[أَنَا وَ هُو .]

✨🧚🏻‍♂️أول بارت 🧚🏻‍♂️✨

مازالني عاقلة كيش كان باقيلي شهرين ونروح بلخف فاتو ماحسيتش ماشبعتش من خويا من بابا من ماما من صحاباتي مازالني باغية نزيد نخرج معاهم ونروحو ناكلو كاران مازالني باغية نزيد نشوف ماما تنوضني من الرقاد بالهراوة والما مازالني باغية المستشار تاع الليسي يعرشلنا انا وصحاباتي بيسك هربنا من الحصة راني خايفة هاذي هي صح الحياة لي كنت باغيتها ؟ راح نكون قادرة نعيش وحدي في بلاد الغرباء ؟ راح نقدر نتحمل المسؤولية ؟ راح نقدر نتحمل فراقهم ؟ زدت عنقت اية لي كانت تشخر قدامي وقعدت نبكي راهم قاع راقدين عندي زعما كي اخر نهار ياخي بهالل ياخي غمضت عينيا ورقدت غدوا نهار طويل وحياة جديدة .

"صوت الرافاي قلع "
فريال : طفو الخرا يالخرا
-
كريمة : "ناضت مفزوعة" سهى سهى سهى نوضي اجري راكي روطار
-
سهى: اه واش روطار !؟ وين علاه كيفاه ؟
"نضت نجري شفت الرافاي لقيتها الربعة تاع الصباح وطيارتي على الستة هاذي غير خدمة كريمة عاودت ريقلاتو مورايا "
سهى: كريمة من نيتك راهي الربعة تاع الصباح علاه ديريلنا هاك وعاودت قلبت المخدة ورقدت
-
كريمة : ايا نوضي نوضي راكي رايحة مابقا لا رقاد لا جد ماليهم نوضو قاع خلونا نوجدو من دروك
فريال : صاي راني نضت ريحتي كي خسرتيلنا رقادنا
أية : بفففف شحال تهدرو
سهى : عندها الحق نوضو ندوشو نسقمو رواحنا نشربو اخر قهوة في غرضنا وكيما يبغي القلب

المهم نضنا في داك الوقت ورحنا تلمينا قاع في داك الدوش زوج يدوشو وزوج يمشطو في شعورهم ويغسلو في وجوهم (واه مانحشموش من بعض 😒) كملنا ولبسنا ورحت انا وجدت القهوة ونوضت بابا وماما لقيتهم نايضين ديجا .
-
المهم تلمينا قاع على الطابلة وقعدنا ناكلو ونقسرو ممبعد لحق الوقت لي نروحو فيه ايا ودعت الدار وسريري ومكتبي مساكن شافو معايا الويل وخرجت نبكي من الدار وصلنا للمطار شوية بكري وقعدنا مجمعين تماك ومتعانقين والناس يخزرو فينا 😒 كريمة دارتلنا السمير بالبكا غير تنوح المهم بعد وقت مش طويل لحق الوقت وين نروح سلمت عليهم وودعتهم قاع ورحت ركبت راني جاية ايرلاندا فري ماكمش واجدين .
-
المهم رحت فريت قاع صوالحي وفتشونا وقاع هاذاك الشكيل تاعهم ورحت ركبت في الطيارة اسوء حاجة عندي ركبت مرة وديتها طريق كاملة بالقيا والحمى طلعتلي ومرضت مرضة كحلة موراهاهاذي الصحة تاع زوج دورو نركب في الطيارة نمرض نزعف نمرض نبكي نمرض نضحك ونفرح ولا نتقلق بزاف نتغاشا المهم لا علينا الحمد لله لقيت كرسيا حدا التاقة ركبت وقعدت نقرا في دعاء السفر ونشهد وحالتي لا حالة وركبت مرا كبيرة قدامي قعدت شادتلي يدي ووليدها يضحك عليا نبهدل علابالي
هي طلعت وانا روحي طلعت معاها المهم ديسيديت نرقد لا دروك نموتلهم لهنا .
-
نرجعو لدزاير
كريمة شبعت بكا هي وفريال ومامات سهى وأية غايضتها بصح قاعدة تصبر فيهم أية دايما كيما هاكا هي الانسان العاقلة الرزينة الحكيمة لي تعرف كيفاه تتصرف على عكس لوخرين هوما النار وهي الما .
كريمة : يتسما دوكا ماكاش لي تسب الذراري وكي نقولها فلان عجبتو تقولي اديني ليه نضربو ؟
-
فريال : وانا معامن نبدا ندابز .
-
مامات سهى : لوكان غير ترجع مانهدرلهاش على الماكلة .
-
اية : ياجماعة اتقو الله راهي ماماتتش راحت غي تقرا  ياك كنا باغيين نروحو حنا تان نلحقوها ؟ طاطا نتي مش وعداتك كي تستقر تطلعك تريحي معاها في العطلة ؟ ايمالا اسكتو البكا مش راح يردها ادعولها توصل بخير
-
كريمة : صح عندك الحق ان شاء الله نروحو قاع ونلحقوها تماك
-
فريال : كو ربي تدير صحابات جدد تماك وتنسانا انا والله نروح نضربها
-
أية : شوفي فواش راكي تخممي حمارة
فريال : ماتقوليليش حمارة
-
بابات سهى : شرايكم تحبسو دبزة ونرجعو للدار ؟
مامات سهى : واه امشو
-
خلاوهم مشاو شوية ونطقت فريال
قالت : هاذيك سهى تدير غي هاك تعرف ربعين بنادم والله ونلقاها متصورة مع واحدة  ولا ابونات واحدة في الانستا من تماك نطلع ليها وقولو مانيش فريال
اية : اششششش بلعي فمك
كريمة : الطفلة هذاوين ركبت في الطيار بلاك مازال ماقلعتش ونتي راكي تهدري في هاذي الهدرة
-
فريال : انا مانفهمش انا دايرة هاك اتقبلوني انا نورمال ندير صحابات نتوما لا ياااسبحان الله .
اية : اسكتي وركبي .
"خرجتلها لسانها وصبعتلها بلامايشوفها كاش واحد"
كريمة : ماتحشميش عيدارية .
المهم رجعو للدار وداو صوالحهم وكل واحدة راحت لدارهم
-
نرجعو لبطلتنا .
كنت راقدة احلى رقدة حتى نوضتني المرا لي حدايا قاتلي راه باقيلنا نص ساعة وننزلو وانا قتلها نوضيني باه مانهبطش دايخة المهم نضت وصحصحت فتحت شوية الشباك وقعدت نشوف السما شحال شابة والغيوم يهبلو كلما ندخلو في غيمة نشوفو الضباب سبحان الله
قعدت غايسة في السما ومرة نصور ومرة نقسر مع المرا لي حدايا شحال ناس ملاح حكاتلي قاع قصة حياتها وكيفاش سوفرات ماحسيتش قاع بالوقت حتى سمعتهم يقولو راني هابطين الحمد لله الهبطة كانت ساهلة شوية على الطلعة نزلنا ورفدنا قشنا ورحنا تان تمرميدة في هاذاك المطار خرجت بعد نص ساعة رافدة كاباتي لقيت طاكسي حابس رحت نجري ليه