امرأة في جحيم الحرب ( مكتملة)

-6-

الكوت ١٩٧٨
بعد وفاة العمة خديجة كان الحزن بادِ على محيا الشيخ حميد رغم كبريائه وجبروته الذي لا يريد إظهاره أمام الآخرين حتى انه لم يحضر عزائها ولو لغلق أفواه الآخرين لكنه لم يشعر بالندم لما فعله بحقها منذ فترةً خلت ولا يزال ينزعج عند ذكر أسمها حتى بعد ان فارقت الحياة .
كان حسين ابن الشيخ حميد مصراً على حسم امر زواجه من عمتي جنان حتى انه بدأ يختلق المشاكل في المنزل مع والده بالرغم من الظروف التي كانت تمر بها العائلة من وفاة العمة خديجة وعدم حضور الشيخ لعزائها الامر الذي اصبح حديث الناس والمنطقة :
~ اسمعي يمة الكم مهلة اسبوع تروحون لبيت حجي ابراهيم وتخطبون جنان رسمي ماكو ترى اكلب الدنيا عليكم.
^ ولك يمة حسين اسكت ونصي صوتك ابوك نايم لا يسمع وتصير هسة مشكلة وكدام الناس كول يالله.
~خل يسمع اني اريدة يسمع ، مليت وبعد مابية صبر لشوكت اظل انتضر بعد .
^ اني احجي ويا ابوك لو كعد بس هسة لا تصيح ، وبعدين الناس شتكول علينة عمتك ما صارلها اسبوع من متوفية وانت تريد تزوج مو كافي الي سوا ابوك .
~ هي عمتي ميتة من زمان بالنسبة النة ومنعرفها ولا شايفينها بعد المن نحزن عليها.
^ عيب عليك هذا الحجي هاي عمتك وتظل عمتك عرفت لو لا .
~ يمة عوفج من عمتي واحجي ويا رجلج وخل يفضها ترى ما تدرون شسوي.
أتخذ حسين من اسلوب التهديد والوعيد وسيلة للوصول الى ما يصبو  اليه ويتمناه فهذا هو المعروف عنهم عدم احترامهم للمرأة الام والاخت والزوجة والبنت لذلك لم تتوانى والدته من الحديث مع والده الشيخ حميد عن هذا الموضوع خوفاً من ان يسبب لهم المتاعب لذلك أخبرته بأن والده سيذهب الى بغداد بعد غد في قضية عشائرية ومن ثم يذهب الى بيت ابو خليل للتحدث معهم بشأن موضوع الزواج وحسم الامر.
~ابني باجر ابوك يروح لبغداد عندة قضية عشائرية ومناك كال يروح لبيت ابو خليل حتى يتفاهم وياهم على موضوع جنان .
-خوش اليوم لو شفت رائد بالكراج ابلغة حتى يصير عدهم علم .
~ اي وانت كافي اتلح  اصبر شوية على الاقل كدام الناس شيكولون علينة ماصدكو ماتت عمتهم ودكت اطبولهم .
- يابة شخبصتينة بعمتنة هي من جانت عدلة ماعرفناها من ماتت تريدين نعرفها اسكتي بلة.
~ هوانت هذا طول عمرك وماعندك احترام لاحد لا عدل ولا ميت.
كان حسين يعتبر من اسوأ ابناء الشيخ حميد لم يعرف عنه التفاهم والهدوء ابداً وما يميزه عن إخوته هو عدم احترامه للآخرين مهما كانوا على العكس من عمتي جنان التي تتصف بالهدوء وطيبة القلب واسلوبها الرائع في تعاملها مع الاخرين فهو لايستحقها ابداً .
حاولت عمتي ابتسام انتهاز الفرصة والذهاب الى بغداد لرؤية اهلها وامها محاولة الذهاب مع عمها الشيخ حميد لكنها لم تستطع الذهاب وباءت محاولتها بالفشل :
-عمة احجي ويا عمي حميد وخل ياخذني ويا لبغداد اشوف اهلي.
~ وين ياخذج ويا هو عندة طلابة ورايح يحلها وبعدين قبل كم اسبوع شفتي امج بالفاتحة مالت ام رسمي .
- هم حسبتيها علية شفتها هو احنة شو رحنة نص نهار للفاتحة ورجعنة وين شفتها بعد .
~ ادري بكيفي تروحين يا بنتي مو رجلج مموجود شلون تروحين بدون علمة غير يگلب البيت علينة.
- اي غير رايحة ويا عمي قابل وحدي.
~ وشنو هو لكيتي يحترم لو يخلي اعتبار لاحد ، صار سنتين ويا معرفتي طبعة شنو .
- وتالي شلون عمة اريد اشوف امي ، والله لو قريبة عليهم جان مااخلي جنان اتوافق ع حسين وتصير مثلي اني انجبرت بس هي لا حرام تجبر نفسها .
~ ولج عمة استري علينة ولاتحجين هذا الحجي كدام حسين ترى يهجم البيت ع راسج وراسي فدوة اروحلج اسكتي .
-هو حتى اذا مسمع الحجي اكيد راح يوصلة وعلي شوية زيادة مو عدنا هنا الاذن الصاغية مرة ابنج نجيبة ما شاءالله عليها ابد متضم السالفة.
~ اي مو ادري اني ليش اكلج لاتحجين ترى الحجي يوصل ، انتي ناوية اجيبيلي الجلطة من ورا لسانج.
-اسم الله عليج ، وداعتج عمة اللساني بس يمج يطلع بس كدامهم اصير خرسة ، خليني افرغ الضيم يمج وين اروح لعد والمن اشكي .
كانت عمتي ابتسام تفرغ ما في داخلها من هموم أمام والدة زوجها فقط لانها كانت ترى فيها الأم الحنون والناصحة لها دائماً.
- حجية اني اليوم شفت رائد بالكراج وبلغتة باجر شيخ حميد يجي عليكم ، هو صدك يروح عليهم لو بس تريدين اتسكتيني .
~ ذاك ابوك وروح اسألة اذا صدك لو جذب ولاتظل تاكل براسي كل شوية ناط علية بهاي السالفة الماتخلص .
^ اكول خوية حسين اذا ما قبلت بيك اختي جنان شلون ، انت شتسوي بهاي الحالة وانت ذابح روحك ع هالزواجة.
- وليش ماتقبل اختج بية شناقصني وين تلكة مثلي رجال .
^ لا طبعا متلكة مثلك الله يسهلك وتوافق عليك .
~ لو جنان بنتي ماانطيها الك لو تطلع نخلة براسك بس اني هم مااكدر اسوي شي .
-هاا حجية رجعنة لنفس الاسطوانة عود هاي انتي امي بدل متسعين بيها للشغلة  وتخلصينها.
~ اي مو انت ابن بطني واعرفك زين شنو من بشر ماتتعاشر ولاتنحمل وراح نظلم بنت الناس ويانة .
- يابة ماتحجين ابتسام شنو احنة ظلمناج طلعناج للبستان تزرعين وتحصدين لو عايشة امعززة امكرمة.
^ كافي عمة مالة داعي هالحجي هسة خل نشوف الامور شلون تصير ورا روحة عمي حميد والله كريم .
في صباح اليوم التالي غادر الشيخ حميد الكوت متجهاً الى بغداد في قضية عشائرية مع احد اطراف عشيرته في بغداد ومن ثم يتوجه الى بيت جدي ابراهيم للحديث معه في امر زواج ابنه حسين من عمتي جنان لكنه لم يذهب لوحده بل ذهب برفقة ولده الكبير غالب الذي دائماً ما كان يرافقه في مثل هذه الامور لانه كان يطمح الى ان يتولى زمام الامور بعد وفاة والده .
- يمة خاف يوافقون بيت حجي ابراهيم ترى ماكو تأجيل بنفس الشهر يصير العرس .
~ اكلك انت صدك متستحي واتخلي الواحد يكوم يحجي حجي ماصخ ، اذا مو من عدنا ع الاقل استحي من العالم ولك عمتك هستوهة متوفية شتكول الناس علينة .
- يمة انتي والله ذبحتيني بعمتي وعمتي يعني ابوي ممعترف بيها وحاسب الها حساب اني شنو وحتى يتأجل عرسي .
~ ابوك يختلف عنا هو زعلان وياها جان وبعدين شنو عبالك ابوك راح يقبل تزوج هسة هو صح شايل بخاطرة عليها بس هو هم مقهور ع موتتها وديربالك تحجي كدامة وتخشن خاطرة منك فهمت وكافي اتلح واصبر مثل باقي اخوانك شلون ازوجو هم انزوجك .
- يبوو منج انتي بس حجي كلشي متسوين ، اني طالع لو اجة حميد عود اجي .
~ روحة بلا رجعة ، شفتي اللسانة شطولة ومايحترم ولا يخلي اعتبار لاحد .
^ يلا عمة هو هذا طبعة حسين متعرفينة قابل .
بقي الجميع بأنتظار العم حميد الوصول الى بغداد على أمل تحقيق شئ مهم في مسألة زواج ابنه حسين خاصة وان جدتي كانت رافضة لهم تماماً .

يتبع....