هسة.
^ ادور غير شغلة لان هاي الشغلة متعبة وخطرة اني مرات انام بالشارع ع الطريق العام ساعة وتجي سلابة اصخام اتسلبني وحتى حجي محمد اليوم كالي يريدون اللوري مالتهم يبيعوها ولو باعوها اني اكعد واسكت .
• اي منا لمن يبيعونها الله كريم يصير خير ابني .
^ لا يابة من هسة ادبر حالي احسن .
- ادري يمة وين تروح تشتغل هسة اذا عفت شغلتك هاي .
^ اريد اخذ سيارة اصغيرة واشتغل بيها خط ع الكوت واكسب راحتي لان بكيفي يوم اطلع يوم لا محد يجبرني ، حجي محمد يريد يومية اطلع ولازم مااكعد ولا يوم.
بعد أن اصبح عمي  رائد يعمل بسيارته الخاصة بين بغداد و الكوت ، أصبح يتواجد دائماً في المنزل .
بعد مضي أسبوعين ذهبت جدتي ووالدتي الى بيت ابو حسن لاتمام خطبة ابنتهم شروق الى عمي حسين وقد تم الأمر بين العائلة فقط دون حضور عمي حسين لخطبته هذه وبعد عودته من الجيش أخبرته جدتي بما حدث وعن سبب عجلتها في اتمام الخطبة لكنه لم يعترض او يبدي اي تصرف سيئ تجاه جدتي وما فعلته لانه كان يتصف ببرود اعصابه وطيبة قلبه وصبره الطويل وابتسامته الدائمة ، كنت احب الجلوس معه والاستماع الى مزاحه الجميل.
بعد مرور ثلاثة اشهر ، اقترب موعد ولادة امي لطفلها الرابع والذي كان من المقرر اعطاه الى عمي رائد وزوجته سعاد لتبنيه وتربيته حال ولادته وبعد يومين من ولادتها قامت بإعطائه الى زوجة عمي سعاد الذي فرحت به كثيراً عندما أخذته بين يديها واحتضنته وقررت تسميته محمد . هذا الأمر هو من ادخل السعادة والسرور الى بيتنا من جديد ، لقد اصبح هذا الطفل الشغل الشاغل لعمتي سعاد منذ ولادته وهي لاتتركه ابداً وكأنه أبنها الذي ولدته من رحمها .
جاء عمي رائد ليخبر جدي ابراهيم عن قدوم الشيخ حميد الى بغداد وربما يأتي لزيارتنا :
^ يابة ترى شيخ حميد باجر جاي لبغداد ويمكن يجي علينة .
• انت ياهو كالك راح يجي وشعندة هنا ابغداد.
^ حسين كالي شفتة بالكراج اليوم وع اساس عندة هنا طلابة ماادري شنو وجاي حتى يحلها .
• يا ستار منة ومن طلايبة الما تخلص .
تحدثت جدتي :
واكيد راح يجي علينة حتى يحجي بموضوع جنان وساعتها شلون بله انحلها هاي السالفة .
• حجية انتي لا تحجين وخليها وراي شنو گوة ننطيها الهم اذا ماتريدهم شلون .
- چا هاي هي صارت مثل خديجة الله يرحمها لحد ما ماتت بين الغرب .
^ يمة ميكدر يسوي شي واحنة موجودين والقانون موجود شيريد يسوي مثلا يجبرنة انوافق ما ينولها لا والله وإخوتها موجودين .
لم اكن اعلم ما سبب تخوفهم هذا من الشيخ حميد وأبنائه وما الذي يمكنهم فعله في حال رفضهم تزويج عمتي لأبنهم ، كنتُ اراقب وأستمع لجدالهم وفي كل مرة تذكر جدتي قصة العمة خديجة ولا اعرف ماهي هذه القصة سوى أنها ترمي فقط بطرف الخيط لهذا الأمر وبعدها لاتكمل الحديث عنه ، كانت هذه القصة القديمة تشغل تفكيري واحاول جاهداً معرفتها لكن دون جدوى حتى قررت ان استمع لهم من اعلى سلم السطح في كل مرة عندما يتحدثون عن عمتي وزواجها حتى عندما دخلت جدتي الى غرفة عمتي جنان للحديث معها عن امر قدوم الشيخ حميد فتبعتها ووقفت خلف الباب للتنصت عليهن وعن فحوى الحديث الذي دار بينهن :
- يمة جنان اريد احجي وياج احجاية مهمة ، باجر ابو غالب جاي لبغداد عندة طلابة مدري شنو ويريد يجي ليجاي واكيد راح يحجي بموضوعج فأنتي شتكولين يا يمة من هسة خل نرسي ع بر موافقة لو لا .
~ والله يا يمة ماادري الراي رايج .
- لا مو رايي اني راح ازوجهم واعيش وياهم لو انتي .
~ يمة اخاف لو رفضت تصير مشاكل وطلايب ما تخلص.
- مو احسن ما اتضحين بحياتج وعمرج وتعيشين ابيت مليان عيال وشيوخ يعني خدمة وشغل من الصبح لليل .
~ ادري يا يمة بس اخاف يسوون مشاكل ويا اخوتي وانتي تعرفين رائد روحة بخشمة لو سمعلة حجاية ما يسكت .
- اني مااجبرج ولا امنعج بس مااريدج اذبين نفسج عليهم بحجة لا تصير مشاكل وطلايب ، باجر يجي الرجال ونريد حجاية عدلة انجاوبة بيها ، فكري عدل ، زين اني رايحة.
لم احصل على شئ مما كنتُ اسعى اليه من وقوفي خلف الباب سوة ضربة على الرأس من والدتي وتوبيخها ليّ على فعلتي هذه حتى خروج جدتي من الغرفة لم يشفع ليّ بل قامت بتوبيخي هي ايضاً ولم استطع الدفاع عن نفسي امامهن لشدة خجلي من فعلتي هذه واستراقي للسمع من خلف الباب.
- برهوم بيبي مو عيب توكف ورا الباب وتسمعنا شنحجي .
* هو هذا ابراهيم ابو الدكات ، عوفي عمة بعد ميعيدها اول واخر مرة هاي الة لو اكول لخليل علي وهو يتصرف ويا .
- روح بيبي اصعد لطيورك وبعد لاتسويها عيب وليدي ، وانتي هم لا توصلين السالفة لخليل زين .
لم أكن أسعى لتقليل شأني أمام جدتي خاصةً وهي تحترمني كثيراً ودائماً ما تدافع عني وتقف الى جانبي ضد والدتي ولكن هذه المرة لم يشفع حبها ليّ بسبب ما فعلت من تصرف ساذج.

يتبع.....